YOSUA 5 - KITABI HABARI MOPIOHE

¹ Ngoa̒amila olongia lo Amori to ambahu otolopa lo Dutulaa Yordan, wau ngoa̒amila olongia lo Kanaa̒n tobiihu Lau Tenga loo̒dungohe deu̒ Dutulaa Yordan mpilohengu lo Eeya ngotilonggadu umati lo Isirai̒lu helo balangao̒ dutulaa boito. Yi timongolio mailoohe wau hulu-huluhelio sababu taulo Isirai̒lu.

Tuuna to Gilgal

² Tou̒ boito Eeya lotahuda mai odelei Yosua, “Pohutua mao̒ pito monto botu, lapatao̒ muli powoluwoa mao̒ upacala polunaalo ode tau-tauwalo Isirai̒lu.”

³ Yi tei Yosua helo ponao̒ palenta lo Eeya, wau maloluuna tau-tauwalo Isirai̒lu totambati u iluntee Huludu Polunaalo.

^4-6 Tou̒ tau-tauwalo Isirai̒lu yilumualai lonto Masiri, ngoa̒amila mongo lolai̒lio matiluuna. Bo tou̒ timongolio lonao̒ ode utoonulalo mao̒ tohuta ohungaya u luasi daa̒ wopato pulu lotaunu mola hiheolio, walai̒ mongolio mongo lolai̒ penu boli ngotaa mao̒ dipoolu tatiluuna. Wau topulito taunu opato pululio boito, mongo lolai̒ utou̒ yilumualai lonto Masiri maloo̒oma umulu u patuti tumuwoto mowali suludadu, ngoa̒amilalo malo puunungo, sababu diila lodudua̒a palenta lo Eeya. Yi tutuuu̒de wolo tadia lo Eeya, timongolio diila yilohi-Lio momilohe lipu u maa̒amulu wau molomiodu boito u pilodanti-Lio odeli nenemoya limongolio.

⁷ Uitolo sababuulio ngoa̒amila walao̒ talolai̒ limongolio diipo tiluuna. Hilaide bohu botieelo tatiluuna lei Yosua.

⁸ Lapatao̒ timongolio ngoa̒amila yilapato tiluuna, timongolio lotibiluloa̒ topilo tikemawa tunggula pali limongolio loluli.

⁹ Eeya lotahuda odelei Yosua, “Todulahee botie, ohihiina limongoli odelo mongo wato to Masiri mailulutu-U̒.” Uitolo sababuulio tambati boito ilunte Gilgal tunggula todulahee botia.

¹⁰ Ngotilonggadu hikemaawa to Gilgal todatahu membideo̒ lo Yerikho, umati lo Isirai̒lu helo polame mao̒ Paska tou̒ lolaango todulahu opulaa pato tohulala boito.

¹¹ Loombulio mola, u bohulio daa̒ timongolio helo lamelao̒ ua̒lo tilapulo lipu lo Kanaa̒n, deu̒yito-yito: roti udiila oragi wau pale pilanggangi.

¹² Todulahee boito olo manna diilalo lotuhutai lonto hulungo, wau taulo Isirai̒lu malo huheli lolamela manna. Tumulalo mao̒ tou̒ boito timongolio helo lamela ua̒lo tilapulo huta lo Kanaa̒n.

Tei Yosua wau talolai̒ ngota tao̒ tingolo wamilo

¹³ Tou̒ wakutu tuwau tei Yosua woluo totili lo Yerikho. Deebolo tio loo̒onto mao̒ talolai̒ ngota tihutihulo to talulio wolo wamilo upahu-pahuto. Tei Yosua lohimbideo̒ tau boito, wau lohintu mao̒, “Yio̒ botie, tamani, meaalo laawani?”

¹⁴ “Diila tamani, wau olo diila laawani,” tametao̒ lotau boito. “Wau̒ lonao̒ mai odia odelo eyaanggu suludadu lo Eeya.” Loo̒dungohe uito tei Yosua hua̒a losujudulo mola wau lolubo tau boito. Lapatao̒ tei Yosua loloi̒ya mao̒, “Watotia botie wato li Tuani. Wolo u mowali pohutuo lo watotia odeli Tuani?”

¹⁵ Eyaanggu suludadu lo Eeya boito lolametao̒, “Lopata mola sapatumu; sababu huta tambati upilo tihulamu boito yito huta mantali.” Yi tei Yosua lolopata sapatulio.