YOSUA 9 - KITABI HABARI MOPIOHE

Tau-tauwalo Gibeon helo himbulo olei Yosua

¹ Habari pasali lo ohohaama taulo Isirai̒lu malo loo̒opo demola ngoa̒amila olongia to ambahu otolopa lo Dutulaa Yordan – to hihui̒-hui̒dea tobungo lo hihui̒-hui̒dea, wau todatahu ngohilayaa̒ pentadu lo Lau Tenga demola ngoilamingo lo Hui̒dee Libanon to ambahu tilayo; deu̒yito-yito mongo olongia lo Het, Amori, Kanaa̒n, Peris, Hewi wau Yebus.

² Ngoa̒amila olongia boito malo woomboa wau lotituwau u moluhu olei Yosua wau umati lo Isirai̒lu.

³ Bo tau-tauwalo Gibeon lonto bangusa lo Hewi maloo̒ dungohe pasali lou̒ wolo u mapilohutu lei Yosua ode Yerikho wau Ai.

⁴ Lapatao̒ timongolio malolantu u mongaakali olei Yosua wolo lopo detoheo̒ toitaato kolodai limongolio: kakaa-kadowaalo panggola, bubuu-tutuwaalo angguru u hileeta upilohutu lonto watito. Wau odelo tomeu̒, timongolio lopodapato bo roti u malohengu wau hungaalo.

⁵ Timongolio lomake pakeyangi u hikede-kedenga wau sapatu u mapilanggola wau hipambo pambola.

⁶ Wolo owowoluwoa odito timongolio lonao̒ mota lodunggaya wolei Yosua to pilo tikemawa to Gilgal lapatao̒ loloi̒ya mao̒ olio wau ode tau-tauwalo Isirai̒lu, “Amiaatia lonao̒ mai lonto lipu u molaminga ohilaa mohutu daantia wolo mongo Tuani.”

⁷ Bo tau-tauwalo Isirai̒lu loloi̒ya mao̒, “Pongola amiaatia mohutu daantia woli mongoli? Tanu tambati pilo tibiluloa̒ limongoli hiwimbide wambai̒o monteea!”

⁸ Uali mongolio mao̒, “Amiaatia iloheela lohilao mohutu mao̒ penu boli wolo u pomalentai li Tuani.” “Timongoli tatoonu? Wau lonto utoonu mai?” yilintu mao̒ lei Yosua olimongolio:

⁹ Timongolio lolametao̒, “Amiaatia lonto lipu u molaminga daa̒, Tuani, sababu ilodungohe lamiaatia pasali lo Eeya Allahu Taa̒ala tahe tuboo lomongo Tuani. Ilodungohe lamiaatia pasali lou̒ pilohutu-Lio to Masiri,

¹⁰ wau pasali lou̒ wolo u pilohutu-Lio ode olongia duulota lo Amori to ambahu tiimuru lo Yordan, deu̒yito-yito tei Sihon olongia lo Hesybon wolei Og olongia lo Basan tahi biluloa̒wa to Asytarot.

¹¹ Mongo tau̒wa wau ngoilanggubu tuango lipu lamiaatia lopoa̒hu olamiaatia helo podapato tumeu̒ u lomonggatai odia modunggaya lomongo Tuani, wau mopoi̒laalao̒ deu̒ amiaatia taa̒luku ode mongo Tuani. Sababu uito, amiaatia momolohone omuura hilaa lomongo Tuani u mohutu daantia wolamiaatia.

¹² Ntali bilohi mao̒ lomongo Tuani, roti pilotomeu̒ lamiaatia botie. Tou̒ amiaatia lomonggatai odia, roti botie donggo mopatu. Bo botia, bilohilo mao̒! Malohengu wau hiluunga.

¹³ Wau bubuu-tutuwaalo angguru botie donggo bohu tou̒ tiluangao̒ lamiaatia; bo botia, bilohilo mao̒! Mahi kede-kedenga. Pakeyangi wau sapatu lamiaatia olo maloruusa sababu nonao̒ u molamingai botie.”

¹⁴ Yi tau-tauwalo Isirai̒lu lololimo mao̒ ngoi̒di ua̒alo lonto tau-tauwalo Gibeon boito, wau diilalo lohintu to Eeya pasali losua̒li boito.

¹⁵ Tei Yosua malohutu mao̒ daantia u mosaahabatia wolo tau-tauwalo Gibeon boito, wau lodantia udiila tamomate olimongolio mate-mateelo mao̒. Mongo tau̒wa umati lo Isirai̒lu olo helotadia u moe̒elao̒ daantia boito.

^16-17 Bo malo ilaalao̒, todulahee u otolulio lapatao̒ daantia boito pilohutu, taulo Isirai̒lu maloo̒oma mota ode kota Gibeon, Kepira, Beerot wau Kiryat-Yearim tomadala lotau-tauwala boito. Yi deu̒ito ilotaawa lotau Isirai̒lu deu̒ tambati pilo tibiluloa̒ limongolio diila molamingo monto Gilgal.

¹⁸ Bo taulo Isirai̒lu loo̒ pate olimongolio yila-yilateelo mao̒, sababu mongo tau̒wa lo Isirai̒lu malotadia totalu limongolio to tanggulo Eeya Allahu Taa̒ala lo Isirai̒lu. Ngoilanggubu umati lo Isirai̒lu mahibiihe pasali losua̒li boito tomongo tau̒wa limongolio.

¹⁹ Bo mongo tau̒wa boito lolametao̒, “Bolo mao̒ pongola! Ami malodanti mao̒ olimongolio wolo tadia to tanggulo Eeya Allahu Taa̒ala lo Isirai̒lu. Botia ito diila mowali mohutu u moleeto toli mongolio.

²⁰ Ito diila mowali momate olimongolio mate-mateelo mao̒ sababu ito malodanti; wau wonu ito diila moe̒elao̒ danti boito yi Allahu Taa̒ala mamo hukuumani mai olanto.

²¹ Oditolio, huliilo mao̒ timongolio hitumula, bo ito ngoa̒amila mopowali mao̒ olimongolio taa u pongotota momuongo ayu wau taa u opongotota momotaala taluhu ode olanto ngoa̒amila.” Odi-odieelo mola upilo nasehati mao̒ lomongo tau̒wa boito.

²² Lapatao̒ tau-tauwalo Gibeon boito tiliangio mai lotaalua wolei Yosua. Ualei Yosua mao̒, “Yilongola timongoli helo himbulo olami wau loloi̒ya deu̒ lipu limongoli molaminga daa̒, lebe-lebe pomao̒ bo tewe?

²³ Sababu timongoli helohutu odito, Allahu Taa̒ala mohukuumani mai olimongoli. Bangusa limongoli malaita mola mowali wato, taa u opongotota momuongo ayu wau taa u opongotota momotaala taluhu ode Bele lo Allahu Taa̒alau̒.”

²⁴ Timongolio lolametao̒, “Amiaatia helohutu odito sababu ilodungohe lamiaatia deu̒ Eeya Allahu Taa̒ala tahe tuboo li Tuani boito malo poa̒hu mai olei Musa, wato-Lio boito, mongohi mao̒ odeli Tuani ngoilanggubu lipu botie wau momate ulipulio mate-mateelo mao̒ tou̒ ti Tuani mohama huta boito. Amiaatia moohe daa̒ diila bolo amiaatia opatealio mate-mateelo mao̒, uito sababuulio hepilohutu lamiaatia ngoa̒amilalo botie.

²⁵ Botia amiaatia todelomo kawasa li Tuani. Pohutuwalo mai toonu u mopiohe modudua̒ to poomilohi Tuani ode lamiaatia.”

²⁶ Yi utieelo u pilohutu lei Yosua: tio helo duo̒lao̒ tau-tauwalo boito wau diila longohi taulo Isirai̒lu momate olimongolio mate-mateelo mao̒.

²⁷ Bo timongolio pilopo waliilio wato – deu̒yito-yito taa u opongotota momuongo ayu wau taa u opongotota momotaala taluhu duo̒lo bangusa lo Isirai̒lu wau duo̒lo mesba lo Eeya. Tunggula botia timongolio donggo hipohutua kalaja boito totambati u tilulaotao̒ lo Eeya lowali tambati potabiyalo olio.