YOSUA 3 - KITABI HABARI MOPIOHE

Umati lo Isirai̒lu lobalango Dutulaa Yordan

¹ Loloombulio mola, tei Yosua wau ngoilanggubu umati lo Isirai̒lu lobongu didimodupo daa̒, lapatao̒ lololaa mao̒ tambati pilo tikemawa limongolio to Sitim, wau lonao̒ ode Dutulaa Yordan. Mota teto timongolio lotikema sambela hemohima wakutuulio u mobalango.

² Lapato lopalutao̒ tolo hui mola, mongo iimamu helo helili ode ngoilanggubu pilo tikemawa,

³ wau helongohi mao̒ palenta botie ode umati lo Isirai̒lu, “Wonu bolo timongoli moo̒onto mongo iimamu potapotaa Bulua Daantia lo Eeya Allahu Taa̒ala limongoli, mamusi timongoli momonggato mololaa mao̒ tambati pilo tikemawa botie. Dudui̒ilo Bulua boito,

⁴ bo diila mao̒ poonao̒ totili daa̒ lo Bulua boito; dudui̒ilo monto wulea aantadio ngokilo. Lou̒ odito timongoli mamotota mao̒ dalalo u musi nao̒o limongoli, sababu timongoli diipo pee̒enta mao̒ lonao̒ mai ode lipu botie.”

⁵ Tei Yosua loloi̒ya mao̒ ode umati lo Isirai̒lu, “Mamusi timongoli mopo mantali batanga, sababu loombu Eeya mamohutu mai u moo̒linggolabu tohuungi mongoli.”

⁶ Lapatao̒ tei Yosua lomalentao̒ tomongo iimamu alihu momintao̒ Bulua Daantia boito tulusi momonggato motimulo wolo umati lo Isirai̒lu. Timongolio olo helo ponao̒ palenta lei Yosua boito.

⁷ Eeya lotahuda odelei Yosua, “Tumulalo mai todulahee botie yio̒ mapowaliyo-U̒ mai taa udaa̒ tilinggula ngoilanggubu umati lo Isirai̒lu mohulumati olemu wau mongalati mao̒ deu̒ Wau̒ pee̒-pee̒enta wolemu debo odelo Wau̒ pee̒-pee̒enta wolei Musa.

⁸ Botia palentailo tomongo iimamu tamomota Bulua Daantia boito alihu tou̒ timongolio meidungga mola todutulaa, timongolio musi tumuwotao̒ ode delomo taluhu dutulaa boito wau timihulao̒ totili lobiihio.”

⁹ Lapatao̒ tei Yosua, malo tiangai tau-tauwalo Isirai̒lu, wau loloi̒ya mao̒, “Dulo dungohilo wolo upilo malentai lo Eeya Allahu Taa̒ala limongoli ode limongoli.

^10-11 Wonu bolo timongoli de momaju mota, Eeya tantu mamo polahi taulo Kanaa̒n, Het, Hewi, Peris, Girgasi, Amori wau Yebus. Wau tou̒ Bulua Daantia lo Eeya ngilanggubu aalamu mobalangao̒ Yordan meimulo woli mongoli, timongoli mamoo̒onto deu̒ Allahu Taa̒ala tatumu-tumulo woluo tohuungi mongoli.

¹² Botia mamusi timongoli molulaotao̒ mopulaa duulota – ngotaalio monto timii̒du suku bangusa lo Isirai̒lu.

¹³ De wonubolo mongo iimamu tamomotaa mao̒ Bulua Daantia lo Eeya mopodutao̒ ode delomo taluhu to Dutulaa Yordan boito, tolohu taluhio mamobunto; taluhu utolo-tolohei monto tau̒wa mamei bubulo totambati tuwau.”

^14-15 Towakutu boito donggo sembo lo polipuwalo, wau debo odelo biasaalio taluhu lo Dutulaa Yordan molepato. Tou̒ taulo Isirai̒lu lololaa mao̒ pilo tikemawa limongolio u mobalango Dutulaa Yordan, mongo iimamu lonao̒ leimulo sambela hidelowa Bulua Daantia. Wau tou̒ mongo iimamu lopodutao̒ oa̒atio ode delomo taluhu,

^16-17 tou̒ boitolo mola tolohu taluhu dutulaa boito lobunto. Molaminga mola to wimbihu tau̒wa lodutulaa, taluhio lotiwimoo̒ to Adamu, kota tuwau u dudutuulio to ambahu kota lo Sartan. Taluhu towimbihu dutulaa ambahu walungo utolo-tolohe ode Lau Mati lobunto sama-samaata, tilinggula umati lo Isirai̒lu loo̒ balangaao̒ toitaato huta u mohengu tataalua wolo kota lo Yerikho. Mongo iimamu tahi potaala Bulua Daantia boito debo hitihula tohuungo dutulaa tunggula ngoilanggubu umati lo Isirai̒lu leidungga ode ngotuali.