YOSUA 6 - KITABI HABARI MOPIOHE

Dudehulio lo Yerikho

¹ To kota lo Yerikho huhuu-hebuwaalo hulubangi madilaha tio̒otutua wau hileu̒talio lodetoo̒ alihu taulo Isirai̒lu diila moo̒ tuwotao̒. Diaaluo penu boli ngotaa mao̒ tawohilio tumuwoto meaalo lumuala monto kota boito.

² Eeya lotahuda mao̒ odelei Yosua, “Botia mawuduo-U̒ mai olemu Yerikho woli olongialio wau ngoa̒amila suludadu tahi buuhelia boito.

³ Yio̒ wau suludadumu musi mobaalisi mao̒ momalita kota boito pee̒enta tou̒ ngohui ngotilonggadu wolomo hui mola.

⁴ Pitu lota iimamu, ngota-ngota modelo torompeti, musi monao̒ totalu lo Bulua Daantia. Todulahee u opitulio, yio̒ wau suludadumu musi momalitao̒ kota boito poo̒opitu wau sambela uito mongo iimamu mohiipo torompetilio.

⁵ Lapatato mongo iimamu boito musi mohiipa mola torompetilio wolo tingohu u hayahaya. Odito timongoli moo̒dungohe tingohu u hayahaya boito, ngoa̒amila suludadu musi mongiibodu meengahu wolo lame daa̒, yi dingingo meeseli lokota boito mamoohu. Lapatao̒ timongoli ngoa̒amila hua̒a tumuwotao̒ ode kota boito.”

⁶ Yi tei Yosua lotiangai tomongo iimamu, wau loloi̒ya mao̒, “Bintaa̒alo Bulua Daantia boito; pitulota towolota limongoli musi monao̒ totalulio sambela hideloa torompeti.”

⁷ Lapatao̒ tei Yosua lopoa̒hu suludadulio lobaalisi helo malita kota boito, milulowa lo baliisani tamoo-kawalia totalu u lonao̒ leimulo wolo Bulua Daantia lo Eeya.

^8-9 Tutuuu̒de wolo palenta lei Yosua, malo monggato baliisani tamoo-kawalia totalu leimulo wolo mongo iimamu tamoo-hiipawa torompeti, tilunuhe lomongo iimamu tahi potaala Bulua Daantia, lapatao̒ u pulitio baliisani tamoo-kawalia towulea. Sambela timongolio hinao̒wa, torompeti mololalaaita hepilopo tingohio mola.

¹⁰ Ngoa̒amila suludadu maa pilalentaalio u diila mongiibode wau diila molapali penu boli ngotahe mao̒ wonu tei Yosua diipo longohi palenta.

¹¹ Odieelo mola tei Yosua helo poa̒hu suludadulio lodelo Bulua Daantia wau lomalitao̒ kota boito pee̒enta, lapatao̒ luli lohualinga mota ode kema, wau lotihui mota teto.

^12-13 Loloombulio mola, didimodupo daa̒, tei Yosua lobongu lapatao̒ u oluolio mongo iimamu wau suludadu lotibaalisi helo malitao̒ kota boito todelomo toyunuto baliisani debo odelo todulahee dipo-dipolulio mai: bohu-bohulio baliisani lo tamoo-kawalia totalu, lapatao̒ opitu iimamu tamoo-hiipawa torompeti, tilunuhe lomongo iimamu tahi potaala Bulua Daantia, wau pulitio baliisani tamoo-kawalia towulea. Sambela uito torompeti mololalaaita pilopo tingohio mola.

¹⁴ Todulahee u oluolio boito timongolio helo malitao̒ kota lapatao̒ luli lohualinga mota ode pilo tikemawa. Odi-odieelo mola hepilohutu limongolio timii̒du dulahu ngotilonggadu wolomohui mola.

¹⁵ Todulahee u opitulio timongolio lobongu didimodupo tou̒ mato lodulahu boheli lobutu mai, lapatao̒ lotibaalisi poo̒opitu helo malita kota Yerikho boito wolo dudelo u tutuuwauwa. Bo todulahee opitulio boito wambao̒, timongolio helo malitao̒ kota boito poo̒opitu.

¹⁶ Tou̒ opitulio, odito mongo iimamu helohiipa torompetilio, tei Yosua longohi mao̒ palenta ode ngoilanggubu pasuukani u longiibode. Ualei Yosua, “Eeya malohudu mai kota botie ode limongoli!

¹⁷ Ngoilanggubu kota wolo ngoa̒amila tuangio musi pobinasaalo sama-samaata odelo dewo ode Eeya. Bo ti Rahab taabua suuntali boito wolo kaumu ngaalaa̒lio wamabo̒ tamowali poluli mao̒ tumu-tumulo, sababu tio malo tulungi taa u tilugasia motulete lou̒ poo̒-poo̒oyo lonto olanto.

¹⁸ Diila mowali mohama penu boli tuwau mao̒ monto ngoa̒amila u musi pobinasaalo. Wonu timongoli mohama mao̒, yi pilo tikemawa lo Isirai̒lu odungga lo topotala wau baala.

¹⁹ Ngoa̒amila balangi talaa̒, hulawa, tombaha, wau wate musi pohetu ode Eeya, wau tahuwola todelomo tambati polahuwalo lohalata haku lo Eeya.”

²⁰ Lapatao̒ mongo iimamu lohiipao̒ torompetilio. Wau odito tau-tauwalo Isirai̒lu loo̒dungohe tingohu torompeti boito, timongolio malo ngiibode loo̒huu̒-huu̒ulo mao̒, lapatao̒ dingingo meeseli lokota Yerikho loloohubu. Ngoilanggubu suludadu lo Isirai̒lu lato lobotulaa mola, wau tilumuwotao̒ ode kota boito, tulusi lohama mao̒.

²¹ Ngoa̒amila taa todelomo kota boito, panggola wau muda, taabua wau talolai̒, pilatelio yila-yilateelo mao̒ wolo wamilo. Ngoa̒amila bibiahu sapi, himba wau kolodai olo pilatelio yila-yilateelo mao̒.

²² To taduulota tamalowali taa u tiluugasia motulete lou̒ poo̒-poo̒oyo, tei Yosua loloi̒ya mao̒, “Ponao̒lo mota ode bele lotaabua suuntali boito, wau delowa mao̒ tio lumualo pee̒-pee̒enta wolo ngaalaa̒lio debo odelo u madilanti limongoli to olio.”

²³ Yi taduulota tatilugasia motulete lou̒ poo̒-poo̒oyo boito malonao̒, wau lodelo yilumualao̒ oli Rahab pee̒-pee̒enta wolo tiyamo wau tiilolio, mongo wutatio, wau kaumu ngaalaa̒lio wewo. Ngoa̒amila ngaalaa̒ li Rahab boito wolo mongo watolio dilelolio mota ode tambati u aamani totili pilo tikemawa lo Isirai̒lu.

²⁴ Lapatao̒ suludadu lo Isirai̒lu helomobu tunggula yilaahu ngoilanggubu kota boito wolo totoonulalo hitua-tuawua uwoluo todelomio, ngopohia babaa-langiyalo hulawa, talaa̒, tombaha wau wate. Babaa-langiyalo boito hilama limongolio wau dilelo ode tambati polahuwalo halata miliki lo Eeya.

²⁵ Bo ti Rahab taabua suuntali boito wolo ngoa̒amila kaumu ngaalaa̒lio yilulia mao̒ lei Yosua tumu-tumulo, sababu tio malo tulungi taduulota tatilugasia motulete lou̒ poo̒-poo̒oyo tailao lei Yosua ode Yerikho. (Tunggula todulahee botie wali mola li Rahab donggo woluo to Isirai̒lu.)

²⁶ Tou̒ boito tei Yosua lopo lualao̒ didini botie, “Penu boli tatoonu tamo tolopani mao̒ muli momongu kota Yerikho botie, mao̒tuhata laa̒anati lo Eeya. Tatoonu tamamo podutu mao̒ pundasilio mao̒olia lowalai̒o tamohuhula daa̒; wau tatoonu tamo pohuli huhuu-hebuwaalo hulubangilio mao̒olia lowalao̒ tawali-yaliilio.”

²⁷ Eeya pee̒-pee̒enta wolei Yosua, wau tanggulee Yosua lowali masa-masaahulu to ngoilanggubu lipu boito.