YUNU 3 - KITABI HABARI MOPIOHE

Tei Yunu lodungohe to Eeya

¹ U oluolio Eeya lotahuda mai odelei Yunu.

² Tahudaa-Lio, “Ponao̒lo ode Niniwe, kota uleidaa̒ boito, wau potunggula mao̒ ode ulipulio, tahuli u wohi-U̒ mai olemu.”

³ Yi tei Yunu malo dungohe to Eeya wau lonao̒ mola ode Niniwe, kota tuwau uleidaa̒ tutu; tilinggula pilalalu tolo hui mola u lontaleelo.

⁴ Tei Yunu tilumuwota ode kota boito lapatao̒ lojalena ngotupa lodulahu, tio lolumula lohutuba, ualio mola, “Donggo wopato pulu hui mola, Ninwie mamoa̒ntulu!”

⁵ Ulipu lo Niniwe palacaya totahuli lo Allahu Taa̒ala boito. Ngoa̒amila ulipu malolantu u mopuasa, wau ngoa̒amila tau, mopio udaa meaambo kikiio̒, helomake kaingi yute u mopobiloheo̒ deu̒ timongolio malolee̒e to duduu-sawaalo limongolio.

⁶ Tou̒ ti olongia lo Niniwe loo̒dungohe habari boito, tio hua̒a lolaahu lonto yilaidiaalio. Yilopatio jumba lo Yilaidiaalio wau lomake kaingi yute, tulusi tio lotihuloa̒ toitaato peaahuo̒.

⁷ Tio olo lopololadeo̒ lo poo̒taa botie, “Palenta botie pilopolualio to Niniwe wau to putuusani li olongia wau mongo mantili: Ngoa̒amila tau, sapi, himba wau bibiahe wewolio dilini mongaa wau mongilu.

⁸ Manusia wau binatangi musi momake kaingi yute. Odelo tuoto lou̒ pololee̒e yi ngoa̒amila tau musi modua̒ mola wolo otu-otutuulo mao̒ ode Allahu Taa̒ala. Timongolio musi mopoo̒ pioheo̒ pii̒liilio u moleeto wau huhutuulio u polupolu lodusa.

⁹ Otanu Allahu Taa̒ala mamo lomelao̒ niyati-Lio wau diilalo muluka tilinggula ito diila momata binaasa!”

¹⁰ Allahu Taa̒ala loo̒onto ngoa̒amila huhutu limongolio; Tio loo̒onto deu̒ timongolio malo lolaa pii̒li limongolio u moleeto. Yi Tio lolomelo putuusani-Lio, wau diila lomata lohukuumani mai olimongolio.