YOSUA 24 - KITABI HABARI MOPIOHE

Tei Yosua helo bisala ode umati lo Isirai̒lu to Sikhem

¹ Tei Yosua helongambu ngoa̒amila suku bangusa lo Isirai̒lu to Sikhem, lapatao̒ lei̒ taalua mai tahimuloa lo ulipu, tau̒wa, hakimu wau mongo polowila. Yi malonao̒ mai timongolio lotaalua wolo Allahu Taa̒ala.

² Lapatao̒ tei Yosua loloi̒ya mao̒ ode limongolio ngoa̒amila, “Dungohi mao̒ wolo u pilotahuda mai lo Eeya Allahu Taa̒ala lo Isirai̒lu ode limongoli, ‘Muloololio mai daa̒ tinenemoya limongoli lotibiluloa̒ to ngotuali lo Dutulaa Eperat, wau helolubo dewa. Tala ngota limongolio yito tei Tera, tiyamo lei Abraham wolei Nahor.

³ Lapatao̒ Wau̒ malohama olei Abraham, tiyamo loluuhurumu boito, lonto lipu to ngotuali lo Eperat boito, wau lopoa̒hu olio helo lontale ngoilanggubu lipu lo Kanaa̒n. Wau̒ longohi mai olio wali dadaata. Bohu-bohulio yilohi-U̒ mai olio tei Isihaka,

⁴ lapatao̒ tei Isihaka yilohi-U̒ mai walao̒ duulota, deu̒yito-yito tei Yako wolei Esau. Wau̒ longohi mao̒ odelei Esau hihui̒-hui̒dea lo Edom lowali huta milikiilio, bo tei Yako tiyamo loluuhurumu boito, lolimbata ode Masiri, pee̒-pee̒enta wolo mongo walai̒o.

⁵ Lapatao̒ Wau̒ malolao olei Musa wolei Haruna, wau helo podungga baala udaa̒ ode yitaato lo Masiri, lapatao̒ Wau̒ lopolualao̒ olimongoli mola lonteeto mai.

⁶ Wau̒ malodelo oli nenemoyaamu boito yilumualao̒ lonto Masiri, lapatao̒ taulo Masiri helo hilapita olimongolio wolo kaleta lo popaatea wau suludadu towadala. Wau tou̒ tinene moyaamu boito leidungga mola ode Lau Gelaga,

⁷ timongolio helo ngiibode ola-U̒ mei̒ tuulungi. Yi tambati towolota limongolio wolo tau-tauwalo Masiri boito hepilohutu mao̒ lowali lodio̒lomo, wau tilau̒be-U̒ tau-tauwalo Masiri boito wolo taluhu deheto tunggula timongolio ngoa̒amila loa̒humo. Maa ilotaawa limongoli ngoa̒amila wolo u pilohutu-U̒ ode Masiri. Lohiheo mola daa̒ timongoli helo tibiluloa̒ tohuta ohungayo u luasi daa̒.

⁸ Lapatao̒ Wau̒ lodelo mola olimongoli ode lipu taulo Amori tahi biluloa̒wa to ambahu tiimuru lo Dutulaa Yordan. Timongolio heloluhu olimongoli, bo Wau̒ helo poo̒haama olimongoli toli mongolio.

⁹ Lapatao̒ olongia lo Moab, deu̒yito-yito tei Balak walae̒e Jipor, helo luwali olimongoli. Tio malolao tau odelei Bileam walae̒e Beor wau lei̒ laa̒anati olimongoli.

¹⁰ Bo Wau̒ diila lodudua̒ hilaa lei Bileam, yi tio bo lobalakati olimongoli. Odi-odieelo mola Wau̒ lopoa̒ahu olimongoli lonto olei Balak.

¹¹ Lapatao̒ timongoli lobalango Dutulaa Yordan, wau malei dungga to Yerikho. Tau-tauwalo Yerikho heloluhu olimongoli, odito olo taulo Amori, taulo Peris, Kanaa̒n, Het, Girgas, Hewi wau taulo Yebus. Bo Wau̒ longohi mai olimongoli loo̒haama toli mongolio ngoa̒amila.

¹² Tou̒ timongoli lomaju heloluhu olimongolio, Wau̒ lohutu mai olimongolio lowali lolingu wau yiloohe, tilinggula olongia duulota boito tilumetea̒ lonto olimongoli. Diila wamilumu wau olo diila panamu u lopoo̒haama olimongoli.

¹³ Huta uilohi-U̒ mai olemu, tilolimo limongoli lou̒ diila lotibule daa̒. Wau kokoo-tawaalo uilohi-U̒ mai olimongoli diila timongoli talo potihulao̒. Bo botia timongolilo tamo tibiluloa̒ mola teto, wau timongolilo tamolaasa mao̒ hungo lo angguru wau hungo lo jaitunilio, lebe-lebe pomao̒ diila timongoli tahe lopomulo mao̒.’ ”

¹⁴ “Oditolio,” ualei Yosua wumbutio mola, “hulumatiyalo Eeya. Potiwatolo to Eeya wolo ihilasi boli tatapu wau molotolo hilao. Yinggila mao̒ ila-ila wewo u hetilubo linenemoyaamu muloololio mai to Mesopotamia wau Masiri. Potiwatolo bo to Eeya wambao̒.

¹⁵ Humayaalio timongoli diila mohuto motiwato to Eeya, pohamaalo putuusani to dulahulo botie deu̒ to olo tatoonu timongoli ohilaa motiwato to ila-ila wewo u hetilubo linene moyaamu muloololio mai to Mesopotamia meaalo to ila-ila taulo Amori u lipulio tatambati olimongoli botia. Bo amiaatia – watia wau ngaalaa̒ lowatia – mamotiwato bo to Eeya wamabao̒.”

¹⁶ Yi umati lo Isirai̒lu boito lolametao̒, “Ami sama-samaata diila tamololaa to Eeya u motiwato to ila-ila wewo!

¹⁷ Eeya Allahu Taa̒alaantolo tahe lolopato mongo loluuhurunto wau ito lohihilao lonto polowato to Masiri. Ito maloo̒onto ngoa̒amila moo̒linggolabe u pilohutu lo Eeya. Laito Eeya hemoduo̒lai olanto todelomo nonao̒onto, lumaode to lilii-puwaalo deli.

¹⁸ Wau tou̒ ito tulumuwotai ode lipu botie, Eeya lopolahi taulo Amori tahi biluloa̒wa tewe. Oditolio, amiaatia ohilaa motiwato to Eeya, sababu Tioolo Allahu Taa̒alanto!”

^19-20 Lapatao̒ tei Yosua loloi̒ya, “Bo timongoli otanu diila tamambo motiwato to Eeya, sababu Tio Allahu Taa̒ala tamantali, Taa Laba-labaalo Tuwaulo. Tio diilo mohuto o tuwaliilio. Wonu timongoli mololaa mao̒ o-Lio wau motiwato to ila-ila wewo, yi Tio diila tamo ngambungu dusa limongoli. Bolii̒o mao̒, Tio mamoluwali wau mohukuumani mai olimongoli. Tio mamopo binasa olimongoli, eleponu muloololio mai Tio mopiohe toli mongoli.”

²¹ Yi tau-tauwalo Isirai̒lu boito lolametao̒, “Diila! Amiaatia diila tamotiwato to ila-ila wewo. Amiaatia mamotiwato bo to Eeya wambao̒!”

²² Lapatao̒ tei Yosua loloi̒ya mao̒, “Naa, timongoli lohihilaolo sakusiilio deu̒ timongoli malolantu u motiwato bo to Eeya wambao̒.” “Otutu,” uali mongolio, “Amiaatia lohihilaolo sakusiilio.”

²³ “Wonu odito, yinggilalo ila-ila lo babaa-ngusawalo wewo u woluo toli mongoli boito,” ualei Yosua, “wau podantilo deu̒ timongoli matatapu wau molotolo hilao to Eeya, Allahu Taa̒ala lo Isirai̒lu.”

²⁴ Lapatao̒ tau-tauwala boito loloi̒ya mao̒ odelei Yosua, “Amiaatia mamotiwato bo to Eeya, Allahu Taa̒alanto. Amiaatia mamo dungohe totoonulalo palentaa-Lio.”

²⁵ Yi todulahee boito tei Yosua to Sikhem lohutu daantia wolo umati lo Isirai̒lu; wau mota teto tio helongohi bubuu-too̒waalo wau u musi dungohe limongolio.

²⁶ Ngoa̒amila butoo̒ wau wuwuu-uduwaalo boito tiluladio todelomo buku Butoo̒ lo Allahu Taa̒ala. Lapatao̒ tio lohama mao̒ botu uleidaa̒ tuwau, tulusi lopo tihulao̒ to walungo bungo lo ayu uleidaa̒ totambati u tolomodu ode Eeya.

²⁷ Lapatao̒ uito malo loi̒ya tei Yosua ode taa ngoa̒amila boito, “Botu botie mowali sakusi olanto. Ngoa̒amila tataa-heyaalo u yilapali mai lo Eeya ode olanto, mailapali totalu lobotu botie. Oditolio, botu botieelo u mamowali sakusi toli mongoli, u mopoe̒elao̒ olimongoli alihu timongoli diila moluwali to Allahu Taa̒ala limongoli.”

²⁸ Pulitio mao̒ tei Yosua lopoa̒hu totau-tauwalo boito lohualinga; lapatao̒ timongolio ngoa̒amilalo malo hualinga ode huta limongolio ngota-ngota.

Tei Yosua wolei Eleajar yilate

²⁹ Lapatao̒ tei Yosua walae̒e Nun wato lo Eeya boito, yilate to umulu ngohetuto mopulu lotaunu.

³⁰ Tio yilobungio tohuta milikiilio lohihilao to Timnat-Sera to hihui̒-hui̒dea lo Epraim ambahu tilayo lo Hui̒dee Gaas.

³¹ Ngotilonggadu tei Yosua tumu-tumulo, umati lo Isirai̒lu hemotiwato to Eeya. Wau tou̒ tei Yosua yilate mao̒ olo timongolio debo hemotiwato to Eeya ngotilonggadu donggo woluo towolota limongolio mongo tau̒wa tamalo sakusi lohihilao totoonulalo hitua-tuawaua u pilohutu lo Eeya ode umati lo Isirai̒lu.

³² Milate lei Yusu u dilelo mai lo umati Isirai̒lu lonto Masiri, yilobungio to Sikhem tohuta u matilali mao̒ lei Yako ngohalaga ngohetuto doi talaa̒ lonto mongo walae̒e Hemor, tiyamo lei Sikhem. Huta boito pilopo walisiilio ode wali mola lei Yusu.

³³ Lapatao̒ tei Eleajar walae̒e Haruna olo yilate, wau yilobungio to Gibea, deu̒yito-yito kota u dudutuulio tolipu hihui̒-hui̒dea lo Epraim. Kota boito mailohi odelei Pinehas, walae̒e Eleajar. 1