YOSUA 13 - KITABI HABARI MOPIOHE

Madala udonggo musi hamaalo

¹ Botia tei Yosua mapanggola daa̒. Eeya lotahuda mai odelei Yosua, “Yio̒ mapanggola, Yosua! Bo donggo dadaata lipu u musi hamaalo:

² ngoilanggubu madala lo Pilistin wau Gesur,

³ wau ngoilanggubu madala lo Awi mantahu huliaalio. (Madala lonto Dutulaa Sikhor to sipatana lo Masiri demola sipatana lo Ekron to ambahu tilayo, ngoa̒amilalo boito tuwo-tuwoto tomadala lobangusa Kanaa̒n; wau mongo olongia lo Pilistin tahi biluloa̒wa to Gasa, Asdod, Askelon, Gat wau Ekron.)

⁴ Wau olo udonggo musi hamaalo: ngoa̒amila madala lo Kanaa̒n wau Meara (miliki bangusa lo Sidon), demola Apek to sipatana madala bangusa lo Amori;

⁵ wumbutio mola madala bangusa lo Gebal, wau ngoilanggubu madala Libanon ode mantahu tiimuru, lonto Baal-Gad to ambahu huliaalio lo Hui̒dee Hermon tulusi demola dalalo udulu-dulunga ode Hamat.

⁶ Tuwo-tuwoto olo ngoilanggubu madala taulo Sidon, tahi biluloa̒wa tomadala hihui̒-hui̒dea towolota huhuu-ideyaalo Libanon wau Misrepot-Maim.” “Ngoa̒amila babaa-nguwaalo boito de mapo lahiyo-U̒, tou̒ umati lo Isirai̒lu moluhu olimongolio,” tahuda mai lo Eeya wumbutio mola odelei Yosua. “Huta boito musi taya-tayadumu mao̒ u mowali huta miliki limongolio, debo odelo u mapilo malenta-U̒ mai olemu.

⁷ Oditolio, botia taya-tayadeelo huta boito ode tio losuku todelomo bangusa lo Isirai̒lu, wau ode ngotayadu lonto suku Manasye, alihu uito mowali huta miliki limongolio.”

Totayadu huta tomadala tiimuru lo Dutulaa Yordan

⁸ Suku Ruben wau Gad boli ngotayadu suku Manasye malo lolimo tayadu huta lonto olei Musa, wato lo Eeya boito; deu̒yito-yito huta to ambahu tiimuru lo Dutulaa Yordan.

⁹ Madala limongolio hamahama Aroe̒r (tobiihu Lumbaya lo Dutulaa Arnon), wau kota u tohuungo lumbaya boito. Wau olo ngoilanggubu madala datahu lailaio̒ lonto Medeba demola Dibon

¹⁰ wau demola sipatana madala Amon, tuwo-tuwoto ngoa̒amila kota u mapee̒enta kiluwasa lei Sihon, olongia lo Amori, tahulo-huloa̒a to Hesybon.

¹¹ Wau olo tuwo-tuwoto madala Gilead, madala totili lo Gesur wau Maakha, wau ngoilanggubu Hui̒dee Hermon, wau ngoilanggubu madala Basan demola Salkha.

¹² Madala limongolio olo tuwo-tuwoto madala tokawasa li Olongia Og, taulo Repaim pulitio tahemo malenta to Asytarot wau Edrei. Tei Musa malo poo̒laaheo̒ babaa-ngusawalo boito wau helo polahi olimongolio yilumuala lonto madala limongolio.

¹³ Bo ulipu lo Gesur wau Maakha diila pilopolahi lotau Isirai̒lu; timongolio donggo hibiluloa̒wa to Isirai̒lu.

¹⁴ Suku Lewi diila lololimo tayadu huta lonto olei Musa, sababu Eeya malo tahuda mai odelei Musa deu̒ tayadu losuku Lewi yito lonto babaa-keyaalo u yilalango tomesba ode Eeya Allahu Taa̒ala lo Isirai̒lu.

Madala u tilunu mao̒ ode suku Ruben

¹⁵ Ngotayadu lontu huta upilodanti mai lo Eeya ode umati lo Isirai̒lu boito mailohi lei Musa ode ngangaa-laa̒awaalo todelomo suku Ruben, u lowali huta miliki limongolio.

¹⁶ Madala limongolio boito hamahama Aroe̒r (tobiihu Lumbaya lo Dutulaa Arnon) wau kota u tohuungo lumbaya boito demola ngoilanggubu datahu lailaio̒ totili lo Medeba;

¹⁷ wau olo Hesybon wau ngoa̒amila kota todatahu lailaia̒ boito, deu̒yito-yito: Dibon, Bamot-Baal, Bet-Baal-Meon,

¹⁸ Yahas, Kedemot, Mepaa̒t,

¹⁹ Kiryataim, Sibma, Jeret-Hasahar u dudutuulio toitaato huludu to lumbaya boito,

²⁰ Bet-Peor, bibii-nggiyaalo Hui̒dee Pisga, wau Bet-Yesimot.

²¹ Wumbutio mola, tuwotuwoto olo ngoa̒amila kota todatahu u lailiaa̒ boito, wau ngoilanggubu madala tokawasa lei Sihon, olongia bangusa lo Amori, tamuloololio mai hulohuloa̒a to Hesybon. Tio wau tahi kawasawa lo Midian olo, deu̒yito-yito: Ewi, Rekem, Jur, Hur wau Reba, mailolaahe lei Musa. Ngoa̒amila tahi kawasawa boito mapee̒enta lomalenta lipu boito duo̒lo li Olongia Sihon.

²² Towolota lotau-tauwalo tahe pilate yila-yilateelo mao̒ lo bangusa Isirai̒lu maito olo tei Bileam walae̒e Beor, tamoo-laamalia.

²³ Dutulaa lo Yordan debo odelo siipati to ambahu otolopa madala losuku Ruben. Uitolo kokoo-tawaalo wau kakaa-mbunguwalo uilohilio mao̒ ode ngangaa-laa̒awaalo todelomo suku Ruben u mowali huta miliki limongolio.

Madala u tilunu mao̒ ode suku Gad

²⁴ Ngotayadu lonto huta u pilodanti mai lo Eeya ode umati lo Isirai̒lu boito olo mailudu lei Musa ode ngangaa-laa̒awaalo todelomo suku Gad, u lowali huta miliki limongolio.

²⁵ Madala limongolio hamahama Yaejer wau ngoa̒amila kota to Gilead wau ngotayadu lipu lobangusa Amon demola ngoilaminga lo Aroe̒r to ambahu tiimuru lo Raba;

²⁶ madala lo Hesybon demola Ramat-Mispa wau Betonim, wau madala Mahanaim demola sipatana lo Lodebar, ngoa̒amilalo boito tuwotuwoto olo madala ode suku Gad.

²⁷ To Lumbaya Yordan, madala suku Gad boito hamahama Bet-Haram, Bet-Nimra, Sukot, wau Japon, deu̒yito-yito labito madala tokawasa li Olongia Sihon to Hesybon. Sipatana to wimbihu otolopa losuku Gad boito yito Dutulaa Yordan demola ngoilaminga lo Bulalo Galilea to ambahu tilayo.

²⁸ Uitolo kokoo-tawaalo wau kakaa-mbunguwalo uilohi mao̒ ode ngangaa-laa̒awaalo todelomo suku Gad u lowali huta miliki limongolio.

Madala to ambahu tiimuru lo Dutulaa Yordan u tilunu mao̒ duo̒lo ngotayadu losuku Manasye

²⁹ Ngotayade duluo lohuta u pilodanti mai lo Eeya ode umati lo Isirai̒lu boito olo mailohi lei Musa ode ngaalaa̒-ngaalaa̒walo todelomo ngotayade duluo losuku Manasye u lowali miliki limongolio.

³⁰ Sisii-patiyaalo madala limongolio demola Mahanaim, tuwotuwoto ngoilanggubu Basan – deu̒yito-yito ngoilanggubu madala tokawasa lei Og, olongia lo Basan, wau olo wolomo pulu kakaa-mbunguwalo Yair to Basan.

³¹ Wumbutio mola tuwotuwoto olo ngotayade duluo madala lo Gilead, wau Asytarot wau Edrei, deu̒yito-yito oluo tiilo lokota tomadala okokawasa li Olongia Og to Basan. Ngoilanggubu lipu boito yiludulio mao̒ ode ngotayade duluo ngaalaa̒-ngaalaa̒walo wali lei Makhir, walae̒e Manasye.

³² Odi-odieelo mola tei Musa helo layadeo̒ huta to ambahu tiimuru lo Yerikho, to ngotuali lo Dutulaa Yordan, tou̒ tio woluo todatahu lo Moab.

³³ Bo suku Lewi diila loo̒tapu penu boli ngoi̒di mao̒ huta lonto olei Musa. Tei Musa loloi̒ya mao̒ ode limongolio deu̒ tayadu uwohi olimongolio yito monto babaa-keyaalo u pilodewo ode Eeya Allahu Taa̒ala lo Isirai̒lu.