IBRANI 1 - PERJANJIAN AMPAI KABAR BETIK

Allah cawa liwat perantaraan Anak-Ni

¹ Pada zaman tumbai lamon nihan Allah cawa jama nenek muyang ram liwat nabi-nabi, makai lamon macam cara.

² Kidang waktu zaman akher inji Ia cawa jama ram liwat perantaraan Anak-Ni. Liwat Anak-Ni injido Allah nyiptako alam semesta. Rik Allah radu nantuko bahwa Anak-Ni injido juga sai berhak ngedok sunyin hal.

³ Iado sai mancarko keagungan-Ni Allah sai gilang-gemilang; Iado gambar sai nyata jak diri Allah tenggalan. Iado juga sai memelihara keutuhan alam semesta inji jama sabda-Ni sai bekuasa nihan. Radu jak Ia memungkinko manusia untuk dibebasko jak dusa-dusa tian, Ia mejong di takhta pemerintahan di surga jejama jama Allah, Sai Bekuasa sai paling langgar.

Keagungan Anak-Ni Allah

⁴ Sanak udi mansa kedudukan sai jaoh lebih langgar jak malaikat, rik gelar sai dikeniko Allah jama Ia juga jaoh lebih tehormat jak gelar sai dikeniko jama malaikat.

⁵ Mak pernah Allah cawa injuk reji jama sai malaikat pun, “Niku Anak-Ku; waktu rani inji Nyak jadi Bak-Mu.” Mak pernah Allah cawa injuk reji tentang malaikat sai sapa pun juga, “Nyak haga jadi Bak-Ni, rik Ia haga jadi Anak-Ku.”

⁶ Kidang waktu Allah ngutus Anak-Ni sai tuha mik dunia inji, Allah cawa injuk reji, “Sunyin malaikat-Ni Allah wajib nyumbah Sanak seno.”

⁷ Tentang malaikat-malaikat, Allah cawa injuk reji, “Allah nyani malaikat-malaikat-Ni jadi angin, rik jelma-jelma sai ngebantu Ia jadi nyala apui.”

⁸ Kidang jama Sanak seno, Allah cawa, “Takhta-Mu, ya Allah, haga kekal selama-lamani! Pemerintahan-Mu iado pemerintahan sai adil.

⁹ Niku gering keadilan, rik nyuohko kecurangan; udido sebab-Ni Allah, Allah-Mu, milih Niku rik ngeni jama Niku kehormatan sai ngeratongko sukacita, ngelebihi kantik-kantik-Mu.”

¹⁰ Allah cawa juga, “Niku, Tuhan, pada mulani nyiptako bumi, rik Niku tenggalan nyani langit.

¹¹ Sunyinni ano haga lebon, rik jadi tuha injuk kawai; kidang Niku mak haga berubah.

¹² Alam semesta inji haga Niku lipat injuk kawai, rik haga Niku ganti jama sai bareh. Kidang Niku mak pernah haga berubah, rik hurik-Mu mak haga berakher.”

¹³ Allah mak pernah cawa injuk reji jama sai malaikat pun, “Mejongdo di kebelah kanan-Ku, sampai musuh-musuhmu Kutaklukko jama Niku.”

¹⁴ Kik injuk reno, malaikat-malaikat udi api sebenorni? Tian anodo ruh-ruh sai ngelayani Allah, rik sai dikayun Allah untuk nulung jelma-jelma sai haga nerima keselamatan.