1 TIMOTIUS 2 - PERJANJIAN AMPAI KABAR BETIK

Ibadah jemaah

¹ Mula-mula, nyak ngilu nihan in permohonan, sembahyang, rik dua syafaat rik ngucapko terima kasih disampaiko jama Allah untuk sunyin jelma;

² untuk raja-raja rik untuk sunyin jelma sai nyating kekuasaan. Kiludo in ram dapok hurik tenang rik tenteram untuk Allah jama kelakuan sai patut.

³ Udido sai betik rik nyenangko hati-Ni Allah, Penyelamat ram.

⁴ Ia haga in sunyinni jelma diselamatko rik pandai sai benor.

⁵ Mani, angkah wat sai Allah, rik angkah sai penengah hantara Allah jama manusia, yakdo Isa Almasih.

⁶ Ia manusia sai radu nyerahko diri-Ni untuk ngebebasko sunyin jelma jak dusa-dusa tian. Injuk reno Allah nunjukko waktu sai tepat, bahwa Ia mirak in sunyin jelma diselamatko.

⁷ Rik udido sebabni nyak dikayun mik jama jelma-jelma lain Yahudi untuk ngabarko jama tian kabar tentang kepercayaan sai benor. Sai kukemukako inji benor, nyak mak buhung.

⁸ Nyak haga in di dipa pun juga kaum jelma bakas bedua jama hati sai suci, tanpa butong atau perselisihan.

⁹ Hagani kaum bebai ngehias dirini sederhana rik makai kawai sai sopan. Dang makai potongan/model buok sai nyulok atau perhiasan-perhiasan emas atau mutiara, atau kawai sai mahal-mahal.

¹⁰ Sebalikni, hagani bebai ngehiasi dirini jama perbuatan-perbuatan sai betik injuk repa sai patut bagi bebai sai beibadah jama Allah.

¹¹ Bebai harus belajar ngehema rik patuh.

¹² Nyak mak ngebenorko bebai ngajar ataupun merintah bakas; tian harus ngehema.

¹³ Mani sai mula-mula diciptako iado Adam rik kak raduni ampai Hawa.

¹⁴ Rik lain hak Adam, melainko bebaido sai ketipu, sehingga ngelanggar perintah-Ni Allah.

¹⁵ Meskipun injuk reno, bebai haga selamat jama ngelaherko anak, asal ia jama kerendahan hati tetap percaya jama Almasih rik tetap mengasihi ulun bareh rik hurik khusus untuk Allah.