1 KORINTUS 1 - KITAB NU TUMPU ALLA LELE MA'IMAI'

^1-3 To Utu-utus jama'at nu Tumpu i Korintus! Kita Utus ilagamo nu Tumpu da timbali mian-Nyo anu palesayamo, kalana kita Utus i Kristus Yesusmo, na tumpunyo, tiba iwi-iwi' na mian mau mule' pa' iya mae na anu monsombah hi Tumpunto i Yesus Kristus, aijo'mo Tumpu nu aha tiba Tumpunto suele. Aku, i Paulus, ka' utusto i Sostenes, mongindi da Tumpu Tuumanto ka' Tumpunto i Yesus Kristus mombee'i balakat ka' ka'ima'an hi komiu. Aku montulis sulat aiya salaku rasul i Kristus Yesus, posi pongka'oho'-Nyomo nu Tumpu na nohangkatmo aku.

To bala-balakat anu tinalima hi Yesus Kristus nolengkat mae hi Tumpu

⁴ Aku saja' montalima kaseh hi Tumpu mongkona komiu, kalana komiu nontalimamo balakat hi Yesus Kristus anu nolengkat mae hi Tumpu.

⁵ Kalana komiu i Kristusmo na tumpunyo, sahingga kantumuu'an miu kaya i uno nu iwi-iwi' na han. Kapandean miu mongkona iwi-iwi' na han talalo matangkas, ka' komiu pande na mompogulu' kapandean aijo'.

⁶ Aijo' momposumbu' saba' lele mongkona i Kristus ninsoopmo i uno nu kinyonyoa miu,

⁷ sahingga sa'angu' pe'e na balakat madi' maga'a hi komiu, hau-haunyo komiu montanda'i Tumpunto i Yesus Kristus toka ka' nutoa nu mian iwi-iwi'.

⁸ Posi i Kristus na monjagai komiu sampe i mihinyo; da de tempo'nyomo Ia po'ule'mo toka, komiu otokai mae madi' ko ideknyo.

⁹ Tumpu timbali opalesaya totu-totu'u. Iamo na Tumpu Allah anu nolagamo komiu da timbali mosa'angu' tiba Anak-Nyo, aijo'mo i Yesus Kristus Tumpunto.

Pahantuda'an i uno nu jama'at

¹⁰ To Utu-utus! Tiba sanggo nu Tumpunto i Yesus Kristus, kupoita da komiu iwi-iwi' mompaha hongo-hongo; da boli ko anu mahantuda' itina' hi komiu. Tionyo ahi' komiu mosa'angu', oposa'angu' na kinyonyoa, ka' oposa'angu' na pikilan.

¹¹ Kalana, to mia-mian anu lengkat mae hi sa'anakan i Kloë nompoto'imo hi belengku tukoonyo daagi' kino painggagaan itina' hi komiu.

¹² Anu nukona nu potataengku aijo'mo saba' itina' hi komiu daagi' ko anu notatae, “Aku mombatuki i Paulus,” daagi' mule' ko anu notatae, “Aku mombatuki i Apolos,” sangga'at notatae, “Aku mombatuki i Petrus,” ka' sangga'at mule' notatae, “Aku mombatuki i Kristus.”

¹³ Te toho' i Kristus obagi-bagi! I Paulus madi' sinilaka sinalib kalana komiu! Komiu mule' misa' pinalamandikan da timbali anu saja' mombatuki i Paulus, kabai o mosia?

¹⁴ Talima kaseh aku madi' nompalamandikan mau mule' samian itina' hi komiu, ola ahi' i Krispus tiba i Gayus.

¹⁵ Boli dumo ko samian motatae tukoonyo, aku nompalamandikanmo ia da timbali anu mombatuki aku. (

¹⁶ O, ii', i Stefanus tiba aha sa'anakan, memang aku na nompalamandikan aha. Panyo de sangga-sangga'atannyo aijo', kututugi madi'mo ko mian sangga'at na pinalamandikanku.)

¹⁷ I Kristus nonsai aku misa' da mompalamandikan mian, panyo mombebakon Lele Ma'ima' lengkat mae hi Tumpu; ka' saja' mule' kubau madi' mompake susumo kapandean nu mian basisik, da kuasa nu kasilakan i Kristus aita' i kau' salib madi' palasuma.

Kuasa tiba kapandean nu Tumpu una-una' hi Kristus

¹⁸ Kalana to mia-mian anu mongahopi kasilakan, lele mongkona kasilakan i Kristus sinalib ola susumo anu madi' totu'u. Panyo kalana hi kita anu pinosalamatmo nu Tumpu, lele aitu sumo salaku jalan nu Tumpu mompotoa kuasa-Nyo.

¹⁹ Kalana i uno nu Kitab nu Tumpu, Tumpu notataemo, “Kapandean nu mian pande Ku potambuntala'mo ka' anu nusumbu' nu to mia-mian anu ko ilimu' Ku ideimo.”

²⁰ Yo, apaa na gunanyo to mia-mian anu pande haha aijo'? Apaa na gunanyo nu aha anu ko ilimu'? Apaa na gunanyo nu aha anu pande bapikin i dunia aiya? Tumpu nompotoamo saba' kapandean nu dunia aiya palasuma samata-mata.

²¹ Kalana mau mule' mosiamo na kapandean nu mian, ia madi' moko ala monsumbu' Tumpu de ola posi kapandeannyo. Panyo kalana Tumpu pande, sahingga Ia situjumo momposalamat to mia-mian anu palesaya hi Ia kalana lele anu opolele mami, anu kokoonyo nu dunia palasuma.

²² Mian nu Yahudi sabole-bole momoita anu okabangangi da bau tanda, ka' mian nu Yunani sabole-bole monggagakon kapandean nu dunia aiya.

²³ Panyo kita aiya ola mompolele i Kristus anu sinilakamo sinalib. Lele aijo' momposumpu kinyonyoa nu mian Yahudi, ka' osangka palasuma nu to mia-mian misa' Yahudi. Ka' mian anu misa' Yahudi monsangka aijo' sa'angu' na kaponga'an.

²⁴ Panyo kona hi to mia-mian anu ilagamo nu Tumpu – pa' mian nu Yahudi kabai mian misa' Yahudi – lele aijo' salaku jalan nu Tumpu mompotoa kuasa-Nyo tiba kapandean-Nyo.

²⁵ Kalana anu otoa ponga' hi Tumpu, aijo' na pande molingkudui kapandean nu mian; ka' anu otoa madi' moko ala hi Tumpu, aijo' na lebe mahoson molingkudui kahosonan nu mian.

Kuasa nu Tumpu tiba anu madi' nupoko ala nu mian

²⁶ To Utu-utus! Soba tutugi mosia na bau-baunyo tempo'nyo Tumpu nolagamo komiu. Ola sangkiding na anu pande itina' hi komiu, kabai ko kuasa, kabai anu ko pangkat matangkas susumo koonyo nu mian.

²⁷ Kalana memang tinotonggolakonmo nu Tumpu na nompile'i anu osangka ponga' nu dunia aiya, da to mia-mian pande timbali ma'ambang. Ka' Tumpu suele nompile'imo anu osangka' madi' moko ala nu dunia aiya, da to mia-mian anu mahoson timbali ma'ambang.

²⁸ Tumpu nompile'imo anu osangka madi' ko angga'nyo, kanteles, ka' pakalaus anu osangka madi' ko kaliangannyo nu dunia aiya, da Tumpu mohopu'i anu osangka nu dunia penting.

²⁹ Sahingga madi' ko samian pe'e na timbali mombuulakon butongnyo i ahop nu Tumpu.

³⁰ Posi Tumpu na nompotimbali sahingga kita Utus nosa'angu' tiba i Kristus Yesus. Ola kalana i Kristus, sahingga kita pinotimbali pande. Ka' mule' ola kalana Ia, Tumpu nompotimbalimo kita po'ule' nompaha ima' tiba butong-Nyo, nompotimbali kita samata-mata mian-Nyo anu palesayamo, ka' nompobebas kita.

³¹ Jadi, sumo anu tinulismo i uno nu Kitab nu Tumpu, “Mian anu mongka'oho' mombubuulakon, ola ahi' mombuulakon apaa na anu binaumo nu Tumpu.”