YUNU 4 - KITABI HABARI MOPIOHE

Oyiyingo lei Yunu wau pongo-ngambungu lo Allahu Taa̒ala

¹ Tei Yunu sama-samaata diila sanangi wolo sua̒li boito; tio tumbao̒ maloingo.

² Lapatao̒ tio lodua̒ mola, “Yaa Eeya, diila mailoi̒ya lowatotia tou̒ dipo lomonggata lonto bele lowatotia muloolo, deu̒ Eeya tantu mamohutu mai odie? Uitolo sabubuulio watotia hua̒a lolahi mola ode Spanyol! Otaawa lowatotia deu̒ Eeya Allahu Taa̒ala tamoomonuwa wau tao̒dehu hilao, sabali diila opulitio, molumboyoto hilao, wau laito dapadapato u molomela lanjana u mohukuumani.

³ Botia, yaa Eeya, huliaalo mai watotia mateelo wambao̒, sababu lebe mopioheo̒ watotia mateelo lou̒ tumumulo.”

⁴ Tahuda mai lo Eeya, “Yio̒ diila o alaasani u moingo odito.”

⁵ Lapatao̒ tei Yunu lonao̒ mota ode ambahu tiimuru lokota, tulusi lotihuloa̒ mota teto. Tio lohutu mao̒ wombohe tuwau wau lotiwolungo to delomio, sambela hemohima wolo u mamotoduo mai tokota lo Niniwe.

⁶ Yi Eeya Allahu Taa̒ala lopobutu mai pilomulo umalapo u loo̒wolunga olei Yunu tilinggula tio loo̒laasa sanangi. Memangi, tei Yunu sanangi daa̒ wolo pilomulo boito.

⁷ Bo loombulio mola tou̒ subu, Allahu Taa̒ala lopowali mai luanti tuwau longalia̒a waa̒ato lo pilomulo boito, tilinggula malo lolante.

⁸ Lapatao̒ dulahee malobutu mai, Allahu Taa̒ala lopodungga mai dupotaa mopatu u lohiipo lonto tiimuru. Tei Yunu ngopee̒ bilotoo̒ sababu ilodungaa lotinelo dulahu udebo odelo lomobu longgongio. Tio malowali yiloohi halapani wau ohilaa mate. Ualio mao̒, “Lebe mopiohe watotia mateelo lou̒ tumumulo!”

⁹ Bo Allahu Taa̒ala lotahuda mai olio, “Yio̒ diila paatuti mowali suukali odito sababu pilomulo boito!” Tuaheeo̒ lei Yunu, “Yilongola diila? Mapaatutilio watotia moingo daa̒ tunggula mate.”

¹⁰ Lapatao̒ Eeya lotahuda mai olio, “Pilomulo botie lobutu mai todelomo huilio tuwau wambao̒, wau pilomulo botie mololante to dulahee wumbutio mola; yio̒ sama-samaata diila lopobutu mai wau lolaalao̒ pilomulo botie. Eleponu odito yio̒ molaasa suukali lohilao sababu pilomulo botie lololante.

¹¹ Diila pongalo aakali Wau̒ diila tasuukali lohilao momikiilangi Niniwe, kota uleidaa̒ boito. Sababu ngopohia bibii-natangilio udiila oyia̒apa boito, mota teto olo lebe lou̒ ngohetuto dulo pulu lolihu lota tau̒kekeei̒ tadiipo moo̒ pohiihede wolo u mopiohe wolo u moleeto.”