YOSUA 19 - KITABI HABARI MOPIOHE

Madala utilunu mao̒ ode suku Simeon

¹ Totayadu oluolio yito huta ode ngangaa-laa̒awaalo todelomo suku Simeon. Pilito huta limongolio tuwotuwoto demola sipatana miliki losuku Yehuda.

^2-6 Timongolio yilohialio mopulaa tolo kota u wumbutio mola botie wolo kakaa-mbunguwalo topalitio, deu̒yit-yito: Bersyeba, Syeba, Molada, Hajar-Sual, Bala, Ejem, Eltolad, Betul, Horma, Jiklag, Bet-Hamarkabot, Hajar-Susa, Bet-Lebaot, wau Saruhen.

⁷ Wau olo wopato kota u wumbutio mola botie wolo kakaa-mbunguwalo topalitio, deu̒yito-yito: Ain, Rimon, Eter, wau Asan.

⁸ Tuwotuwoto olo ngoa̒amila kambungu topalitio lo kokoo-tawaalo boito demola ngoilaminga Baalat-Beer (deu̒yito-yito Rama) tohuta ambahu huliaalio. Uitolo huta uilohi ode ngangaa-laa̒awaalo suku Simeon u lowali miliki limongolio.

⁹ Sababu huta ode suku lo Yehuda mailaba luasilio, yi ngotayadio lohuta boito yilohi ode suku Simeon.

Madala utilunu mao̒ ode suku Jebulon

¹⁰ Totayadu u otolulio yito huta duo̒lo ngangaa-laa̒awaalo todelomo suku Jebulon. Sipatana uilohi ode limongolio demola Sarid.

¹¹ Lonto Sarid, pilito sipatana ambahu otolopa dulu-dulunga ode Marala, lapatao̒ modedetao̒ Debeset wau walao̒ dutulaa to ambahu tiimuru lo Yokneam.

¹² Pilito sipatana to ambahu tiimuru tumula mao̒ monto Sarid dulu-dulunga ode sipatana lo Khislot-Tabor, tulusi ode Dobrat, lapatao̒ mobotula mola ode Yapia.

¹³ Mola monteeto pilito sipatana boito tulusi ode tiimuru ode Gat-Heper wau Et-Kajin, lapatao̒ mobale ode ambahu Nea dulu-dulunga ode Rimon.

¹⁴ To ambahu tilayo, sipatana boito mobale ode ambahu Hanaton wau pulitio to Lumbaya Yiptah-El.

¹⁵ Todelomo madala losuku Jebulon boito tuwotuwoto olo: Katat, Nahalal, Simron, Yidala wau Betlehemu. Lipu limongolio boito hamahama mopulaa dulo kota wolo kakaa-mbunguwalo topalitio.

¹⁶ Kokoo-tawaalo wolo kakaa-mbungulio boito woluo todelomo madala uilohi ode ngangaa-laa̒awaalo todelomo suku Jebulon u lowali huta miliki limongolio.

Madala utilunu mao̒ ode suku Isakhar

¹⁷ Totayadu opatio yito huta ode ngangaa-laa̒awaalo todelomo suku Isakhar.

¹⁸ To delomo madala limongolio tuwotuwoto: Yijreel, Khesulot, Sunem,

¹⁹ Haparaim, Sion, Anaharat,

²⁰ Rabit, Kisyon, Ebes.

²¹ Remet, En-Ganim, En-Hada, wau Bet-Pajes.

²² Sipatana limongolio modedetao̒ Tabor, Sahajima, Bet-Semes, tulusi lopulita to Dutulaa Yordan. Madala limongolio boito hamahama to wolomo kota wau kakaa-mbunguwalo topalitio.

²³ Kokoo-tawaalo wolo kakaa-mbungulio boito woluo todelomo madala uilohi ode ngangaa-laa̒awaalo todelomo suku Isakhar u lowali huta miliki limongolio.

Huta utilunu mao̒ ode suku Asyer

²⁴ Totayadu olimolio yito huta ode ngangaa-laa̒awaalo todelomo suku Asyer.

²⁵ Madala limongolio yito hamahama: Helkat, Hal, Beten, Akhsap,

²⁶ Alamelekh, Amad, wau Misal. Pilito sipatana limongolio to ambahu otolopa modedetao̒ Hui̒dee Karmel wau Dutulaa Libnat.

²⁷ Monteeto sipatana limongolio boito mobale ode tiimuru ode Bet-Dagon lapatao̒ modedetao̒ sipatana lo Jebulon wau Lumbaya Yiptah-El dulu-dulunga ode tilayo ode Bet-Emek wau Nahiel. Lapatao̒ pilito sipatana boito tulusi poli dulu-dulunga ode tilayo ode Kabul,

²⁸ Ebron, Rehob, Hamon, wau Kana, demola ngoilaminga Sidon.

²⁹ Monteeto pilito sipatana boito mobale ode Rama tulusi demola kota lo Tirus, deu̒yito-yito kota tuwau u obintengi; lapatao̒ pilito sipatana boito luli lobale ode Hosa tulusi lopulita to Lau Tenga. To delomo sisii-patanawalo boito tuwotuwoto Mahalab, Akhjib,

³⁰ Uma, Apek, wau Rehob. Ngoilanggubu lipu limongolio hamahama dulo puulo kota wolo kakaa-mbunguwalo topalitio.

³¹ Kokoo-tawaalo wolo kakaa-mbungulio boito woluo todelomo madala uilohi ode ngangaa-laa̒awaalo todelomo suku Asyer u lowali huta miliki limongolio.

Madala utilunu mao̒ ode suku Naputali

³² Totayadu u olomolio yito huta duo̒lo ngangaa-laa̒awaalo todelomo suku Naputali.

³³ Pilito sipatana limongolio tumulo mao̒ monto Helep, demola bungo lo ek to Ja-ananim, tulusi ode Adami-Nekeb, lapatao̒ ode Yabneel, demola Lakum, lapatao̒ lopulita to Dutulaa Yordan.

³⁴ Monteeto pilito sipatana boito mobale ode otolopa ode Ajnot-Tabor, wau mola monteeto ode Hukok. To ambahu huliaalio, madala botie sisiipatia wolo madala Jebulon, to ambahu otolopa wolo Asyer, wau to ambahu tiimuru wolo Dutulaa Yordan.

³⁵ Kokoo-tawaalo u obiintengi yito: Jidim, Jer, Hamat, Rakat, Kineret,

³⁶ Adama, Rama, Hajor,

³⁷ Kedes, Edrei, En-Hajor,

³⁸ Yiron, Migdal-El, Horem, Bet-Anat, wau Bet-Semes. Ngoilanggubu madala limongolio hamahama mopulaa tio kota wau kakaa-mbunguwalo topalitio.

³⁹ Kokoo-tawaalo wolo kakaa-mbungulio boito woluo todelomo madala uilohi ode ngangaa-laa̒awaalo todelomo suku Naputali u lowali huta miliki limongolio.

Huta utilunu mao̒ ode suku Dan

⁴⁰ Totayadu u opitulio yito huta ode ngangaa-laa̒awaalo todelomo suku Dan.

⁴¹ Madala limongolio botie hamahama Jora, Esytaol, Ir-Semes,

⁴² Saalabin, Ayalon, Yitla,

⁴³ Elon, Timna, Ekron,

⁴⁴ Elteke, Gibeton, Baalat,

⁴⁵ Yehud, Beneberak, Gat-Rimon,

⁴⁶ Me-Yarkon, Rakon, wau olo madala topalito Yope.

⁴⁷ Tau-tauwalo suku Dan, mailoolia ngotayadu lomadala limongolio, oditolio timongolio malonao̒ ode Lesem wau heloluhu kota boito. Timongolio malohama dulo kota boito, wau helomate yila-yilateelo mao̒ ulipulio wau longawasa kota boito. Yi malo tibiluloo̒ timongolio mota teto wau lolomelao̒ tanggulo Lesem boito lowali kota Dan, lodudua̒ tanggulo loluuhuru limongolio.

⁴⁸ Kokoo-tawaalo wau kakaa-mbungulio boito woluo todelomo madala uilohi ode ngangaa-laa̒awaalo todelomo suku Dan u lowali miliki limongolio.

Totayadu u pulitio

⁴⁹ Lapatao̒ umati lo Isirai̒lu yilapato helo laya-layadeo̒ huta tolipu boito, timongolio longohi mao̒ odelei Yosua walae̒e Nun huta ngotayadu u lowali huta milikiilio.

⁵⁰ Debo odelo u mapiloa̒hu mai lo Eeya, timongolio longohi kota u pilohilelio, deu̒yito-yito: Timanat-Serah to hihui̒-hui̒dea lo Epraim. Tei Yosua luli lomongu kota boito, lapatao̒ lotibiluloa̒ mota teto.

⁵¹ Odi-odieelo mola ti Iimamu Eleajar, tei Yosua walae̒e Nun wau mongo tau̒wa lou̒ ngaalaa̒ todelomo susuu-kuwaalo Isirai̒lu helo laya-layadeo̒ huta tolipu boito wolo lomahutao̒ undi u lei̒ potuhata mai to Eeya. Timongolio helohutu uito to Silo totalu lohuhebu Kema lo Eeya. Oditolio mailapatolo mola huta boito hetila-tilayadio.