YOSUA 21 - KITABI HABARI MOPIOHE

Kokoo-tawaalo ode suku Lewi

^1-2 Todulahee tuwau mongo tau̒wa lou̒ ngaalaa̒ losuku Lewi lonao̒ mota ode Silo tolipu lo Kanaa̒n, wau lodudulao̒ odeli Iimamu Eleajar, wolei Yosua walae̒e Nun, wau mongo tau̒wa ngaalaa̒ lo ngoilanggubu susuu-kuwaalo bangusa lo Isirai̒lu. Timongolio loloi̒ya mao̒, “Lotimbuludei olei Musa, Eeya malo poa̒hu alihu to olamiaatia, wau tau-tauwalo Lewi, wohiyalo kokoo-tawaalo u mowali potibiluloa̒ lamiaatia wau huhuu-tawaalo huta datahu wau luasi topalito kokoo-tawaalo boito ode bibiahu lamiaatia.”

³ Yi taulo Isirai̒lu lodudua̒ao̒ palenta lo Eeya. Lonto huta miliki limongolio lohihilao, heilohi limongolio ode taulo Lewi kokoo-tawaalo utantu-tantu wolo huhuu-tawaalo hutalio datahu wau luasi.

⁴ Tabohu-bohulio helo lolimo kokoo-taalio yito ngangaa-laa̒awaalo kaumu Kehat todelomo suku Lewi. Ngangaa-laa̒awaalo wali mai li Iimamu Haruna yilohia kota mopulaa totolu lonto madala losuku Yehuda, suku Simeon wau Benyamin.

⁵ Ngangaa-laa̒awaalo wewolio lonto kaumu Kehat yilohia mopuulo kota lonto madala losuku Epraim, suku Dan wau suku Manasye tato ambahu otolopa lo Dutulaa Yordan.

⁶ Kaumu Gerson loo̒tapu mopulaa totolu kota lonto madala losuku Isakhar, Asyer, Naputali wau suku Manasye tato ambahu tiimuru lo Dutulaa Yordan.

⁷ Ngangaa-laa̒awaalo kaumu Merari loo̒tapu mopulaa dulo kota lonto madala lo suku Ruben, Gad wau Jebulon.

⁸ Odi-odieelo mola taulo Isirai̒lu helo laya-layadeo̒ kokoo-tawaalo boito wolo huhuu-tawaalo lohutalio datahu wau luasi loli undiani totau-tauwalo Lewi, debo odelo upiloa̒hu lo Eeya lotimbulude olei Musa.

Kokoo-tawaalo ode kaumu Kehat

^9-19 Monto kaumu Kehat todelomo suku Lewi, mongo iimamu wali mai lei Harunalo tabohu-bohulio mololimo kokoo-taalio; timongolio yilohia kota mopulaa totolu wolo huhuu-tawaalo hutalio datahu wau luasi. Monto suku Yehuda wau Simeon, timongolio lololimo tio kota, deu̒yito-yito: Libna, Yatir, Estemoa, Holon, Debir, Ain, Yuta, Bet-Emes wau Arba, u ilunte lodudua̒ tanggulo liyamo lei Enak. Kota boito, u masaatia ilunte Hebron, deu̒yito-yito kota tuwau potiduo̒lalo to hihui̒-hui̒dea lo Yehuda. Hahaa-laboluwalo wau kakaa-mbunguwalo kota botie mailohi odelei Kale walae̒e Yepune u lowali huta milikiilio. Monto suku Benyamin timongolio lololimo wopato kota, deu̒yito-yito: Gibeon, Geba, Anatot wau Almon.

^20-26 Ngangaa-laa̒awaalo wewolio lonto kaumu Kehat yilohia kota mopulu wolo huhuu-tawaalo hutalio datahu wau luasi. Lonto suku Epraim timongolio lololimo wopato kota, deu̒yito-yito: Bet-Horon, Kibjaim, Gejer wau Sikhem, kota tuwau potiduo̒lalo to hihui̒-hui̒dea lo Epraim. Lonto suku Dan timongolio lololimo wopato kota, deu̒yito-yito: Elteke, Gebeton, Ayalon wau Gat-Rimon. Lonto suku Manasye tato ambahu otolopa timongolio lololimo duluo kota, deu̒yito-yito: Taanakh wau Gat-Rimon.

Kokoo-tawaalo ode kaumu Gerson wau Merari

^27-33 Kaumu tuwau wewolio todelomo suku Lewi yito kaumu Gerson. Ngangaa-laa̒awaalo todelomo kaumu Gerson boito yilohia mopulaa totolu kota wolo huhuu-tawaalo hutalio datahu wau luasi. Lonto suku Manasye tato ambahu tiimuru timongolio lololimo duluo kota, deu̒yito-yito: Beestera wau Golan, kota tuwau potiduo̒lalo tomadala Basan. Lonto suku Isakhar timongolio lololimo wopato kota, deu̒yito-yito: Kisyon, Dobrat, Yarmut wau En-Ganim. Lonto suku Asyer timongolio lololimo wopato kota, deu̒yito-yito: Misal, Abdon, Helkat wau Rehob. Lonto suku Naputali timongolio lololimo totolu kota, deu̒yito-yito: Hamat-Dor, Kartan wau Kedes, kota tuwau potiduo̒lalo to Galilea.

^34-40 Kaumu tai̒lo labita todelomo suku Lewi, deu̒yito-yito kaumu Merari yilohia mopulaa duulo kota wolo huhuu-tawaalo hutalio datahu wau luasi. Lonto suku Jebulon timongolio lololimo wopato kota, deu̒yito-yito: Yokneam, Karta, Dimna wau Nahalal. Lonto suku Ruben timongolio lololimo wopato kota, deu̒yito-yito: Bejer, Yahas, Kedemot wau Mepaat. Lonto suku Gad timongolio lololimo wopato kota, deu̒yito-yito: Mahanaim, Hesybon, Yaejer wau Ramot, kota tuwau potiduo̒lalo to Gilead.

^41-42 Oditolio huhuu-tawaalo u mililiki lo noilanggubu bangusa lo Isirai̒lu woluo ngojumula wopato pulaa walu lokota wolo huhuu-tawaalo hutalio datahu wau luasi topalitio uilohi mao̒ ode tau-tauwalo Lewi.

Kanaa̒n lowali miliki umati lo Isirai̒lu

⁴³ Odi-odieelo mola Eeya helongohi mai ode umati lo Isirai̒lu ngoilanggubu huta u mapilo danti-Lio wolo tadia odeli nenemoya limongolio. Lapatao̒ lotihuloa̒ao̒ tolipu boito, umati lo Isirai̒lu malo titatapu mola teto.

⁴⁴ Yi lotuuu̒de lou̒ wolo u dilanti mao̒ lo Eeya odeli nenemoya limongolio, lipu boito aamani sababu diluo̒ola lo Eeya. Mumuu-suuwaalo limongolio diaaluo penu boli ngotaa mao̒ tamoo̒ tuwali olimongolio, sababu Eeya helo poo̒haama taulo Isirai̒lu to ngoa̒amila musu limongolio.

⁴⁵ Eeya moe̒elai timii̒du danti-Lio to umati lo Isirai̒lu; diaaluo penu boli tuwau mao̒ udiila ileelaa-Lio mai.