YOSUA 15 - KITABI HABARI MOPIOHE

Mamaa-dalawalo utilunu mao̒ ode suku Yehuda

¹ Ngangaa-laa̒awaalo suku lo Yehuda helo lolimo tayadu huta u sisii-patiilio yito debo odie mola: To ambahu huliaalio, madala boito bua̒-bua̒ade mota demola huudio daa̒ ambahu huliaalio lomadala huta datahu u luasi daa̒ wau delita lo Jin to sipatana lo Edom;

² tumulalo mao̒ lonto huudu huliaalio lo Lau Mati,

³ tulusi ode huliaalio moli bibii-nggiyaalo lo hui̒dee to Akbrabim demola Jin. Wumbutio mola molibaya huliaalio lo Kades-Barnea, tulusi molibaya Hejron mobotula mola ode Adar, lapatao̒ mobale ode mantahu Karka.

⁴ Monteeto tulusi mola poli ode Ajmon, lapatao̒ motiduluhe towalao̒ dutulaa to sipatana lo Masiri, lapatao̒ mopulita to Lau Tenga. Odi-odieelo mola pilito lo sipatana to ambahu huliaalio lomadala duo̒lo suku Yehuda. Wau pilito lo sipatana boito debo odelo pilito lo sipatana ambahu huliaalio lo ngoilanggubu lipu lo Isirai̒lu.

⁵ To ambahu tiimuru, sipatanalio yito Lau Mati, tulusi ode tilayo demola bunto lo Dutulaa Yordan. To ambahu tilayo, sipatanalio, tumula mao̒ monto bunto lo Dutulaa Yordan boito,

⁶ mobotula ode Bet-Hogla, lapatao̒ tulusi ode sipatana lo Lumbaya Yordan. Monteeto sipatana tilayo boito mobotula tulusi ode tilayo demola Botu Bohan (Bohan yito walae̒e Ruben),

⁷ lapatao̒ tulusi ode Lumbaya Polodutolo demola Debir, lapatao̒ mobale poli ode tilayo ode mantahu Gilgal totambati u tataalua wolo bibii-nggiyaalo hui̒dee to Adumim ambahu huliaalio lo lumbaya boito. Monteeto tulusi poli ode butu lotaluhu En-Semes, tulusi ode En-Rogel,

⁸ lapatao̒ mobotula molibaya Lumbaya Hinom ode ambahu huliaalio lohuludu, tou̒toonu duduuto lo Yerusalemu, kota taulo Yebus. Monteeto pilito lo sipatana boito ode mantahu bolitutuo̒ lohuludu boito to ambahu otolopa Lumbaya Hinom, tohuudu tilayo Lumbaya Repaim,

⁹ lapatao̒ tulusi ode butu lotaluhu Me-Neptoahi, demola kokoo-tawaalo totili lo Hui̒dee Epron. Monteeto pilito sipatana lomadala boito mobale ode mantahu Baala (deu̒yito-yito Kiryat-Yearim),

¹⁰ wau mohelili wimbihu otolopa lo Baala ode mantahiu Hihui̒-hui̒dea lo Edom, lapatao̒ tulusi ode wimbihu tilayo lo Hui̒dee Yearim (deu̒yito-yito Kesalon), wau molaahe mola ode Bet-Semes, lapatao̒ tulusi ode Timna.

¹¹ Monto Timna, pilito sipatana boito wumbutio mola dulu-dulunga ode ambahu tilayo lo Hui̒dee Ekron, lapatao̒ mobale ode mantahu Sikron, molibaya Hui̒dee Baala tulusi ode Yabneel, wau pulitio to Lau Tenga,

¹² u debo odelo pilito sipatana to ambahu otolopa madala losuku Yehuda. To delomo madala boito hibiluloa̒wa tau-tauwala lonto ngangaa-laa̒awaalo todelomo suku Yehuda.

Tei Kale lohama Hebron wau Debir

¹³ Lotuuu̒de wolo palenta lo Eeya odelei Yosua, ngotayadu madala lo Yehuda yilohi odelei Kale walae̒e Yepune lonto suku Yehuda. To olio yilohilio Hebron, deu̒yito-yito kota uolei Arba, tiyamo lei Enak.

¹⁴ Wali mai lei Enak yito taulo Sesai, Ahiman wau Talmai. Tei Kale helo polahi olimongolio ngoa̒amila lonto Hebron.

¹⁵ Lonteeto tio mota loluhu tau-tauwalo tahi biluloa̒wa to Debir. (Kota boito muloololio mai masa-masaahulu ilunte Kiryat-Seper.)

¹⁶ Ualei Kale mao̒, “Titaalo tita tamowali mohama mao̒ Kiryat-Seper, tio mowali monika wolo walao̒ taabua lowatia, ti Akhsa.”

¹⁷ Tei Otniel, walao̒ lowutato taabua lei Kale ilunte Kenas, malohama kota boito; yi tei Kale lohudu mao̒ oli Akhsa, walai̒o, lowali dile lei Otniel.

¹⁸ Todulahu nika limongolio, tei Otniel lohuntulao̒ oli Akhsa alihu mohile mao̒ huta ngopita monto oliyamolio. Yi lolaahulo mola ti Akhsa lonto kolodailio, lapatao̒ tei Kale helohintu olio wolo u otohilaalio.

¹⁹ Ti Akhsa malo lametao̒, “Watia ohilaa dengolo butu lotaluhu, sababu huta u mailohi mai lipaapa olaatia boito woluo tolipu u mohengu.” Yi tei Kale malongohi mao̒ olio butu lotaluhu towimbihu tau̒wa wau butu lotaluhu towimbihu bunto.

Kokoo-tawaalo Yehuda

²⁰ Wumbutio mola botie yito huta uilohi ode ngangaa-laa̒awaalo todelomo suku Yehuda u lowali miliki limongolio.

^21-32 Kokoo-tawaalo u molaminga daa̒ to ambahu huliaalio, miliki lo Yehuda, deu̒yiito-yito u dudutuulio to sipatana lo Edom, ngoa̒amilalo woluo dulo pulaa tio kota, tuwotuwoto kakaa-mbunguwalo topalitio. Kokoo-tawaalo boito yito: Kabjeel, Eder, Yagur, Kina, Dimona, Adada, Kedes, Hajor, Yitnan, Jip, Telem, Bealot, Hajor-Hadata, Keriot-Hejron (deu̒yito-yito Hajor). Amam, Sema, Molada, Hajar-Gada, Hesmon, Bet-Pelet, Hajar-Sual, Bersyeba, Baal, Iyim, Ejem, Eltolad, Khesil, Horma, Jiklag, Madmana, Sansana, Lebaot, Silhim, Ain wau Rimon.

^33-36 Kokoo-tawaalo, u tuwotuwoto kakaa-mbunguwalo topalitio, u dudutuulio to bubuu-ngowaalo huludu, ngoa̒amilalo woluo mopulaa pato kota, deu̒yito-yito: Esytaol, Jora, Asna, Janoah, En-Ganim, Tapuah, Enam, Yarmut, Adulam, Sokho, Ajeka, Saaraim, Aditaim, Gedera wau Gederotaim.

^37-41 Wau olo mopulaa wolomo kota u wumbutio mola botie pee̒-pee̒enta wolo kakaa-mbunguwalo topalitio, deu̒yito-yito: Jenan, Hadasa, Migdal-Gad, Dilean, Mispa, Yokteel, Lakhis, Bojkat, Eglon, Khabon, Lahmas, Khitlis, Gederot, Bet-Dagon, Naa̒ma wau Makeda.

^42-44 Wau olo tio kokoo-tawaalo u wumbutio mola botie pee̒-pee̒enta wolo kakaa-mbunguwalo topalitio, deu̒yito-yito: Libna, Eter, Asan, Yiptah, Asna, Nejib, Kehila, Akhjib wau Maresa.

⁴⁵ Wau olo Ekron wolo kokoo-tawaalo kekeei̒ wau kakaa-mbungulio,

⁴⁶ wau ngoa̒amila kokoo-tawaalo wau kakaa-mbunguwalo totili lo Asdod, lonto Ekron demola Lau Tenga.

⁴⁷ Odito olo Asdod wau Gasa wolo kokoo-tawaalo kekeei̒ wau kakaa-mbungulio uloo̒-loo̒opo demola tili lowalao̒ dutulaa to sipatana lo Masiri wau pentadu Lau Tenga.

^48-51 To madala hihui̒-hui̒dea woluo mupulaa tuwau kota wolo kakaa-mbunguwalo topalitio, deu̒yito-yito: Samir, Yatir, Sokho, Dana, Kiryat-Sana, (deu̒yito-yito Debir), Anab, Estemoa, Anim, Gosyen, Holon wau Gilo.

^52-54 Wau olo tio kota u wumbutio mola botie, tuwotuwoto kakaa-mbunguwalo topalitio, deu̒yito-yito: Arabi, Duma, Esan, Yanumu, Bet-Tapuah, Apeka, Humta, Kiryat-Arba (deu̒yito-yito Hebron) wau Jior.

^55-57 Wau olo mopulu kota u wumbutio mola botie wolo kakaa-mbunguwalo topalitio, deu̒yito-yito: Maon, Karmel, Jip, Yuta, Yijreel, Yokdeam, Janoah, Kain, Gibea wau Timna.

^58-59 Wau wolomo kota u wumbutio mola olo, wolo kakaa-mbunguwalo topalitio, deu̒yito-yito: Halhul, Bet-Jur, Gedor, Maa̒rat, Bet-Arnot wau Eltekon.

⁶⁰ Wau olo dulo kota u wumbutio mola botie wolo kakaa-mbunguwalo topalitio, deu̒yito-yito: Kota Kiryat-Baal (deu̒yito-yito Kiryat-Yearim) wau Kota Raba.

^61-62 Tomadala lo huta datahu wau luasi udelita, woluo wolomo kota u wumbutio mola botie wolo kakaa-mbunguwalo topalitio, deu̒yito-yito: Bet-Araba, Midin, Sekhakha, Nibsan, Kota Watingo wau En-Gedi.

⁶³ Kota Yerusalemu tuwotuwoto olo miliki lo Yehuda, bo taulo Yehuda diila mowali mopolahi taulo Yebus tahi biluloa̒wa mota teto. Tunggula botia taulo Yebus donggo hibiluloa̒wa pee̒-pee̒enta wolo taulo Yehuda tokota boito.