YOSUA 22 - KITABI HABARI MOPIOHE

Susuu-kuwaalo tomadala tiimuru luli pilei̒ walinga ode madalalio

¹ Lapatao̒ tei Yosua lotiangai tau-tauwalo lonto suku Ruben, Gad wau ngotayadu suku Manasye tato ambahu tiimuru lo Dutulaa Yordan,

² tulusi loloi̒ya mao̒ olimongolio, “Timongoli malohutu totoonulalo hitua-tuawua u piloa̒hu lei Musa olimongoli, wato lo Eeya boito. Wau timongoli olo malo dungohe ngoa̒amila palentaau̒.

³ Ngotilonggadu botie diila pee̒enta mao̒ timongoli helo poluli mongo wutatumu taulo Isirai̒lu wewolio helo hipate tutuuwau. Timongoli malo dungohe papaa-lentawalo Eeya Allahu Taa̒ala limongoli lou̒ tio̒otutua.

⁴ Yi lotuuu̒de wolo danti-Lio, Eeya Allahu Taa̒ala limongoli malongohi mai u aamani ode mongo wutati mongoli, taulo Isirai̒lu wewolio. Oditolio, botia pohualingolo mota ode madala limongoli lohihilao to ambahu tiimuru lo Dutulaa Yordan boito u omoo̒omolu yilohi lei Musa ode limongoli.

⁵ Wau poo̒dahailo alihu timongoli modungohe butoo̒ upiloa̒hu lei Musa ode limongoli, deu̒yito-yito: Potolia̒ngolo mola to Eeya Allahu Taa̒ala limongoli, poduduo̒lo tou̒ otohilaa-Lio, podungohulo to papaa-lentaa-Lio, poti tatapulo wau molotolo hilao to Olio, wau potiwatoolo to Olio wolo lealeaatu lo hilaamu wau wolo lealeaatu lo jiwamu.”

^6-9 Lapatao̒ tei Yosua malo balakati olimongolio wau lopoluli mao̒ olimongolio luli lohualinga mota ode madalalio lou̒ longohi mao̒ tahuli botie, “Timongoli masaatia kaya wau timongoli muli mohualinga lou̒ modelo mota dadaata bibiahu, talaa̒, hulawa, tombaha, wate wau pakeyangi. Oditolio taya-tayade mao̒ olo tilapulo u yilambatai limongoli boito ode tau-tauwalo ngosuku woli mongoli uwewo.” Yi suku Ruben, Gad, wau suku Manasye tato ambahu tiimuru lo Yordan boito malo lolaa mao̒ taulo Isirai̒lu wewolio, tulusi lomonggato lonto Silo to Kanaa̒n lotidulunga ode huta limongolio lohihilao tomadala lo Gilead. Timongolio lotibiluloa̒ tohuta boito to palenta lo Eeya lotimbulude olei Musa. (Ngotayadu losuku Manasye malo lolimo mao̒ lonto olei Musa, huta to ambahu lo Dutulaa Yordan, wau ngotayadu losuku Manasye wewolio helo lolimo lonto olei Yosua huta to ambahu otolopa lo Dutulaa Yordan pee̒-pee̒enta wolo susuu-kuwaalo uwewo.)

Mesba totili lo Dutulaa Yordan

¹⁰ Tou̒ suku Ruben, Gad, wau suku Manasye to tiimuru lo Yordan boito leidungga to Gelilot – donggo to ambahu otolopa lo Dutulaa Yordan – timongolio lopo tihulao̒ mesba tuwau u leidaa̒ wau gaaga totili lodutulaa.

^11-12 Tau-tauwalo Isirai̒lu wewolio loo̒dungohe timongota lobangusa limongolio helo loi̒ya, “Tau-tauwalo suku Ruben, Gad wau suku Manasye totiimuru lo Yordan malo potihulao̒ mesba tuwau to Gelilot membideo̒ lo Dutulaa Yordan to wimbihu madalanto!” Yi timongolio ngoa̒amila lotia̒mbu to Silo ohilaa moluhu susuu-kuwaalo Isirai̒lu to towimbihu tiimuru lo Dutulaa Yordan boito.

¹³ Lapatao̒ tei Pinehas walai̒ Iimamu Eleajar, yilaolio mota lo umati Isirai̒lu ode suku Ruben, Gad, wau suku Manasye tato madala lo Gilead ambahu tiimuru lo Yordan.

¹⁴ Pee̒-pee̒enta wolei Pinehas olo lomonggato mopulu lota tahimuloa lolipu bangusa lo Isirai̒lu, – ngotaalio lonto timii̒du suku to ambahu otolopa lo Dutulaa Yordan, ngota-ngota yito tau̒wa lou̒ ngaalaa̒ todelomo suku limongolio.

¹⁵ Yi malei dungga mota timongolio totambati losuku Ruben, Gad wau suku Manasye tomadala lo Gilead.

¹⁶ Lapatao̒ to tanggulo ngoilanggubu umati lo Eeya, timongolio loloi̒ya mao̒ ode tau-tauwalo lonto suku Ruben, Gad wau suku Manasye boito, “Yilongola timongoli helohutu sua̒li u moleeto botie ode Allahu Taa̒ala lo Isirai̒lu? Wolo lomongu mao̒ mesba limongoli lohihilao, timongoli malo luwali to Eeya! Timongoli diilalo loduduo̒ totoonulalo palentaa-Lio!

¹⁷ Wolo timongoli diilalo loe̒ela mola dusaanto to Peor? Tou̒ boito ito hilukuumani lo Eeya wolo wembelo tuwau, eleponu ito botie umati-Lio lohihilao! Tunggula botia ito donggo hibantawa akibatilio. Wolo uito diipo ee̒enggade olo?

¹⁸ Wau botia wolo timongoli ohilaa poli mobulemenga to Eeya? Wonu todulahee botie timongoli moluwali, loombu Tio mamo muluka mai to ngoilanggubu umati lo Isirai̒lu.

¹⁹ Wonu madalamu boito najisi wau diila patuti u powaliyolo tambati potabiyalo ode Eeya, yi polimbatolo mai odia ode madala lo Eeya, tou̒toonu o Kema lo Eeya. Pohileaalo ngotayadu madala lami, bo diila mao̒ poluwali to Eeya meaalo moluwali olami wolo moduhengao̒ mesba tuwau uwewo, hiambola mawoluo mesba lo Eeya Allahu Taa̒alanto.

²⁰ Eelailo mola, tei Akhan walae̒e Jerah tou̒ tio diila lohuto loduduo̒ palenta lo Eeya tomimbihu babaa-langiyalo u musi pobinasaalo, wau wolo akiibatilio? Ngoilanggubu umati lo Isirai̒lu hilukuumani! Tao̒dusa bo tei Akhan, bo tailate diila bo tio wambao̒!”

²¹ Lapatao̒ tau-tauwalo suku Ruben, Gad wau Manasye to ambahu tiimuru boito lolametao̒,

²² “Taa Laba-labaala kawasa yito Eeya! Otaawa lo Eeya yilongola ami helohutu sua̒li botie, otohilaa lami olo alihu otaawa mao̒ limongoli! Humayaalio ami mohutu sua̒li boito wolo makusudu moluwali to Eeya meaalo kalana ami diilalo palacaya to Olio, yi huliilo mai ami mateelo mola botia!

²³ Eeya lohihilao tamo hukuumani mai olami, wonu ami o makusudu moluwali to Eeya wau mopotihulo mesba lami lohihilao u podewowalo bake yilalango meaalo bake lopale meaalo bake posahabatialo toitaatio.

²⁴ Diila maa uito makusudu lami, Mongo wutato! Ami mopotihulo mesba boito, sababu ami molawalo de todulahee momooli wali mola limongoli mamoloi̒ya ode wali mai lami, ‘Timongoli diila owumbuta lolo-loolo wolo Eeya, Allahu Taa̒ala lo Isirai̒lu!

²⁵ Bilohilo, Tio malopo tambati mai Dutulaa Yordan botie to huungonto tumbao̒ mopobua̒ya mao̒ olami woli mongoli tau-tauwalo Ruben wau Gad. Otutu timongoli diila owumbuta lolo-loolo wolo Eeya.’ Yi wolo u de mamotoduo mai? Tantuulo mao̒ wali limongolio mamohutu mao̒ wali lami mohuheli moi̒baadati ode Eeya.

²⁶ Oditolio, ami mopotihulao̒ mesba, diila duo̒lo bake yilalango meaalo ode dedee-wowaalo lami,

²⁷ bo u mowali tuoto ode olanto mohu-mohualia, wau ode walinto mola todulahee momooli, deu̒ otutu ami botie hipo ibaadatia to Eeya to Kema Owoluwoa-Lio wolo helodelo bake yilalango, dedee-wowaalo wau bake polo sahaabati. Lou̒ odito wali mola limongoli diila tamoloi̒ya wali mai lami owumbuta lolo-loolo wolo Eeya.

²⁸ Oditolio, makusudu lami yito: humayaalio wali mola limongoli odito, yi wali mai lami mowali moloi̒ya, ‘Bilohilo mao̒ mesba boito! Nenemoya lami helo potihulao̒ mesba tuwau u tutuuwauwa wolo mesba lo Eeya, diila ode bake yilalango meaalo ode dewo, bo u mowali tuoto ode olanto mohu-mohualia.’

²⁹ Poyakinilo, ami diila mohuto moluwali to Eeya meaalo mohuheli motiwato to EEYA lou̒ moduhengao̒ mesba wewo ode bake yilalango meaalo bake lopale meaalo ode dewo, hiambola mesba lo Eeya Allahu Taa̒alanto mawoluo totalu lo Kema Owoluwoa lo Eeya.”

³⁰ Ngoa̒amila u tilombanga lotau-tauwala lonto suku Ruben, Gad wau suku Manasye to ambahu tiimuru boito dilungohe mao̒ li Iimamu Pinehas wolo opulu lota tahimuloa lo ulipu lo Isirai̒lu lonto wimbihu otolopa lo Dutulaa Yordan. Yi timongolio olo ilolulia lohilao wolo tombanga boito.

³¹ Lapatao̒ ualei Pinehas, walai̒ Iimamu Eleajar, ode tau-tauwalo suku Ruben, Gad wau Manasye Tiimuru, “Botia ilotaawa mao̒ lami deu̒ Eeya wolanto, sababu timongoli diila moluwali Olio. Timongoli malo poa̒ahu umati lo Isirai̒lu lonto hukuumani lo Eeya.”

³² Lapatao̒ uito malo monggato tei Pinehas wolo tahimuloa lou̒ lipu lo Isirai̒lu boito. Timongolio lololaa mao̒ tau-tauwalo Ruben wau Gad boito to Gilead, tulusi luli lohualinga ode Kanaa̒n, lapatao̒ lopo duloheo̒ palakala boito ode umati lo Isirai̒lu.

³³ Yi umati lo Isirai̒lu olo ilolulia lohilao wolo sua̒li boito, tilinggula timongolio helomuji-muji to Allahu Taa̒ala. Timongolio diilalo lobisala pasali lo makusudu limongolio u moluhu tau-tauwalo Ruben wau Gad, wau u mopobinasa lipulio.

³⁴ Pulitio suku Ruben wau Gad boito loloi̒ya, “Mesba botie mowali sakusi olanto ngoa̒amilalo deu̒ Eeya yito Allahu Taa̒ala.” Yi timongolio longunte mao̒ mesba boito “Sakusi”.