IBRANI 8 - PERJANJIAN AMPAI KABAR BETIK

Isa Imam Agung ram

¹ Pokok sunyin jak kicikan inji iado: Ram ngedok Imam Agung sai injuk seno, sai mejong memerintah jejama Allah Mahabesar di surga.

² Ia ngeguaiko tugas sebagai Imam Agung di Ruang Mahasuci, yakdo di delom Kemah Tuhan sai sejati, sai didiriko ulih-Ni Tuhan, lain ulihni manusia.

³ Unggal imam agung diangkat untuk mempersembahko kurban atas persembahan jama Allah. Reno jugado Imam Agung ram; Ia harus ngedok sai hal untuk dipersembahko.

⁴ Kik Ia wat di dunia inji, Ia mak haga jadi imam, mani radu wat imam sai mempersembahko kurban sai dituntut delom hukum agama Yahudi.

⁵ Guai sai tian lakuko sebagai imam ano sebenorni angkah suatu gambaran rik bayangan jak api sai wat di surga. Udi radu dikeni pandai ulih-Ni Allah jama Musa tumbai, waktu Musa haga ngediriko Kemah Tuhan. Allah cawa injuk reji jama Musa, “Ingok! Sunyinni ano niku sani nutuk api sai ditunjukko jama niku di atas gunung.”

⁶ Kidang tano Isa mansa tugas imam sai jaoh lebih mulia jak sai diguaiko ulih imam-imam udi. Mani perjanjian sai harus diadako-Ni hantara Allah rik manusia, iado perjanjian sai lebih betik mani bedasarko janji untuk hal-hal sai lebih betik.

⁷ Kik mak ngedok kekurangan jama perjanjian sai mula-mula, maka mak perlu diadako perjanjian sai kerua.

⁸ Kidang Allah radu ngehalu kesalahan jama umat-Ni, sehingga Allah cawa, “Ingok, haga ratong waktuni, Nyak haga ngadako perjanjian sai ampai jama bangsa Israel, rik jama bangsa Yehuda.

⁹ Lain injuk perjanjian sai Kusani jama nenek muyang tian waktu Nyak nuntun tian mik luah jak negeri Mesir. Tian mak setia jama perjanjian sai Kusani jama tian; udido sebabni Nyak mak mempeduliko tian.

¹⁰ Kidang tano, injido perjanjian sai haga Kusani jama umat Israel di rani-rani sai haga ratong, ani Tuhan: Nyak haga ngepikko hukum-Ku mik delom pikeran tian, rik nulisni pada hati tian. Nyak haga jadi Allah tian, rik tian haga jadi umat-Ku.

¹¹ Tian mak perlu ngajar peperda wargani, atau ngeni pandai jama puarini, ‘Kenaldo Tuhan.’ Mani tian sunyin, balak lunik, haga kenal jama Nyak.

¹² Nyak haga ngampuni kesalahan-kesalahan tian, rik mak ngingokko lagi dusa-dusa tian.”

¹³ Jama ngemukako perjanjian sai ampai, Allah nyani perjanjian sai mula-mula udi jadi tuha nihan, rik api sai radu tuha, haga geluk muneh lebon.