YOSUA 12 - KITABI HABARI MOPIOHE

Mongo olongia tailolaahe lei Musa

¹ Madala to ambahu tiimuru lo Yordan, lonto Lumbaya lo Dutulaa Arnon tulusi mobotulaa mola ode Lumbaya lo Yordan demola ngoilaminga Hui̒dee Hermon to ambahu tilayo, mahilama wau hiluloa̒a lotau Isirai̒lu. Woluo duulota olongia tailolaahe limongolio.

² Taa ngotaalio tai̒lunte Sihon, olongia lo Amori tahulo-huloa̒a to Hesybon. Madala u kawakawasa olio hamahama ngotayadu madala lo Gilead: deu̒yito-yito lonto Aroer (tobiihu Lumbaya lo Arnon) wau kota u tohuungo lumbaya boito demola ngoilamingo Dutulaa Yabok to sipatana lomadala bangusa lo Amon;

³ wau olo hamahama madala lo Lumbaya Yordan to ambahu tiimuru, lonto Bulalo Galilea ode mantahu huliaalio demola Bet-Yesimot (to ambahu tiimuru Lau Mati), tulusi ode bungo lo Hui̒dee Pisga.

⁴ Olongia wewo tailolaahe lotau Isirai̒lu yito Olongia Og lonto lipu lo Basan u tahulo-huloa̒a to Asytarot wau Edrei. Tio tala ngota lo tailo labita lonto bangusa Repaim.

⁵ Madala u kawakawasa olio hamahama Hui̒dee Hermon, Sikha, wau ngoilanggubu Basan demola ngoilaminga madala Gesur wau Maakha; wau olo hamahama ngotayadu madala Gilead demola ngoilaminga madala to kawasa li Olongia Sihon tokota Hesybon.

⁶ Uitolo olongia duulota tailolaahe lei Musa pee̒-pee̒enta wolo bangusa lo Isirai̒lu. Huta lomongo olongia boito yiludu lei Musa, wato lo Eeya boito, ode suku Ruben, Gad, wau ngotayadu suku Manasye, u lowali huta miliki limongolio.

Mongo olongia tailolaahe lei Yosua

⁷ Mongo olongia tailolaahe lei Yosua pee̒-pee̒enta wolo bangusa lo Isirai̒lu yito ngoa̒amila mongo olongia tomadala ambahu otolopa lo Dutulaa Yordan, lonto Baal-Gad to Lumbaya Libanon tulusi demola hihui̒-hui̒dea Dayato to ambahu huliaalio totili lo Edom. Madala boito hetila-tilayadu lei Yosua ode susuu-kuwaalo bangusa lo Isirai̒lu u lowali miliki limongolio.

⁸ Madala boito hamahama madala hihui̒-hui̒dea, madala tobungo lohuludu to ambahu otolopa, Lumbaya Yordan wolo madala tobungo lohuludio, madala tobibii-nggiyaalo ambahu tiimuru, wau madala tohuta datahu u luasi daa̒ wau delita ambahu huliaalio. Lilii-puwaalo boito yito bakasi lolipu upilo tibiluloa̒ bangusa lo Het, Amori, Kanaa̒n, Peris, Hewi wau Yebus.

^9-24 Mongo olongia tahe ilolaahe boito, ngoa̒amilalo ngodaata tolo pulaa tuwau lota; deu̒yito-yito mongo olongia lonto kokoo-tawaalo odelo odie mola botie: Yerikho, Ai (totili lo Betel), Yerusalemu, Hebron, Yarmut, Lakhis, Eglon, Gejer, Debir, Geder, Horma, Arad, Libna, Adulam, Makeda, Betel, Tapuah, Heper, Apek, Lasaron, Madon, Hajor, Simron-Meron, Akhsap, Taanakh, Megido, Kedes, Yokneam (to Karmel), Dor (tobiihu pentadu), Goyim (to Galilea) wau Tirja.