YOSUA 11 - KITABI HABARI MOPIOHE

Tei Yosua lopoo̒laaheo̒ olei Yabin wau panggalio

¹ Tou̒ ti Olongia Yabin lonto Hajor loo̒dungohu tomimbihu ohohaama lo Isirai̒lu, yi tio malolao mota tau odeli olongia Yobab lonto kota Madon, ode mongo olongia lokota Simron wau Akhasap,

² ode mongo olongia to hihui̒-hui̒dea ambahu tilayo, to Lumbaya Yordan ambahu huliaalio lo Galilea, tomadala lobungo hihui̒-hui̒dea, wau tomadala biihio lopentadu membideo̒ lo Dor.

³ Tio olo lolao mota tau ode taulo Kanaa̒n to ambahu otolopa wau ambahu tiimuru lo Yordan, ode taulo Amori, Het, Peris, wau taulo Yebus tomadala hihuu̒-hui̒dea, wau taulo Hewi to bungo lo Hui̒dee Hermon tomadala lo Mispa.

⁴ Yi malonao̒ mai mongo olongia boito wolo ngoa̒amila suludadu limongolio u dadaata daa̒ debo odelo hungayo topentadu. Wadala wau kaleta lo popaatea limongolio olo dadaata daa̒.

⁵ Ngoa̒amila mongo olongia boito malo panggala wau lonao̒ mai pee̒-pee̒enta lotimalakasi totili lo walao̒ Dutulaa Merom u moluhu taulo Isirai̒lu.

⁶ Eeya lotahuda mai odelei Yosua, “Diila mao̒ oohe toli mongolio. To saaa̒ti debo odelo odieelo mola loombu, timongolio ngoa̒amilalo mapilate-U̒ yila-yilateelo mao̒ domi Isirai̒lu. Wadala limongolio musi polupuhumu mao̒, wau kakaa-letaalo popaatea limongolio musi pobuwomu.”

⁷ Yi tei Yosua wolo ngoa̒amila suludadulio loluhu wolo tilumahuo̒lo mola musu boito totili lowalao̒ dutulaa Merom.

⁸ Wau Eeya helohutu umati lo Isirai̒lu loo̒haama toli mongolio. Taulo Isirai̒lu loluhu wau helo hilapita olimongolio demola ngoilaminga lo Misrepot-Maim wau Sidon to ambahu tilayo, wau ngoilaminga lo Lumbaya Mispa to ambahu tiimuru. Popaatea tulusi wali-walihuhu dilumutu diaaluo penu boli ngotaa mao̒ lonto musu tai̒lo labita – ngoa̒amilalo yilate.

⁹ Tei Yosua lopohutu mao̒ olimongolio tutuuu̒de lou̒ wolo u mapilo malentai lo Eeya: tio malo polupuheo̒ wadala limongolio wau helomobu kaleta lo popaatea limongolio.

^10-11 Lapatio mao̒ tei Yosua luli lohualinga mota, tulusi malohama Hajor utou̒ boito yito laba-labaalo motoheeto towolota lo ngoa̒amila bele biluloa̒ saaha li olongia mota teto. Kota boito pilobulio, wau ti olongia wolo ngoa̒amila ulipulio pilatelio yila-yilateelo mao̒; diaaluo penu boli ngotaa mao̒ tailulia hitumula.

¹² Ngoa̒amila kokoo-tawaalo boito hilama lei Yosua, wau mongo olongiaalio yilau̒pio wau pilatelio yila-yilateelo mao̒ lotuuu̒de wolo palenta lei Musa wato lo Eeya boito.

¹³ Bo kokoo-tawaalo u bilongulio toitaato huludu tuodu, diaaluo penu boli tuwau mao̒ upilobu lotau Isirai̒lu, ngopohia Hajor upilobu mao̒ lei Yosua lohihilao.

¹⁴ Ngoa̒amila ulipu lo kokoo-tawaalo boito hepiltelio yila-yilateelo mao̒; diaaluo penu boli ngotaa mao̒ tailulia hitumula. Bo ngoa̒amila babaa-langilio u ohalaga wau bibiahio hilama taulo Isirai̒lu lowali miliki limongolio.

¹⁵ Ngoa̒amila upilo malentai lo Eeya odelei Musa, wato-Lio, mapilo tunggulao̒ lei Musa odelei Yosua, wau pilohutu mao̒ lei Yosua; diaaluo penu boli tuwau mao̒ udiila piloponao̒lio.

Madala u hilama lei Yosua

¹⁶ Tei Yosua malohama ngoilanggubu lipu boito – madala hihui̒-hui̒dea, madala tobungo lohui̒du, mopio u totilayo meaambo u tohuliaalio; wau olo ngoilanggubu madala lo Gosyen wau madala huta luasi daa̒ mohengu to ambahu huliaalio lo Gosyen, boli Lumbaya Yordan.

^17-18 Luasi lomadala boito tumula mao̒ monto hihui̒-Hui̒dea Dayato to ambahu huliaalio totili lo Edom, demola tilayo ngoilaminga Baal-Gad to Lumbaya Libanon ambahu hulilaalio lo Hui̒dee Hermoni. Lohiheo daa̒ tei Yosua helo paatea wolo mongo olongia lomadala boito, bo pulitio tio helo heu̒upo wau lomate olimongolio ngoa̒amila yila-yilateelo mao̒.

¹⁹ Monto ngoa̒amila kokoo-tawaalo to ngoilanggubu madala boito, diaaluo penu boli tuwau mao̒ kota helohutu daantia u mosahabatia wolo Isirai̒lu, ngopohia Gibeon, kota lobangusa Hewi. Ngoa̒amila kota uwewo ilolaahelio todelomo popaatea.

²⁰ Eeya helohutu olimongolio baa̒ngiyolo lohilao u mopaatea wolo taulo Isirai̒lu, alilhu timongolio pobinasaalo, wau pateelio mate-mateelo mao̒ ngoa̒amila lou̒ diila o ambungu lotuuu̒de wolo palenta lo Eeya odelei Musa.

²¹ To masa botie olo tei Yosua lonao̒ lopobinasa bangusa lo Enak, deu̒yito-yito bangusa rakisasa tahi biluloa̒wa tomadala hihui̒-hui̒dea – to Hebron, Debir, Anab, wau to ngoilanggubu madala hihui̒-hui̒dea lo Yehuda wau Isirai̒lu. Timongolio ngoa̒amilalo hepilate lei Yosua yila-yilateelo mao̒, wau kokoo-tawaalo limongolio pilobinasa.

²² Diaaluo penu boli ngotaa mao̒ lonto bangusa lo Enak tai̒lo labita tolipu lo Isirai̒lu, bo to Gasa, Gat, wau Asdod donggo woluo.

²³ Ngoilanggubu lipu boito hilama lei Yosua tutuuu̒de wolo palenta lo Eeya odelei Musa, lapatao̒ yilohilio ode bangusa lo Isirai̒lu lowali miliki limongolio. Lipu boito hetilaya-tilayadio, wau timii̒du suku loo̒tapu ngotayadu. Bangusa lo Isirai̒lu olo malo huheli lopaatea wau lipulio aamani wau sontosa.