YOSUA 23 - KITABI HABARI MOPIOHE

Pidato polobua̒ya lei Yosua

¹ Lohiheo mola lapatio mao̒ Eeya longohi mai u aamani ode umati lo Isirai̒lu; timongolio diilalo hepiluyu lo aanjamu musu. Tou̒ boito tei Yosua mapanggola daa̒.

² Yi tio malo tiangai ngoa̒amila umati lo Isirai̒lu, wau olo tahimuloa lo ulipu, mongo tau̒wa, mongo hakimu, wau mongo polowila, lapatao̒ loloi̒ya mao̒, “Botia watia mapanggola daa̒.

³ Timongoli maloo̒onto totoonulalo hitua-tuawua upilohutu mai lo Eeya Allahu Taa̒ala limongoli ode ngoa̒amila bangusa tewe domi olimongoli. Talo lohipate ode limongoli yito Eeya Allahu Taa̒ala limongoli lohihilao.

⁴ Huta lo babaa-ngusawalo u donggo leitolaa, odito olo huta lo ngoa̒amila bangusa tamaa ilolaahe lowatia, deu̒yito-yito ubua̒-bua̒ade monto ambahu tiimuru lo Dutulaa Yordan tulusi ode otolopa demola Lau Tenga, ngoa̒amilalo boito matilayadei lowatia ode limongoli u lowali miliki limongoli.

⁵ Eeya Allahu Taa̒ala limongoli mamohutu mai babaa-ngusawalo boito matumouli, wau molahi monto olimongoli wonu timongoli mota moluhu olimongolio. Timongoli mamotolo miliki mao̒ lipu limongolio, debo odelo u madilanti mai lo Eeya Allahu Taa̒ala limongoli ode limongoli.

⁶ Sababu uito, poo̒dahailo alihu timongoli modungoheo̒ wau moponao̒ ngoa̒amila utula-tuladee todelomo Buku Butoo̒ lei Musa. Diila mao̒ lambanga penu boli tuwau mao̒ monto bubuu-too̒waalo boito.

⁷ Lou̒ odito timongoli diila tamo ulauwa wolo babaa-ngusawalo tadonggo hibiluloa̒wa towolota limongoli. Timongoli diila tamolapali tanggulo dedee-waalo limongolio meaalo motadia to tanggula boito. Wau olo diila moi̒baadati meaalo mosujudu to dedee-waalo boito.

⁸ Timongoli tumbao̒ musi debo molotolo hilao to Eeya, debo odelo u mapilohutu limongoli tunggula botia.

⁹ Babaa-ngusawalo uleidaa̒ wau molotolo mapilo polahi lo Eeya domi olimongoli; diaaluo penu boli ngotaa mao̒ limongolio tamambo molaahangi moluwali olimongoli.

¹⁰ Ngota-ngota towolota limongoli mowali mopo olaaheo̒ lihua lota, sababu Eeya Allahu Taa̒ala limongolilo tamopaatea domi olimongoli, debo odelo u mapilo danti-Lio.

¹¹ Sababu uito, eelai mao̒ u motolia̒nga to Eeya Allahu Taa̒ala limongoli.

¹² Wonu timongoli diila tatapu wau molotolo hilao wau timongoli mou̒ulauwa wolo babaa-ngusawalo tadonggo hibiluloa̒wa towolota limongoli, wau timongoli monika woli mongolio,

¹³ eelai mao̒, tantu Eeya Allahu Taa̒ala limongoli diila tamo polahi babaa-ngusawala boito poli domi olimongoli. Bolii̒o mao̒, timongolio mamoo̒ topotala daa̒ olimongoli, sababu timongolio mamowali debo odelo taalo meaambo debo odelo hentobu ode limongoli. Timongolio olo mamo pohutu olimongoli modutolaa daa̒; sababu timongolio mamowali debo odelo buuboo̒ towulea limongoli meaalo debo odelo duhi todelomo matomu. Timongoli matulusi modutolaa tunggula diaaluo penu boli ngotaa mao̒ towolota limongoli tameitolaa tolipu u mopiohe botie uilohi mai lo Eeya Allahu Taa̒ala limongoli ode limongoli.

¹⁴ Botia mawakutuulio watia mate. Timongoli ngoa̒amila ngota-ngota motota otutu deu̒ Eeya Allahu Taa̒ala limongoli malongohi mai ode limongoli totoonulalo u mopiohu u dilanti-Lio mai. Timii̒du danti-Lio mai̒lelaa-Lio mai, diaaluo penu boli tuwau mao̒ u diila.

¹⁵ Bo debo odelo woloolo mola Tio moe̒elai timii̒du danti-Lio ode limongoli, odito olo Tio tantu mamoponao̒ timii̒du aanjamu-Lio olimongoli.

¹⁶ Wonu bolo timongoli molambanga daantia u mapiloa̒hu olimongoli lo Eeya Allahu Taa̒ala imongoli alihu dungohelo, wau timongoli mota moi̒baadati to ii̒i-lawaalo wewo wau molubo mao̒ ii̒i-lawaalo boito, yi Eeya mamo muluka, wau mohukuumani mai olimongoli. To delomo wakutu u ngoi̒ntalo mola timongoli mabinaasa monto lipu u mopiohe botie, uilohi mai lo Eeya ode limongoli.”