YOSUA 2 - KITABI HABARI MOPIOHE

Tei Yosua longutolia taa u motulete lou̒ poo̒-poo̒oyo ode Yerikho

¹ Lapatao̒ lonto polokemawa to Sitim, tei Yosua longutolia taa u motulete lou̒ poo̒-poo̒oyo taduulota ode Kanaa̒n. Taduulota boito pilei̒ tuletealio lipu lo Kanaa̒n wolo tua̒ao̒-tua̒ao̒ lebe-lebe daa̒ kota lo Yerikho. Yi malonao̒lo timongolio ode kota boito, wau lotihui to bele lotaabua ngota tasuuntali, tai̒lunte Rahab.

² Ti olongia kota lo Yerikho loo̒dungohe deu̒ tou̒ hui boito woluo taulo Isirai̒lu lonao̒ mai motulete lou̒ poo̒-poo̒oyo madala lo Yerikho.

³ Yi ti olongia malolao tau odeli Rahab mota lopo tunggulao̒ palenta botie, “Polontula mao̒ taa u helotihui to belemu boito. Timongolio yito taa u tiluugasia motulete lou̒ u mai motulete ngoilanggubu madala lo Yerikho!”

^4-6 “Memangi woluo talonao̒ mai ode bele lowatia,” tametao̒ li Rahab, “bo diila otaawa lowatia lonto utoonu timongolio. Timongolio maa yilumualao̒ engontie tou̒ mamo dio̒lomai tou̒ hulubangi lokota diipo hileu̒talio. Wau watia diila lohintu mao̒ wonu made utoonu timongolio, bo wonu timongolio hua̒a yilapitalo mota, tanu donggo oilapita.” (Lebe-lebe pomao̒ ti Rahab maloluuo̒ taa u motulete lou̒ poo̒-poo̒oyo taduulota boito towalungo huuntua lolaato topahu lobelelio.)

⁷ Yi malo monggato mongo utolia li olongia boito lololaa mao̒ kota. Tou̒ timongolio mato bulemengio, hulubangi lokota hileu̒talio. Yiloloohi mongolio tatilugasia motulete lou̒ poo̒-poo̒oyo taduulota boito demola tambati pobalangalo to Dutulaa Yordan.

⁸ Hui boito tou̒ tatilugasia motelete lou̒ poo̒-poo̒oyo taduulota lo Isirai̒lu boito diipo lotuluhu, ti Rahab malo botulaa mola ode pahu,

⁹ wau loloi̒ya mao̒ olimongolio, “Otaawa lowatia deu̒ Eeya malohudu mai lipu botie ode limongoli. Ngoa̒amila taatewe moohe olimongoli.

¹⁰ Amiaatia maloo̒ dungohu habari tomimbihu woloolo mola Eeya helo pohengu Deheto Gelaga totalu limongoli, tou̒ timongoli lololaa mao̒ Masiri. Amiaatia olo maloo̒ dungohu woloolo mola timongoli helomate yila-yilateelo mao̒ olei Sihon wolei Og, ti olongia duulota bangusa lo Amori boito to ambahu tiimuru lo Dutulaa Yordan.

¹¹ Odito ilodungohe lamiaatia wungguli boito, amaatia mailoohe daa̒. Ngoa̒amila tau-tauwalo lamiaatia madiduu̒ obuheliilio sababu timongoli. Eeya Allahu Taa̒ala limongoli otutu Allahu Taa̒ala Taa Laba-labaalo kawasa tohulungo wau todunia.

^12-13 Harapuo lowatia timongoli mohuto motadia domi tanggu-Lio deu̒ timongoli mamopohutu mao̒ ngaalaa̒ lowatia lou̒ mopiohu debo odelo u mapilohutu lowatia olimongoli. Podantilo mai deu̒ tiilo wau tiyamo lowatia, mongo wutato lowatia diila tapatee limongoli mate-mateelo mao̒, bo maduo̒la limongoli. Wau woleeto boito wohiyalo mai tuoto tuwau odelo pongaku deu̒ timongoli mowali palacaya mao̒ lowatia!”

¹⁴ Yi tametao̒ lo taduulota boito, “Ami mamodanti mai deu̒ wonu bolo Eeya mamohudu mai lipu botie olami, ami mamopohutu mao̒ olimongoli lou̒ mopiohu, asali yio̒ diila mohungguli penu boli olita pasali olami. Huliilo mao̒ de Eeya molaa̒anati mai olami wonu ami diila moe̒ela danti boito.”

¹⁵ Sababu bele li Rahab bilongulio toitaato dingingo meeseli lokota, yi ti Rahab malopo tuhuta mola taduulota boito wolo tali loli tutuloa.

¹⁶ “Ponao̒lo mola ode lipu hihui̒-hui̒dea,” uali Rahab mao̒ olimongolio, “Alihu tau-tauwalo tailao mai li olongia boito diila moo̒ wau̒paa olimongoli. Potituo̒olo mota teto ngotilonggadu tolohui mola tunggula timongolio mohualinga, deu̒yito timongoli mowali mopo tolonga mola lononao̒ limongoli.”

¹⁷ Taduulota tatilugasia motulete lou̒ poo̒-poo̒oyo boito loloi̒ya odeli Rahab, “Ooo̒, ami mamoe̒ela danti umaa pilohilemu lonto olami boito.

¹⁸ Bo uti-utieelo wamabo̒ u musi pohutuwomu mao̒. Wonu ami de moluhu mai lipumu, mamusi tali meela botie pongawadumu mao̒ to tutuloa botie tambati u pilolaahumu mola olami. Tiilo wau tiyamamu, mongo wutatumu, ngoa̒amila kaumu ngaalaa̒ liyamamu mamusi ambuwomu tobelemu botie.

¹⁹ Wonu tala ngota limongolio lumualao̒ monto bele botie wau mate opateaalio mate-mateelo mao̒, yi opopatelio yito totalaalio lohihilao; ami to bulemengo losua̒li boito. Bo wonu woluo tao̒dungga lo topotala todelomo bele botie, yi ami-amiilo tatimihulao̒ tosua̒li boito.

²⁰ Bolii̒o mao̒, wonu timongoli mopoo̒taa mao̒ pasali lami ode tahingota-ngotaawa, yi ami diilalo leitihuto todanti umaa pilohilemu lonto olami.”

²¹ Ti Rahab akolo tosua̒li boito tulusi malo poluli mao̒ timongolio lonao̒. Lapatao̒ tio lopo tihutao̒ tali boito to tutuloalio.

²² Yi malonao̒ taduulota tatilugasia motulete lou̒ poo̒-poo̒oyo boito ode lipu hihui̒-hui̒dea wau malo tituuo̒ mola teto. Tolo hui mola hiheolio mongo utolia li olongia helo lolohe olimongolio penu boli ode utoonulalo mao̒ to ngoilanggubu lipu boito, bo diila loo̒dungga olimongolio. Pulitio mao̒ mongo utolia boito luli lohualinga mota ode Yerikho.

²³ Lapatao̒ taduulota lo Isirai̒lu tatilugasia motulete lou̒ poo̒-poo̒oyo boito lotuhutai lonto hihui̒-hui̒dea wau lobalangao̒ dutulaa, tulusi timongolio luli lohualinga odelei Yosua. Ngoa̒amila u helotoduo toli mongolio, pilopo duloheo̒ limongolio to olio.

²⁴ Lapatao̒ timongolio maloloi̒ya, “Tantuulo mao̒ Eeya mongohi mai ngoilanggubu lipu boito ode olanto; ngoa̒amila taa mola teto moohe olanto.”