YOSUA 14 - KITABI HABARI MOPIOHE

Totayadu madala ambahu otolopa lo Dutulaa Yordan

¹ Wumbutio mola botie yito wungguli tomimbihu woloolo mola lipu lo Kanaa̒n to ambahu otolopo lo Dutulaa Yordan hetila-tilayadio towolota umati lo Isirai̒lu. Tahe lolaya-layadeo̒ huta boito ode umati lo Isirai̒lu yito ti Iimamu Eleajar, tei Yosua walae̒e Nun, wau mongo tau̒wa lou̒ ngaalaa̒ todelomo susuu-kuwaalo bangusa lo Isirai̒lu.

² Debo odelo woloolo mola u mapilo malentai lo Eeya odelei Musa, lilii-puwaalo to ambahu otolopa lo Dutulaa Yordan u tilantu mao̒ ode tio apingo losuku bangusa lo Isirai̒lu, musi taya-tayadulo moli popahuto.

^3-4 Huta to ambahu otolopa lo Dutulaa Yordan mailohi lei Musa ode duluo apingo losuku bangusa u wewolio boito. (Palalu tuladulo tewe deu̒ wali mai lei Yusu leitayade todelomo dulo suku: Suku Manasye wau suku Epraim.) Tomimbihu suku Lewi, diaaluo huta uilohi lei Musa ode limongolio. Timongolio bo yilohia kokoo-tawaalo duo̒lo tambati biluloa̒, wolo huhuu-taalio datahu u luasi ode bibiahu sapi wau himba limongolio.

⁵ Odi-odieelo mola umati lo Isirai̒lu helo tataayadeo̒ huta boito tutuuu̒de lou̒ wolo u mapilo malentai lo Eeya odelei Musa.

Hebron yilohi odelei Kale

⁶ Tou̒ dulahee tuwau tau-tauwala lonto suku Yehuda lonao̒ mai lodunggaya wolei Yosua to Gilgal. Tala ngota limongolio yito tei Kale walae̒e Yepune taulo Kenas, loloi̒ya mao̒, “Yosua! Otaawanto wolo u mapilo tahuda mai lo Eeya odelei Musa, utolia lo Allahu Taa̒ala boito, to Kades-Barnea tomimbihu olanto wau watia.

⁷ Watia o umulu wopato pulu lotaunu tou̒ tei Musa, wato lo Eeya boito, longutolia olaatia lonto Kades-Barnea odelo tatilugasia mai motulete lou̒ poo̒-poo̒oyo lipu botie. Wau watia luli lohualingao̒ ode olio lou̒ lodelo podulohu u juujulu.

⁸ Tau-tauwalo talonao̒ wolaatia, helohutu umati lo Isirai̒lu mailoohe. Bo watia tatapu wau molotolo hilao lodungoheo̒ to Eeya Allahu Taa̒ala lowatia.

⁹ Wau sababu uito, tei Musa lodantia deu̒ huta u yilontale lo watia tantuulo mawohilio olaatia wau mongo walao̒ lo watia mowali miliki lamiaatia u ohiheo-hiheolo mao̒.

¹⁰ Botia mawopato pulaa limo lotaunu mola anggadu Eeya helo tahuda mai pasali leeto odelei Musa. Uito lotoduo tou̒ bangusa lo Isirai̒lu donggo hinao̒wa ode utoonulalo mao̒ tohuta ohungaya u luasi daa̒. Wau debo odelo u mapilo danti mai lo Eeya, Eeya olo malo duo̒lai olaatia tilinggula watia debo tumu-tumula tunggula botia. Bilohi mao̒, watia masaatia ou̒umulu walu lopulaa limo lotaun,

¹¹ bo debo donggo molotolo debo odelo tou̒ tei Musa helo ngutolia olaatia. Watia donggo molotolo umotuuu̒de u mopaatea meaalo mohutu mao̒ penu boli wolo.

¹² Sababu uito, wohiyalo mai botia madala hihiu̒-hui̒dea u mapilo danti mai lo Eeya olaatia tou̒ watia wau tau-tauwalo tapee̒-pee̒enta wolaatia luli lohualingai lodelo podulohu. Tou̒ boito ito lohihilao maloo̒ dungohe, deu̒ bangusa tamola teto woluo bangusa rakisasa tai̒lunte bangusa Enak. Timongolio hibiluloa̒wa todelomo kokoo-tawaalo duduulaa̒ u odingingo meeseli. Tanu Eeya mamo tulungi mai olaatia tilinggula watia mowali mopolahi mao̒ olimongolio, debo odelo upilo tahuda mai lo Eeya.”

¹³ Yi tei Yosua lodua̒ mao̒ olei Kale walae̒e Yepune, lapatao̒ longohi olio kota Hebron lowali huta milikiilio.

¹⁴ Tunggula botia kota boito donggo odelo miliki pusaka lo wali mola lei Kale walae̒e Yepune, taulo Kenas boito, sababu tio tatapu wau molotolo hilao wau modungohe to Eeya, Allahu Taa̒ala lo Isirai̒lu.

¹⁵ Muloololio mai Hebron ilunte kota Arba. (Arba yito taa leidaa̒ tutu towolota bangusa lo Enak.) Yi lipu boito aamani sontosa sababu diilalo piluyu lo popaatea.