YOSUA 4 - KITABI HABARI MOPIOHE

Mopulaa duluo botu poe̒ela pilotihulo

¹ Lapatao̒ ngoilanggubu bangusa boito woluo to ngotuali, Eeya lotahuda odelei Yosua,

² “Tulaotilo mopulaa duulota, ngota monto timii̒du suku.

³ Palentawa mao̒ timongolio mahama mai botu mopulaa duluo tohuungo Dutulaa Yordan, pasipasi totambati lomongo iimamu hitihula. Ahuliilo timongolio momotaa boboo-tuwaalo boito demola tambati pilo tikemawa limongoli de tou̒ hui.”

⁴ Yi tei Yosua lotiangai mopulaa duulota tatilulaota boito,

⁵ lapatao̒ loloi̒ya mao̒, “Ponao̒lo mota ode huungo Dutulaa Yordan, totalu lo Bulua Daantia lo Eeya Allahu Taa̒ala limongoli. Ngota-ngota musi momintaa̒a ngobotu monteeto – jumulaalio mopulaa duluo botu tutuuu̒de wolo jumulaa lo susuu-kuwaalo todelomo bangusa lo Isirai̒lu.

⁶ Boboo-tuwaalo boito mamopoe̒ela to bangusa botie tou̒ wolo u mapilohutu mai lo Eeya. Todulahee momooli wonu mongo walau̒mu mohintu mao̒ wolo boliilio boboo-tuwaalo botie olemu,

⁷ mamusi timongoli mopoo̒taa olimongolio deu̒ taluhu lo Dutulaa Yordan malobunto tou̒ Bulua Daantia lo Eeya dilelo lobalanga dutulaa boito. Boboo-tuwaalo boito malaito mopoe̒ela bangusa lo Isirai̒lu tou̒ wolo u helo toduo mai teewe.”

⁸ Tamopulaa duulota boito olo helo ponao̒ palenta lei Yosua. Tutuuu̒de wolo potuhata mai lo Eeya odelei Yosua, timongolio malohama mai botu mopulaa duluo tohuungo Yordan – jumulaalio tutuuu̒de wolo jumulaa lo susuu-kuwaalo todelomo bangusa lo Isirai̒lu – lapatao̒ dilelolio mota ode tambati pilo tikemawa limongolio.

⁹ To huungo Yordan boito olo, tei Yosua helo powudu mao̒ botu mopulaa duluo boito pasipasi totambati pilotihulaa lomongo iimamu tahi potaala Bulua Daantia boito. (Boboo-tuwaalo boito donggo woluo mota teto tunggula botia.)

¹⁰ Mongo iimau debo hitihula tohuungo Yordan tunggula tau-tauwala boito yilapato helo ponao̒ ngoa̒amila upilo malentai lo Eeya ode limongolio lotimbulude to olei Yosua. Wolo lolamemeto umati lo Isirai̒lu lobalango Dutulaa Yordan.

¹¹ Lapatao̒ ngoa̒amila leidungga mola ode ngotuali, mongo iimamu tahi potaala Bulua Daantia boito lonao̒ totalu limongolio.

¹² Tutuuu̒de lou̒ pilomalentao̒ lei Musa, tamo-hipatea lonto suku Ruben, Gad wau ngotayadu suku Manasye, maleimulo lobalango dutulaa.

¹³ Ngoa̒amilalo wopato pulu lolihu lota mongo lolai̒ tao̒ tingolo wau dapa-dapato u mopaatea. Totalu lo Eeya, timongolio lobalango lotidulunga ode datahu moopa totili lo Yerikho.

¹⁴ Todulahee boito Eeya helo ponao̒ susuu-aliyaalo u lohutu bangusa lo Isirai̒lu lohulumati olei Yosua odelo taa udaa̒. Ngotupa lo tutumulio timongolio helo hulumati olei Yosua debo odelo timongolio helo hulumati olei Musa.

¹⁵ Lapatao̒ Eeya lopoa̒hu olei Yosua

¹⁶ lomalentao̒ tomongo iimamu tahi potaala Bulua Daantia boito alihu lumualai monto Yordan.

¹⁷ Tei Yosua helo pohutu mao̒ wolo upilo malentai lo Eeya olio.

¹⁸ Odito mongo iimamu leidungga mao̒ tobiihu dutulaa, taluhu dutulaa boito maluli tilumolohe wau lolepatai debo odelo bohulio mai.

¹⁹ Umati lo Isirai̒lu leidungga mota ode ngotuali lo Yordan wau todulahu opululio hulala bohulio, wau timongolio lotikema to Gilgal ambahu tiimuru lo Yerikho.

²⁰ Mota teto tei Yosua lopo woludeo̒ mopulaa dulo botu u hilama mai lonto delomo Yordan.

²¹ Lapatao̒ tei Yosua loloi̒ya mao̒ ode umati lo Isirai̒lu, “Todulahee momooli wonubolo mongo walai̒ mongoli mohintu pasali lo boliilio lo boboo-tuwaalo botie,

²² poo̒taa mao̒ olimongolio deu̒ umati lo Isirai̒lu helo balangao̒ Dutulaa Yordan botie toitaato huta u mohengu.

²³ Wunggulia mao̒ olimongolio deu̒ Eeya Allahu Taa̒ala limongoli helo pohengu taluhu Dutulaa Yordan boito ode limongoli tunggula timongoli ngoa̒amilalo leidungga mota ode ngotuali, tutuuwaua debo odelo Tio helo pohengu Lau Gelaga ode olami,

²⁴ alihu ngoa̒amila taa todunia motota deu̒ donggo boli udaa̒a-Lio kawasa lo Eeya. Wau lou̒ odito timongoli mamo hulumati to Eeya Allahu Taa̒ala limongoli u ohiheo-hiheolo mao̒.”