YUNU 2 - KITABI HABARI MOPIOHE

Dua̒ lei Yunu

¹ Lonto delomo ombongo tola boito, tei Yunu helodua̒ ode Eeya Allahu Taa̒alaalio. Ualio mao̒,

² “Yaa Eeya, todelomo polosusa lo watotia, watotia longiibode mola to Eeya wau Eeya lolametai olo watotia. Lonto dunia lotaa mate watotia lomolohone polotulungi, polohone lo watotia dilungohe lo Eeya wau piloo̒ tuotai lo Eeya.

³ Ode tambati u modeloma watotia pilomahulo Eeya, demola wamoo̒ lodeheto. Mola teto tolohu taluhee lomalita olo watotia, buo̒ola wau baleaangio lopomahula olo watotia.

⁴ To delomo hilaa lo watotia loi̒loi̒ya: Eeya malo polahi olo watotia botie lonto talu-Lio. Watotia diilalo loo̒onto bele biluloa̒a-Lio u mantali.

⁵ Taluhu deheto lobotula tunggula ode biihu lowatotia, auhe daa̒ lohenggubei ngangaawaa̒ lowatotia, lumuto deheto lolibude lunggongo lo watotia.

^6-7 Watotia lotitidehu demola wumbato hihui̒-hui̒dea, ode aalamu u hulubangilio unti-unti demola pulito lojamani. Nyawa lo watotia moongolo molulupuhu todelomo batanga lo watotia, lapatao̒ watotia loe̒ela mola wau longiibode to Eeya. Yi malei dungga mola dua̒ lowatotia to Eeya, ode delomo Bele lo Eeya u mantali. Lapatao̒ bilotulai lo Eeya watotia lonto delomo deheto, yaa Eeya Allahu Taa̒ala lowatotia!

⁸ Tahi polubowa to balaahala udiila ohuna, lololaa to Eeya wau diilalo tatapu wau molotolo hilao.

⁹ Bo watotia mamopolahu mola puji poloi̒laalo momuji ode Eeya wau podewo lowatotia bake ode Eeya. Ngoa̒amila danti lowatotia mapohutuo lowatotia. Eeyaalo Eeya tamopoa̒ahu.”

¹⁰ Lapatao̒, to palenta lo Eeya, tola boito lopohua olei Yunu ode tudulio.