YOSUA 16 - KITABI HABARI MOPIOHE

Madala utilunu mao̒ ode Epraim wau Manasye Otolopa

¹ Pipii-litowaalo sipatana utilunu ode wali mai lei Yusu, tumula mao̒ monto Dutulaa Yordan totili lo Yerikho, ambahu tiimuru bubuu-tuwaalo taluhu lo Yerikho demola huta ohungayo u luasi daa̒. Lonto Yerikho, pilito boito lobotula demola Betel tomadala hihui̒-hui̒dea.

² Lonto Betel, pilito boito dulu-dulunga ode Lus, lolibaya Atarot, deu̒yito-yito tambati biluloa̒ taulo Arki.

³ Lonteeto pilito boito dulu-dulunga ode Otolopa ode madala lokaumu Yaplet, demola Bet-Heron-Hilir, tulusi ode Gejer, lapatao̒ lopulita to Lau Tenga.

⁴ Uitolo madala uilohi mao̒ ode suku Manasye wau Epraim, ode wali mai lei Yusu, u lowali huta miliki limongolio.

Suku Epraim

⁵ Wumbutio mola botie yito sisii-patiyaalo huta uilohi ode ngangaa-laa̒awaalo todelomo suku Epraim. To ambahu tiimuru, pilito lo sipatana limongolio tumula mao̒ lonto Atarot-Adar demola Bet-Horon-Hulu,

⁶ lapatao̒ tulusi dulu-dulunga ode Lau Tenga. Mikhmetat woluo to ambahu tilayolio. To ambahu tiimurulio, pilito sipatana boito lobale ode mantahu Taanat-Silo, lapatao̒ molibaya mao̒ monto ambahu tiimuru motidulungo ode Yanoah.

⁷ Monteeto pilito boito molaahe mola ode Atarot wau Naharat, lapatao̒ tulusi lotiduluhe to Yerikho wau lopulita to Dutulaa Yordan.

⁸ To ambahu otolopa, pilito sipatana losuku Epraim boito tumula mao̒ monto Tapuah demola walao̒ Dutulaa Kana, lapatao̒ pulitio to Lau Tenga. Uitolo huta uilohi ode ngangaa-laa̒awaalo suku Epraim, u lowali miliki limongolio,

⁹ tuwotuwoto dengolo kota kekeei̒ wau kambungu u dudutuulio todelomo madala Manasye.

¹⁰ Bo suku Epraim diila lopolahi taulo Kanaa̒n lonto madala lo Gejer. Uito sababuulio tunggula botia taulo Kanaa̒n donggo hibiluloa̒wa to Gejer pee̒-pee̒enta wolo taulo Epraim, bo timongolio pilakusaalio helo kalaja odelo wato duo̒lo taulo Epraim.