1 KORINTUS 12 - KITAB NU TUMPU ALLA LELE MA'IMAI'

Balakat nu Roh nu Tumpu

¹ Uuka aiya mongkona to bala-balakat anu binee'mo nu Roh nu Tumpu. Mongkona han aijo', pongka'oho'ku to Utu-utus monsumbu' ahi' anu sahondo-hondonyo.

² O inau' tempo'nyo komiu ma'isa nonsumbu' Tumpu, komiu tinagodamo nombatuki pilogot anu momo'.

³ Tionyo ahi' osumbu' miu saba' mian anu nu kuasaimo nu Roh nu Tumpu madi' moko ala motatae, “Kinutukan na i Yesus!” Sumo aitu mule' madi' ko samian pe'e moko ala montaloakon, “I Yesus Tumpu!” de mian aijo' madi' nu kuasai nu Roh nu Tumpu Allah.

⁴ Manjoo' na ngangahannyo nu balakat anu lengkat mae hi Roh Nu Tumpu, panyo iwi-iwi' aijo' ola sa'a-sa'angu'nyomo na Roh anu mombee'i mae aijo'.

⁵ Manjoo' na ngangahan nu kalaja bau pohongo-hongo Tumpu, panyo Tumpu anu ohongo-hongo aijo', Tumpu anu sa'a-sa'angu'nyomo!

⁶ Manjoo' na ngangahannyo mombau kalaja nu Tumpu, panyo anu mombee'i kahosonan aijo' hi toto samian, aijo'mo Tumpu anu sa'a-sa'angu'nyomo!

⁷ Toto samian, kita iwi-iwi' nu posi balakati nu Roh nu Tumpu Allah da bau ka'ima' anto.

⁸ Toka hi samian, Roh aijo' mombee'i balakat da basisik o angga'i. Toka hi sangga'at Roh suele ai-aijo'mo na mombee'i balakat da monsisikakon Tumpu.

⁹ Roh sa'a-sa'angu'nyomo aijo' suele na mombee'i hi samian balakat anu madi' ko gampanyo da palesaya hi Kristus; panyo hi sangga'at Roh aijo' mombee'i kuasa da nompa'alin mian.

¹⁰ Hi samian binee'an kuasa da timbali mombau anu okabangangi, ka' hi sangga'at binee'an balakat da mompoto'iakon tanga'an-tanga'an nu Tumpu. Hi sangga'at mule' Roh aijo' nombee'i balakat da moko ala mompotantu pompahasala'annyo iya na balakat anu lengkat mae hi Roh nu Tumpu, ka' iya na misa'. Daagi' ko anu binee'an balakat da motatae nu ngangahan na basa' anu okabangangi, ka' daagi' mule' ko anu binee'an balakat da monsisikakon poso'nyo nu basa' haha aijo'.

¹¹ Iwi-iwi' aijo' kalaja nu Roh anu sa'a-sa'angu'nyomo aijo'; toto samian pinosi bee'anmo balakat anu madi' pokakana, iyaje ahi' pongka'oho' nu Roh aijo'.

Manjoo' na bagian nu butong panyo sa'a-sa'angu'nyomo na butong

¹² I Kristus aijo' sumo butong nu mian; butong aijo' sa'angu', panyo manjoo' na bagiannyo. Iwi-iwi' na bagiannyo aijo' mau mule' manjoo', panyo tinimbali sa'angu' na butong.

¹³ Sumo aitumo na kita iwi-iwi', mian nu Yahudi kabai misa' mian nu Yahudi, to posa-posaihon kabai to mia-mian bebas; kita iwi-iwi' pinalamandikanmo nu Roh-mo ai-aijo', da kita oposa'angu' hi butong i Kristus aijo'. Kita iwi-iwi' suele mongoa'i kuasa nu Roh anu sa'a-sa'angu'mo aijo' sampe sukup.

¹⁴ Kalana butong aijo' madi' ola sa'angu' na bagian na tinimbali, panyo manjoo' na bagiannyo.

¹⁵ De tengke motatae, “Aku misa' lima, kalana aijo' aku misa' gampa nu butong,” aijo' misa' alati'nyo, saba' tengke aijo' misa' gampa nu butong.

¹⁶ Ka' de bihing motatae, “Kalana aku misa' mata, jadi aku misa' gampa nu butong,” aijo' mule' misa' alati'nyo, saba' bihing aijo' misa' gampa nu butong.

¹⁷ De bisuannyo songko-songko na butong aijo' ola tinimbali mata, mosia na butong aijo' timbali mohongo? Kabai de songko-songko na butong aijo' ola tinimbali bihing, mosia na butong aijo' mongook?

¹⁸ Jadi tinoantomo Tumpu na nompokona bagian haha aijo' i butong. Tumpu na nompokona i posi-posi tampatnyo, iya na anu Nu kahanda'.

¹⁹ De iwi-iwi' ola sa'angu' na bagian, iya na osanggohi butong?

²⁰ Jadi memang manjoo' na bagiannyo, panyo butong ola sa'angu'.

²¹ Mokonyo aitu, mata madi' timbali motatae hi lima, “Aku madi' mompalalui beleyum!” kabai ubak motatae hi tengke, “Aku madi' mompalalui beleyum!”

²² Ola ahi' sabenannyo bagian haha aijo' nu butong anu osangka madi' mahoson, aijo' na opalaluinto hondo;

²³ ka' bagian haha aijo' anu osangkanto madi' ko angga'nyo, padahan aijo' ahi' na bagian-bagian anu talalo hondo o angga'into. Bagian haha aijo' nu butong anu otoanto madi' ma'ima', aijo' ahi na anu talalo opalahatikanto.

²⁴ Bagian haha aijo' nu butong anu otoa na'ima'mo madi'mo palalu opalahatikanto. Tumpu nompotimbalimo butongto sumo aijo' na baunyo, sahingga bagian haha aijo' anu madi' talalo ko angga'nyo na anu talalo hondo o angga'into.

²⁵ Desumo aitu yo butong aijo'madi' mobagi-bagi; posi-posi bagian mompalahatikan samian ka' samian.

²⁶ De sa'angu' na bagian mongoa'i sansala, iwi-iwi' na bagian sangga'at suele mongoa'i sansala; de sa'angu' na bagian o puji', iwi-iwi' na bagian sangga'at suele hingga-hinggat lame'.

²⁷ Kita Utus iwi-iwi' hingga-hinggat aijo'mo na butong i Kristus, ka' komiu toto samian suele te bagian nu butong aijo'.

²⁸ Sumo aitumo i uno nu jama'at, Tumpu nontantukanmo tampat hi ngangahan nu mian: Momonanyo to rasul-rasul; ko ohua'nyo to nabi-nabi, ko totolu'nyo to gulu-gulu', lantas aha anu mombau hahan anu okabangangi, lapas aijo' aha binee'anmo balakat da nompa'alin mian, kabai montulungi mian sangga'at, kabai anu mongatun, kabai mule' da basisik tiba ngangahan nu basa' anu okabangangi.

²⁹ Aha misa' iwi-iwi' rasul, kabai nabi, kabai mule' gulu'. Madi' iwi-iwi' ko kuasa da moko ala mombau anu okabangangi,

³⁰ kabai da nompa'alin mian, kabai da basisik tiba ngangahan nu basa' anu okabangangi, kabai da mongalati'i to basa-basa' haha aijo'.

³¹ Kalana aijo' tionyo ahi' olio miu totu-totu'u da mohumpak to bala-balakat anu talalo hondo penting. Panyo lapas aiya kupotiju'mo hi belemiu na jalan anu talalo hondo ma'ima'.