YOSUA 7 - KITABI HABARI MOPIOHE

Tei Akhan helohutu dusa

¹ Eeya malo malentai to umati lo Isirai̒lu deu̒ lonto totoonulalo u hitua-tuawua tokota lo Yerikho u musi pobinasaalo, penu boli tuwau mao̒ diila mowali hamaalo. Bo palenta boito diila dilungohe limongolio. Talolai̒ ngota tai̒lunte Akhan helo lambangao̒ palenta boito, tilinggula Eeya malo muluka daa̒ to umati lo Isirai̒lu. (Tiyamo lei Akhan tai̒lunte Karmi wau tiyamolio lipaapa meaambo tiyamolio limaama tai̒lunte Jabdi lonto kaumu Jerah todelomo suku Yehuda.)

² Tou̒ boito tei Yosua longutolia dengolo lota lonto Yerikho ode Ai, deu̒yito-yito kota tuwau to ambahu tiimuru lo Betel, membideo̒ lo Bet-Awen. Tau-tauwala boito tulugasia u monao̒ motulete madala boito. Lapatao̒ timongolio helo ponao̒ tuugasi boito,

³ timongolio luli lohualingai wau lopo duloheo̒ odelei Yosua. Timongolio loloi̒ya mao̒, “Diila palalu ito ngoa̒amilalo mota moluhu Ai. Laolaalo mota tanu dulo meaalo tololihu lota. Diila mao̒ polao ngoa̒amila suludadu odito mola u mopaatea, sababu kota boito bo kikiio̒.”

⁴ Oditolio talonao̒ loluhu kota boito bo tololihu lota wamabao̒, bo timongolio tiluhulio mai tilinggula tilumouli.

⁵ Tau-tauwalo Ai helo hilapita olimongolio lonto hulubangi lokota Ai demola madala potambangiyalo, tulusi malomate yila-yilateelo mao̒ tanu tolo pulaa wolomota towolota limongolio tobinggi lohuludu. Yi oditolio tau-tauwalo Isirai̒lu malo lawalo wau yiloohe.

⁶ Tei Yosua wolo mongo tau̒wa umati lo Isirai̒lu masiluukali daa̒ tilinggula timongolio helongai-ngaidinga pakeyangi limongolio, wau ilo-ilolaanga demola hui timongolio helo sujudu totalu Bulua Daantia lo Eeya wau helo podutu peaahuo̒ to lunggongi mongolio odelo tuoto masiluukali lohilao.

⁷ Tei Yosua loloi̒ya ode Eeya, “Oo Allahu Taa̒ala Eeyaau̒! Pongoola lo Eeya modelo olo mongowatotia demai ngotuali lo Yordan botie? Wolo mawuduo lo Eeya mongowatotia ode tau-tauwalo Amori? Alihu mongowatotia mate? Lebe mopioheo̒ mongowatotia motibiluloa̒ mola teto wambai̒o, to ngotuali lo Yordan!

⁸ Oo Eeyau̒! Musu maloluhu mai wau helomate tunggula tilumouli tau-tauwalo Isirai̒lu. Botia wolo u musi pohutuo lo watotia?

⁹ Taulo Kanaa̒n wau ngoa̒amila taa wewo tolipu botie mamodungohu pasali losua̒li botie. Timongolio mamomala wau momate mateelo mao̒ olo mongowatotia ngoa̒amila! Lapatao̒ wolo u mapohutuo mai lo Eeya u momintengi ohulumati lo Eeya?”

¹⁰ Eeya lolametai olei Yosua, “Pobongulo mola! Diila ohunalio yio̒ mosujudu ode huta debo odelo uito!

¹¹ Taulo Isirai̒lu malohutu dusa. Wau̒ malo malentai alihu timongolio modungohe daantia towolota limongolio wolaa-U̒, bo timongolio helo lambangaao̒! Babaa-langiyalo u musi pobinasaalo mahilama limongolio. Timongolio lotao̒ wau heloluuo̒ towolota lo babaa-langiyalo limongolio alihu diila otaahua.

¹² Uitolo sababuulio timongolio diila moo̒ taahangi motaalua wolo musu. Timongolio pilate tilumouli lomusu sababu timongolio lohihilao olo madilehua hukuumani u pobinasaalo. Wau̒ madiilalo pee̒-pee̒enta woli mongoli, wonu babaa-langiyalo udiila mowali hamaalo boito diipo pilopo binaasa mao̒.

¹³ Botia pobongulo mola, Yosua! Pomantaliyalo umati lo Isirai̒lu wau ahuliilo timongolio motidapato mai motaalua wola-U̒. Palentawa mao̒ timongolio motidapa-dapato loombu, sababu Wau̒ Eeya Allahu Taa̒ala lo Isirai̒lu mamotahuda mai utie ode limongolio: ‘Wuu tau-tauwalo Isirai̒lu! Babaa-langiyalo u mapilo malenta-U̒ mai u pobinasaalo, ngotayadio woluo to olemu. Tou̒ timongoli diipo molapi mao̒ babaa-langiyalo boito, timongoli diila tamoo̒ taahangi moluwali musu!’

¹⁴ Sababu uito, Yosua, polelea mao̒ ode limongolio deu̒ loombu dumodupo timongolio mapalakisaalo suku domi suku. Wonu Wau̒ molantu mao̒ suku tuwau, yi ngoa̒amila kaumu todelomo suku boito musi momaju kaumu domi kaumu. Wau wonu Wau̒ molantu mao̒, yi ngoa̒amila ngaalaa̒ todelomo kaumu boito musi momaju mai ngaalaa̒ domi ngaalaa̒. Lapatao̒ wonu Wau̒ molantu mao̒ ngaalaa̒ tuwau, yi timii̒du tau todelomo ngaalaa̒ boito musi momaju ngotaalio domi ngotaalio.

¹⁵ Lapatao̒ taa u tilunu mao̒ wau loi̒laalo helolahu babaa-langiyalo u dinidini boito musi pobuwola tunggula maahu pee̒-pee̒enta wolo ngaalaa̒lio wau totoonulalo hitua-hituawua u mililikiilio; sababu tiolo talo lambangao̒ daantia wau helohutu u moleeto daa̒ tohuungo umati lo Isirai̒lu.”

¹⁶ Loombulio mola, didimodupo daa̒, tei Yosua lopoa̒hu umati lo Isirai̒lu lomaju mai ode talu, suku domi suku, yi suku lo Yehudaalo taloo̒ tuhaata.

¹⁷ Lapatao̒ tei Yosua lopoa̒hu suku lo Yehuda lomaju mai ode talu, kaumu domi kaumu, wau kaumu Jerah lo taloo̒ tuhaata. Lapatao̒ kaumu Jerah ilahulalio lomaju mai ode talu, wau ngaalaa̒ lei Jabdi taloo̒ tuhaata.

¹⁸ Lapatao̒ uito tei Yosua lopoa̒hu ngaalaa̒ lei Jabdi lomaju mai ode talu, ngotaalio domi ngotaalio; yi tei Akhan, walae̒e Karmi, woombu lei Jabdi taloo̒ tuhaata.

¹⁹ Tei Yosua loloi̒ya mao̒ odelei Akhan, “Walau̒uu̒, akuilo wau poleleyalo mai lou̒ juujuru tewe totalu lo Eeya, Allahu Taa̒ala lo Isirai̒lu, wolo u mapilohutumu. Poleleyalo mai olau̒, diila mao̒ tuua̒.”

²⁰ “Otutu,” ualei Akhan mao̒, “Watia mai̒lodusa to Eeya, Allahu Taa̒ala lo Isirai̒lu. Utieelo u mapilohutu lowatia:

²¹ To wolota lo babaa-langiyalo u hilamaanto mai, watia loo̒onto jumba ngopita u mopiohe daa̒, u pilohutu lonto Babilonia, wau olo talaa̒ tanu dulo kilo, wau ngobatango hulawa ngoputu apingo lo kilo. Babaa-langiyalo boito ilotohilaa daa̒ lowatia, yi mahilama wau tiluuo̒ lowatia todelomo huta tokema lowatia; talaa̒lio woluo to walungio daa̒.”

²² Lapatao̒ tei Yosua hua̒a lolao mota tau ode kema lei Akhan. Yi malo ilaalao̒ babaa-rangiyalo u dinidini boito ngoa̒amilalo woluo mola teto, tiluui̒o todelomo huta, wau talaa̒lio woluo to walungio daa̒.

²³ Timongolio malohama babaa-langiyalo boito wau dilelolio odelei Yosua wau ngoa̒amila taulo Isirai̒lu. Lapatao̒ babaa-langiyalo boito pilopo dutulio totalu lo Eeya.

²⁴ Lapatao̒ tei Yosua wolo ngoilanggubu umati lo Isirai̒lu loheu̒upa olei Akhan, wau lodelo mola olio ode Lumbaya Polodutolo pee̒-pee̒enta wolo ngoa̒amila walai̒o, bibiahu sapi, kolodai, himba, kema, wau totoonulalo hitua-tuawua u mililikiilio boli talaa̒, jumba wau hulawa u tilao̒lio.

²⁵ Lapatao̒ ualei Yosua odelei Akhan, “Yilongola yio̒ lopodungga mai polodutolo ode olanto? Botia Eeya mamopo dungga mai polodutolo olemu!” Yi tei Akhan wolo ngaalaa̒lio hepilai̒lio wolo botu tunggula yilate lo ngoa̒amila taulo Isirai̒lu. Ngoa̒amila halata milikiilio, wau olo babaa-langiyalo u tilao̒lio pilobu tunggula yilaahu.

²⁶ Lapatao̒ uito tilambulao̒ limongolio wolo botu dadaata daa̒ u tunggula todulahee botie donggo woluo mola teto. Uitolo sababuulio tambati boito donggo iluntee Lumbaya Polodutolo. Yi mailooleelo mola omuluka lo Eeya.