1 KORINTUS 14 - KITAB NU TUMPU ALLA LELE MA'IMAI'

To pia-piangkuka na katalangan mongkona balakat nu Roh nu Tumpu Allah

¹ Tionyo ahi' komiu bala usaha mongkalibosi to mia-mian sangga'at. Ka' bala usaha suele da mohumpak to bala-balakat anu nubee' nu Roh nu Tumpu, ka' anu talalo hondo, da moko ala monsisikakon tanga'an-tanga'an nu Tumpu hi mian.

² Mian anu basisik nu basa' anu okabangangi, mian aijo' misa' basisik hi mian; ia basisik hi Tumpu. Madi' ko mian monsumbu' anu tinaloakonnyo, kalana Roh nu Tumpu na nompotuka' hi ia nontaloakon anu ola Tumpu na monsumbu'.

³ Panyo mule' mian anu mompotokakon lele lengkat mae hi Tumpu Allah, mompotoka hi mian da bau pompohoson aha, da bau pongkakeha aha, ka' da bau pomposanang kinyonyoa nu aha.

⁴ Mian anu basisik nu basa' anu okabangangi ola mompohoson posi butongnyo, panyo mian anu mompotokakon lele lengkat mae hi Tumpu montulungi jama'at da timbali mahoson.

⁵ Palias na ko ima'nyo de kita Utus moko ala basisik manjoo' na ngahan nu basa' anu okabangangi. Panyo anu talalo ma'ima' aijo'mo de kita Utus timbali mompolele tanga'an nu Tumpu. Kalana mian anu mompotoka lele lengkat mae hi Tumpu, lebe daka' molingkudui mian anu basisik tiba ngangahan nu basa' anu okabangangi; sangalasan na hannyo de mian anu basisik nu ngangahan basa' anu okabangangi aijo' timbali mompoto'i apaa na alati'nyo nu anu tinaloakonnyomo aijo' da mingguna hi jama'at iwi-iwi'.

⁶ De aku bisuannyo toka hi beleyum ka' aku basisik tiba ngangahan nu basa' anu okabangangi, apaa na gunanyo aijo' hi komiu? Madi' ko gunanyo mau pe'e sangkiding! Sangalasan na hannyo de aku mompoto'i apaa na anu tinaloakon nu Tumpu, kabai aku montalangkan apa-apaa mongkona Tumpu, kabai aku mompotokakon lele lengkat mae hi Tumpu, kabai aku mompogulu'.

⁷ Pakakas nu musiik anu madi' ko nyawanyo mau pe'e sangkiding susumo puloit, ka' kasapi, de onyi'nyo madi' opuuhi kabai o kuti' hoso-hoson, mosia na mian monsumbu' elok apaa na pinuuhannyo kabai kinuti'nyo?

⁸ Sa'angu' na sonto' sangga'at mule': De tolompet madi' opo onyi' ima-ima' ihe na mogogau' da mahampatemo?

⁹ Sumo aitumo na kapandeanum basisik mongangahan na basa' anu okabangangi. De kapandean nu kita Utus montaloakon potatae haha aijo' madi' manasa, madi' ko samian pe'e na anu moko ala monsumbu' apaa na tinaloakon nu kita Utus. Potatae haha aijo' madi' ko kaliangannyo.

¹⁰ I dunia aiya manjoo' na basa', panyo madi' ko sa'angu' pe'e na basa' haha aijo' na madi' ko alati'nyo.

¹¹ Panyo de aku madi' mangalati' i basa' anu tinaloakon nu toto samian, saba' mian anu mompake basa' aijo' pokakanamo mian anu i salipu'an na basisik hi belengku; sumo aitu mule' aku toka hi ia.

¹² Mongkona ola posi komiu, kusumbu' komiu mongka'oho' hondo mohumpak to bala-balakat anu lengkat mae hi Roh nu Tumpu. Panyo anu penting hondo, tionyo ahi' komiu bala usaha da mompake kasanggupan anu montulungi jama'at da timbali mahoson.

¹³ Mokonyo aijo' mian anu basisik nu basa' anu okabangangi tionyo ahi' momoita hi Tumpu da ia obee'i suele kasanggupan montalangkan apaa na anu tinaloakonnyomo.

¹⁴ Kalana de aku balado'a nu basa' anu okabangangi, kinyonyoangku memang balado'a, panyo pikilanku ola momohokot.

¹⁵ Jadi apaa na anu tionyo kubau? Aiya na anu kubau: Aku balado'amo nu rohku, panyo suele balado'amo nu pikilanku. Aku manyanyimo nu rohku, panyo aku suele manyanyimo nu pikilanku.

¹⁶ Kalana de kita Utus ola montaloakon talima kase hi Tumpu Allah nu kinyonyoa, ka' daagi' ko mian sangga'at anu madi' mangalati' i basa' anu okabangangi, anu lengkat mae hi Roh nu Tumpu aijo', saba' mian aijo' madi' moko ala motatae, “Aku setuju” i do'a pontalima kaseum aijo'; kalana ia madi' monsumbu' apaa na anu tinaloakonmo nu kita Utus.

¹⁷ Mau mule' do'a pontalima kaseum aijo' hi Tumpu talalo ma'ima', panyo do'a aijo' madi' ko gunanyo hondo-hondo hi mian sangga'at.

¹⁸ Aku montalima kaseh hi Tumpu, kalana aku timbali basisik nu ngangahan basa' anu okabangangi molingkudui kita Utus iwi-iwi'.

¹⁹ Panyo, i uno nu kasingkabotan monsombah Tumpu, aku lebe mongka'ima'i mompake olima' na potatae anu timbali nusumbu' nu mian ka' de mule' ola mompake moda-madala na potatae i basa' anu okabangangi. Lebe ku ka'ima'i sumo aijo' da aku timbali mompotiju' mian.

²⁰ To Utu-utus! Boli bapikin sumo to ana-anak. I han anu ma'idek, bakas da tataapmo na komiu susumo anak ise'. Panyo i han bapikin, tionyo ahi' komiu timbali mian anu motu'amo.

²¹ I uno nu Kitab nu Tumpu tinulismo sumo uuka, “Tumpu notatae, ‘Nompake to mia-mian anu basisik nu basa' anu madi' osumbu'na alati'nyo, Aku motataeje hi mian anu palesayamo aiya. Kupakeje na to mia-mian anu i salipu'an, Aku motataeje hi mian anu palesayamo hi beleng-Ku; mau mule' sumo aitu, aha madi' mongka'oho' mohongo potataeng-Ku.’ ”

²² Jadi balakat da basisik nu ngangahan basa' anu okabangangi aijo' sumo salaku tanda toka hi mian anu madi' palesaya, misa' toka hi mian anu palesayamo. Ka' balakat da mompoto'i tanga'an nu Tumpu hi mian aijo' sa'angu' na tanda kona hi mian anu palesayamo misa' kona hi mian anu madi' palesaya.

²³ Mokonyo aijo', de bisuannyo jama'at singkabotmo i uno nu pogombuan, iwi-iwi' jama'at basisikmo ingangahan nu basa' anu okabangangi, lantas toka to pia-piangkuka na mian anu misa' gampanto, kabai to mia-mian anu misa' Kristen, tantu to mia-mian haha aijo' monsangka komiu notutuangmo iwi-iwi'!

²⁴ Panyo de kita Utus iwi-iwi' mompotoka lele lengkat mae hi Tumpu, lantas toka mae na samian anu misa' Kristen, kabai samian anu misa' gampanto, tantu hahan anu pinolele nu kita Utus iwi-iwi' mompoto'i to dosa-dosa' nu mian aijo' sahingga ia tolo inau'mo i to dosa-dosa'nyo.

²⁵ Hahan anu sulu-suluk i kinyonyoanyo osisikakonmo, sahingga ia madi'mo kobubuun, lantas monsombahmo Tumpu. Ia mangakumo taalu' totu-totu'u Tumpu daagi' ko anu itina' hi komiu.

Atulan i uno nu jama'at

²⁶ Jadi to Utu-utus, apaa na alati'nyo iwi-iwi' aijo'? De komiu silimu' monsombah Tumpu, daagi' ko anu manyanyi, daagi' ko anu mompogulu', daagi' ko anu mompoto'i apa-apaa lengkat mae hi Tumpu Allah, daagi' ko anu basisik nu basa' anu okabangangi, ka' daagi' mule' ko anu montalangkan apaa na anu tinaloakonmo aijo'. Panyo iwi-iwi' aijo' tionyo ahi' obau da bau pompogulu' ka' da bau ka'ima'an nu mian iwi-iwi'.

²⁷ De daagi' ko anu mongka'oho' basisik nu basa' anu okabangangi, tionyo ahi' ua'aha kabai talalomo manjoo' aha totolu' na mian obau mobolo-bolos. Ka' tionyo ahi' daagi' ko anu montalangkan apaa na tinaloakonmo nu mian anu binasisik aijo'.

²⁸ De madi' ko anu moko ala montalangkan, sahanyo to mia-mian anu basisik nu basa' anu okabangangi aijo' momohokotmo, de singkabotmo i uno nu pogombuan aijo'. Sahanyo aha basisik ola i uno nu kinyonyoa nu aha hi Tumpu.

²⁹ Ua'aha kabai totolu' na mian anu ko lele lengkat mae hi Tumpu tionyo ahi' mompotoka lele aijo' hau-haunyo sangga'at mompopikilakon apaa na anu tinaloakonnyo aijo'.

³⁰ Panyo de bisuannyo lele lengkat mae hi Tumpu aijo' lubat mae hi samian anu suha-suhang aijo' hi aha anu singkabotmo i pogombuan aijo' sahanyo anu hau-haunyo basisik, aijo' momohokotmo.

³¹ Tiba jalan anu sumo aijo', to Utu-utus iwi-iwi', samian ka' samian moko ala mompotoka lele lengkat mae hi Tumpu; da iwi-iwi' timbali mohumpak pokinde' ka' mompaka palesaya.

³² Balakat nu Roh da timbali mompotoka lele lengkat mae hi Tumpu timbali o atun nu mian anu mompotoka lele aijo'.

³³ Tumpu aijo' te Tumpu anu mongka'ima'i da ta'atun; Ia misa' Tumpu anu mongka'ima'i da tabuntala. Sumo anu tinimbalimo hi iwi-iwi' na jama'at nu Tumpu,

³⁴ boune sahanyo ola momohokot de singkabotmo i pogombuan nu jama'at. Aha madi' opobee' basisik. Aha madi' timbali opobee' mongatun; aijo' mompahakona tiba atulan nu agama.

³⁵ De aha mongka'oho' monsumbu' apa-apaa, aha ola ahi' mompokilawa han aijo' hi langkai' nu aha i laigan. Moko ambang hondo de boune na basisik de singkabotmo i uno nu pogombuan nu jama'at.

³⁶ Pa' potatae nu Tumpu aijo' nolengkat mae hi komiu? Kabai ola hi beleyum na pompotokan potatae aijo'?

³⁷ De daagi' ko mian anu mongoa'i ko balakat da mompotoka lele lengkat mae hi Tumpu kabai ia ko balakat sangga'at lengkat mae hi Roh nu Tumpu, mian aijo' tionyo ahi' monsumbu' taalu' anu tinuliskumo aiya te palentah lengkat mae hi Tumpu.

³⁸ Panyo de ko anu madi' mongala aiya, boli mongkalinga ia.

³⁹ Mokonyo aijo', To Utu-utus, bala usaha da mompotoka lele lengkat mae hi Tumpu, panyo boli montewa' mian anu mongka'oho' basisik i ngangahan nu basa' anu okabangangi.

⁴⁰ Panyo iwi-iwi' aijo' tionyo ahi' obau ma'i-ma'ima' ka' ta'atun.