YOSUA 8 - KITABI HABARI MOPIOHE

Kota Ai hilama wau ilantululio

¹ Eeya lotahuda mai odelei Yosua, “Ambuwaalo ngoa̒amila suludadumu, wau ponao̒lo wolimongolio ode Ai. Diila mao̒ polawalo wau diila mao̒ oohe! Wau̒ mamongohi mai olemu u moo̒haama toli olongia lo Ai. Ulipulio, kotalio, wau lipulio mahamaamu.

² Ai wau olongialio musi pohutuwomu mao̒ tutuuwauwa debo odelo u pilohutumu to Yerikho wau toli olongialio omoo̒molu. Bo pee̒enta botie babaa-langilio wau bibiahio mowali hamaa limongoli mowali miliki limongoli. Potidapa-dapatolo u moluhu kota boito wolo tumahuo̒olo mola monto wulea.”

³ Yi tei Yosua lotidapato u lonao̒ mola ode Ai pee̒-pee̒enta wolo ngoa̒amila suludadulio. Tio malo lulaotao̒ tolopulu lolihu lota tamoo-hipatea tahipiohe daa̒, tulusi lolao olimongolio tou̒ hui,

⁴ wau longohi mao̒ palenta utie olimongolio, “Potituuo̒lo to wimbiihito mola lokota boito, bo diila boti molamingo; wau poti dapatolo u moluhu.

⁵ Watia wau taulo watia mamohimbide mota kota boito. Wonu bolo tau-tauwalo Ai lumualai moluwali olami, ami matumouli wau tumeteo̒ debo odelo omoo̒omolu.

⁶ Timongolio mamo hilapita olami tulusi tunggula molamingao̒ monto kota boito, wau molantobe olami deu̒ ami lopolahi batanga debo odelo omoo̒omolu.

⁷ Tou̒ boitolo timongoli musi lumualai monto tambati u pilotituua̒ limongoli, wau mohama kota boito. Eeya Allahu Taa̒ala limongoli mamohudu kota boito ode limongoli.

⁸ Lapatao̒ mohama kota boito, pobuwalo mao̒, tutuuu̒de lo upilo malentai lo Eeya. Uitolo tuugasi limongoli.”

⁹ Lapatao̒ tei Yosua lolao olimongolio, wau timongolio mota lotituuo̒ to ambahu otolopa lo Ai towolota lo Ai wau Betel, tulusi lohima mota teto. Bo tei Yosua lotihui tokema umati lo Isirai̒lu.

¹⁰ Didimodupo daa̒ tei Yosua malobongu wau lomalentao̒ pasuukanilio alihu motia̒mbu. Lapatao̒ tio wau mongo tau̒wa umati lo Isirai̒lu lodelo pasuukani boito ode Ai.

¹¹ Pasuukani boito pee̒-pee̒enta wolei Yosua lonao̒ ode ambahu hulubangi u polohuna daa̒ lokota Ai, lapatao̒ lotikema to ambahu tilayo, tou̒toonu olumbaya tuwau towolota limongolio wau kota boito.

¹² Ngojumula otanu limo lolihu lota tamaa ilahulalio lotituuo̒ to ambahu otolopa lokota boito, towolota lo Ai wau Betel.

¹³ Oditolio, toyunuto lo pasuukani motuuhua boito ilaatululio debo odelo odie mola: malakasi u polohuna daa̒ pilopo tambatilio to ambahu tilayo lokota boito wau pasuukani u wewolio to ambahu otolopa, hiambola tei Yosua lonao̒ ode lumbaya tou̒ hui boito.

¹⁴ Odito olongia lo Ai loo̒onto tau lei Yosua, tio hua̒a lotiindaki. Tio wau ngoa̒amila taulio mailumualao̒ wau lotidulunga ode lumbaya lo Yordan mota loluhu taulo Isirai̒lu to tambati u omoo̒omolu. Diila otaawalio deu̒ bolo ngopee̒ mola tio matuhuolio monto wulea.

¹⁵ Tei Yosua wau taulio helohutu mao̒ debo odelo timongolio donggo hitoulia; timongolio tilumetea̒ mota litidulunga ode madala huta luasi u mohengu.

¹⁶ Ngoa̒amila mongo lolai̒ tokota Ai yiluntulalio lohilapita olei Yosua wau pasuukanilio boito. Bo lebe timongolio hemo hilapita olei Yosua, yi lebe hemo lamingao̒ olo timongolio lonto kota limongolio.

¹⁷ Ngoa̒amila taulo Ai yilumualo helo hilapaita taulo Isirai̒lu, tilinggula kota boito yiluli mao̒ limongolio odito wambai̒o lou̒ diila dilaaha.

¹⁸ Lapatao̒ Eeya lotahuda mai odelei Yosua, “Bintaa̒a mola totobuo̒mu wau poa̒yowa mota ode mantahu lo Ai; kota boito mawuduwo-U̒ mai botia olemu.” Tei Yosua malo pohutu olo palenta lo Eeya boito.

¹⁹ Odito tei Yosua lopoa̒yo mota lo uluu̒lio, yi pasuukani tahituua̒ boito hua̒a tilimihulo wau loluhu kota boito, tulusi lohama mao̒. Lolamemeto timongolio malomobu kota boito.

^20-22 Tau-tauwalo Ai loili ode wulea, wau loo̒onto mota poloo̒ lohubulo demola hulungo. Tei Yosua wau pasuukanilio loo̒onto olo poloo̒ wau longalati deu̒ pasuukani uwewolio malohama kota boito. Oditolio, malo baleelo tei Yosua wolo pasuukanilio mota loluhu wau helomate yila-yilateelo mao̒ taulo Ai. Tau-tauwalo Isirai̒lu tatokota lo Ai boito olo lonao̒ mai wau lodudua̒ loluhu, tilinggula taulo Ai ilobalaalio wau diila loo̒ teteo̒. Diaaluo penu boli ngotaa mao̒ limongolio taloo̒ lahi, ngoa̒amilalo ilopatealio yila-yilateelo mao̒ lotau Isirai̒lu,

²³ ngopohia olongia lo Ai. Tio yilau̒pio lapatao̒ dilelo limongolio mota lotaalua wolei Yosua.

²⁴ Lapatao̒ pasuukani lo Isirai̒lu lopobinasa mao̒ ngoa̒amila suludadu lomusu tahelo hilapita olimongolio tohuta luasi u mohengu, timongolio luli lohualinga mola ode Ai, wau helomate yila-yilateelo mao̒ ngoa̒amila taa mola teto.

^25-26 Tei Yosua tulusi wambai̒o helopoa̒yo mola lo totobui̒o ode mantahu lo Ai, wau diila helo polaaheo̒ tunggula tau-tauwala to Ai mai̒lopatea yila-yilateelo mao̒ ngoa̒amilalo. Todulahee boitolo olo mailateelo mola ngoa̒amila ulipu lo Ai – mopulaa dulo lihulota daatalio, mongo lolai̒ wau mongobua.

²⁷ Bibiahu wau babaa-langiyalo u yilambata tokota boito, hilama tau-tauwalo Isirai̒lu lowali miliki limongolio, tutuuu̒de lou̒ pilotahuda mai lo Eeya odelei Yosua.

²⁸ Tei Yosua malomobu Ai, wau lopoluli mao̒ lowali tuodu tunggula botia.

²⁹ Olongia lokota Ai boito ntilayangio towolihi, wau yilulia mao̒ mota teto tunggula lolaango. Tou̒ mato lodulahu tilumolopa mota, tei Yosua lei̒ hama mai totau milate boito wau lopo mahulao̒ totalu lohuhebu hulubangi lokota. Lapatao̒ tambati boito tilambulalio wolo botu dadaata daa̒. Boboo-tuwaalo boito woluo mola teto tunggula botia.

Butoo̒ lo Eeya hepilo bacalio to Hui̒dee Ebal

³⁰ Lapatao̒ tei Yosua lomongu mao̒ mesba tuwau to Hui̒dee Ebal ode Eeya, Allahu Taa̒ala lo Isirai̒lu.

³¹ Mesba boito pilohutulio lotuuu̒de wolo totoonulalo potunu u todelomo Buku lei Musa, wato lo Eeya boito, ode tau tauwalo Isirai̒lu: “Mesba tuwau lonto boboo-tuwaalo udiipo pee̒enta mao̒ kilalajaalio wolo pakaa-kasiyaalo wate.” Toitaato mesba boito taulo Isirai̒lu helo podewo babaa-keyaalo wau olo bake lo polodame limongolio.

³² Mola teto, lou̒ silakusia lotau-tauwalo Isirai̒lu, tei Yosua helo luladeo̒ to boboo-tuwaalo mesba boito wuwemi lo bubuu-too̒waalo Eeya uwoluo todelomo Buku lei Musa.

³³ Tau-tauwalo Isirai̒lu, wolo mongo tau̒wa, mongo polowila, mongo hakimu, wau olo tau-tauwalo deli tahi biluloa̒wa towolota limongolio, hitihula to ambahu mohu-mohualia Bulua Daantia lo Eeya hitalua ode mongo iimamu lo Lewi tahi potaala Bulua Daantia boito. Ngotayade duluo lotau-tauwala boito hitalua ode Hui̒dee Gerijim, wau ngotayadio poli hitalua ode Hui̒dee Ebal. Tei Musa, wato lo Eeya boito, malo malentao̒ alihu timongolio moponao̒ mao̒ sua̒li boito wonu bolo meidungga wakutuulio ode limongolio mololimo balakati u pilodanti lo Eeya.

³⁴ Lapatao̒ tei Yosua helo pobaca mao̒ loo̒ohuu̒ ngoa̒amila butoo̒ tutuuu̒de lou̒ hitulade todelomo Buku lo Butoo̒, tuwotuwoto babaa-lakatiyalo wau lalaa̒a-natiyaalo.

³⁵ Timii̒du palenta lei Musa pilobaca mao̒ lei Yosua ode ngoilanggubu umati lo Isirai̒lu tahi ambua mota teto, tuwotuwoto mongobua, tau̒kekeei̒, wau tau-tauwalo deli tahi iluloa̒wa towolota limongolio.