YOSUA 10 - KITABI HABARI MOPIOHE

Tau-tauwalo Amori pilopo taa̒aluku

¹ Tei Adoni-Jedek, olongia lo Yerusalemu, loo̒dungohe deu̒ tei Yosua malohama wau helo ngaantulu kota Ai, wau lomate olongiaalio yila-yialteelo mao̒ debo odelo umaa pilohutulio ode Yerikho wau olongiaalio. Tio loo̒dungohe olo deu̒ taulo Gibeon malohutu daantia u losahaabatia wolo tau-tauwalo Isirai̒lu wau lotibiluloa̒ tohuungi mongolio.

² Ulipu lo Yerusalemu yiloohe daa̒, sababu Gibeon yito kota udaa̒; tutuuwauwa udaa̒lio wolo kokoo-tawaalo u o olongia, tumbao̒ lebe udaa̒ mao̒ wolo kota Ai. Tau-taulio olo tahi pohipatea tamotota motuuhua.

³ Sababu uito tei Adoni-Jedek helolao mota tau odeli Olongia Hoham to Hebron, li Olongia Piream to Yarmut, li Olongia Yapia to Lakhis, wau li Olongia Debir to Eglon, wolo lodelo mota tahuli botie,

⁴ “Duloolo bantui mai watia moluhu Gibeon, sababu taulio malohutu daantia u mosahabatia wolei Yosua wau taulo Isirai̒lu.”

⁵ Yi olimo lota olongia lo Amori boito, deu̒yito-yito olongia lo Yerusalemu, Hebron, Yarmut, Lakhis, wau Eglon malo paanggala, lapatao̒ wolo ngoa̒amila suludadu limongolio, timongolio malobala wau loluhu Gibeon.

⁶ Tau-tauwalo Gibeon helolao mota habari botie odelei Yosua to pilotikemawa to Gilgal, “Diila mao̒ polulia amiaatia tutuwau, Tuani! Hua̒a ponao̒lo mai momantu olamiaatia, sababu ngoa̒amila suludadu lonto li olongia lo Amori tolipu hihui̒-hui̒dea malo paanggala moluwali olamiaatia!”

⁷ Lapatao̒ tei Yosua wau ngoilanggubu suludadulio, tuwotuwoto pasuukanilio tamopiohe daa̒, malo monggata lonto Gilgal mota lopaatea.

⁸ Eeya lotahuda mai odelei Yosua, “Diila mao̒ oohe toli mongolio. Ohohaama mailohi-U̒ mai olemu, masababu uito diaaluo penu boli ngotaa mao̒ limongolio tamoo̒ taahangi molaawani olemu.”

⁹ Ilo-iloonua tei Yosua wolo pasuukanilio ilumoliyoo̒ lonto Gilgal ode Gibeon, lapatao̒ bolo tilumahuo̒olo mola heloluhu tau-tauwalo Amori.

¹⁰ Eeya helohutu mao̒ tau-tauwalo Amori mailoohe tou̒ loo̒onto suludadu lo Isirai̒lu. Dadaata taulo Amori pilatelio yila-yilateelo mao̒ to Gibeon, wau tadonggo hitumula yililapitalio mota lotuhuto binggi lohui̒dee to Bet-Horon demola ngoilaminga Ajeka wau Makeda to ambahu huliaalio.

¹¹ Tou̒ tau-tauwalo Amori donggo hituhuta mola binggi lo hui̒dee boito sababu lopolahi batanga lonto suludadu lo Isirai̒lu, Eeya malo podehu mai didi esi u duduulaa̒ lonto hulungo ode yitaati mongolio ngohilayao̒ dalalo demola Ajeka. Tailate tilemba lodidi esi boito lebe dadaata daa̒ wolo upilate taulo Isirai̒lu yila-yilateelo mao̒.

¹² Todulahee boito tou̒ Eeya lopoo̒haama mao̒ taulo Isirai̒lu to tau lo Amori, tei Yosua malo bisala ode Eeya. Wau totalu taulo Isirai̒lu, tei Yosua loloi̒ya, “Wuu mato lodulahu! Pohuheliilo toitaato Gibeon. Wau yio̒ hulalo! Diila mao̒ polimbato monto yitaato Lumbaya lo Ayalon.”

¹³ Yi mato lodulahu malo huheli wau hulalo diila lolimbato dilumutu taulo Isirai̒lu yilapato lopoo̒laahe mumuu-sulio. Polou̒tia botie leituladu todelomo Buku Yasar. Ilo-ilolaanga moto lodulahu lohuheli tohuungo hulungo, wau lohiheo daa̒ bolo tilumolopa mota.

¹⁴ Diila pee̒enta mao̒ lotoduo wau olo diila tamotoduo mai todulahee tuwau debo odelo todulahee boito, deu̒ Eeya helo dudua̒ u otohilaa lo manusia. Eeya lopaatea lotiwambao̒ ode Isirai̒lu!

¹⁵ Lapatao̒ popaatea boito, tei Yosua pee̒-pee̒enta wolo suludadulio luli lohualinga mota ode pilo tikemawa to Gilgal.

Tei Yosua loheu̒upo limo lota olongia lo Amori

¹⁶ Bo olimo lota olongia lo Amori boito loo̒lahi wau malo tituuo̒ todelomo gowa tuwau to Makeda.

¹⁷ Tau loo̒onto olimongolio, wau lopoo̒taa mao̒ odelei Yosua tambati pilotituua̒ limongolio.

¹⁸ “Lilide mao̒ boboo-tuwaalo duduulaa̒ ode ngango logowa boito, wau potambatia mao̒ tamoo-kawalia mota teto,” ualei Yosua mao̒,

¹⁹ “bo timongoli diila pohuheli mota teto. Yilapiti mota tulusi, wau tuhua timongolio monto wulea; diila mao̒ polulia timongolio tumuwota ode kota limongolio! Eeya Allahu Taa̒ala limongoli malo poo̒haama olimongoli toli mongolio.”

²⁰ Tei Yosua wau taulo Isirai̒lu helomate tau-tauwalo Amori boito yila-yilateelo mao̒, bo woluo olo towolota limongolio taloo̒ teteo̒ ode kota limongolio mota lololoohe potiduo̒laalo, tilinggula diila ilopatealio yila-yilateelo mao̒.

²¹ Lapatao̒ ngoa̒amila suludadu lei Yosua luli lohualinga mola odelei Yosua wolo loa̒ahu to pilo tikemawa to Makeda. Diaaluo penu boli ngotaa mao̒ tolipu boito buheli moloi̒ya wolo-wolo u motehengi taulo Isirai̒lu.

²² Lapatao̒ uito tei Yosua loloi̒ya mao̒, “Botia mota huo̒i mao̒ ngango logoa boito wau delowa mai odia olongia limo lota boito.”

²³ Gowa boito olo mota hiluo̒lio, lapatao̒ mongo olongia lo Yerusalemu, Hebron, Yarmut, Lakhis wau Eglon dilelo ode bulemengio,

²⁴ wau dilelolio odelei Yosua. Lapatao̒ tei Yosua malo tiangai ngoa̒amila taulo Isirai̒lu lotia̒mbu, tulusi lomalentao̒ mongo polowila talo duduo̒ helo tuuhua wolio mai lolumbetaa̒a batango buloo̒ lomongo olongia boito. Mongo polowila boito olo lonao̒ mai wau helo lumbetaa̒a batango buloo̒ lomongo olongia boito.

²⁵ Lapatao̒ uito, tei Yosua loloi̒ya mao̒ ode mongo polowilalio, “Diila mao̒ polawalo wau diila mao̒ oohe. Mamusi timongoli yakini wau buheli, sababu odieelo mola dudelo lo Eeya mamopohutu ngoa̒amila mumuu-suumu.”

²⁶ Lapatao̒ tei Yosua helomate mongo olongia boito yila-yilateelo mao̒ wau lontayanga olimongolio towolihi mohelu limo. Milate limongolio piloluli mota teto tunggula lolaango.

²⁷ Tou̒ dulahee tilumolopaa mota, to palenta lei Yosua, mimii-lateyaalo boito pilopolaahu tulusi pilomahulio ode delomo gowa u engontielio pilomake lomongo olongia tambati potituua̒alo. Lapatao̒ botu duduulaa̒ pilopo dutulio tongango logowa boito. Tunggula botia boboo-tuwaalo boito donggo mota teto.

Tei Yosua helohama poli lebe dadaata mao̒ lipu lo Amori

²⁸ Todulahee boito tei Yosua loluhu Makeda, wau lopoo̒laaheo̒ kota boito woli olongiaalio. Ngoilanggubu ulipu lokota boito pilatelio yila-yilateelo mao̒; diaaluo penu boli ngotaa mao̒ tailulia hitumula. Tei Yosua helo pohutu mao̒ li olongia lo Makeda tutuuwauwa debo odelo u pilohutulio toli olongia lo Yerikho.

²⁹ Lapatao̒ uito, tei Yosua wolo suludadulio ilumoliyoo̒ tulusi lonto Makeda ode Libna wau loluhu Libna.

³⁰ Eeya lopoo̒haama olo taulo Isirai̒lu tokota botie woli olongiaalio. Diaaluo penu boli ngotaa mao̒ tailulia hitumula; ngoa̒amila taa todelomo kota boito pilatelio yila-yilateelo mao̒. Tei Yosua helo pohutu mao̒ li olongia lokota boito debo odelo pilohutulio toli olongia lo Yerikho.

³¹ Lapatao̒ tei Yosua wau suludadulio lomaju lonto Libna ode Lakhis. Timongolio helobala kota boito tulusi loluhu mao̒.

³² Eeya helo poo̒haama to taulo Isirai̒lu to Lakhis todelomo polotuuhua todulahee oluolio. Wolo u pilotuhu limongolio to Libna mapilohutu limongolio olo to Lakhis; diaaluo penu boli ngotaa mao̒ tailulia hitumula, ngoa̒amilalo pilatelio yila-yilateelo mao̒.

³³ Tei Horam, olongia lo Gejer mai lomantu Lakhis, bo tei Yosua lopoo̒laaheo̒ olio wolo suludadulio; diaaluo penu boli ngotaa mao̒ taleitolaa, ngoa̒amilalo yilate.

³⁴ Wumbutio mola, tei Yosua wolo suludadulio lomaju lonto Lakhis ode Eglon tulusi malobala wau loluhu kota boito.

³⁵ Todulahee boitolo olo hilama limongolio Eglon, wau helomate yila-yilateelo mao̒ tau mota teto debo odelo u pilohutu limongolio to Lakhis.

³⁶ Lonto Eglon, tei Yosua wolo suludadulio lotao̒dee mola hihui̒-hui̒dea wau lonao̒ mota ode kota Hebron, tulusi loluhu

³⁷ wau lohama kota boito. Olongiaalio wau timii̒du taa tokota boito wau to kokoo-tawaalo wewo totili mao̒ leeto, ngoa̒amila pilatelio yila-yilateelo mao̒. Tei Yosua helo ngaantulu kota boito debo odelo u pilohutulio tokota Eglon. Diaaluo penu boli ngotaa mao̒ tailulia hitumula mota teto.

³⁸ Lapatao̒ uito, tei Yosua wolo suludadulio luli lohualinga wau loluhu Debir.

³⁹ Kota boito woli olongiaalio wau ngoa̒amila kota wewo totili mao̒ leeto hilama lei Yosua. Ngoa̒amila tau mota teto pilatelio yila-yilateelo mao̒. Tei Yosua lopohutu mao̒ Debir woli olongiaalio debo odelo u pilohutulio to Hebron wau Libna woli olongiaalio.

⁴⁰ Ngoilanggubu lipu boito tilaa̒aluku lei Yosua. Tio lopoo̒laaheo̒ mongo olongia tolipu hihui̒-hui̒dea, to bibii-nggiyaalo huludu to ambahu tiimuru, bubuu-ngowaalo hui̒dee to ambahu otolopa, to huhuu-tawaalo datahu wau luasi to ambahu huliaalio. Diaaluo penu boli ngotaa mao̒ tailulia hitumula; ngoa̒amilalo pilatelio yila-yilateelo mao̒. Uito tutuuu̒de wolo palenta lonto Eeya Allahu Taa̒ala lo Isirai̒lu.

⁴¹ Tei Yosua helo poo̒laaheo̒ lilii-puwaalo Kades-Barnea to ambahu huliaalio demola Gasa membideo̒ lolipu tobiihu pentadu, tuwotuwoto ngoilanggubu lipu lo Gosyen, tulusi demola Gibeon totilayo.

⁴² Bo todelomo pee̒entalo mao̒ lotuuhua, tei Yosua lopoo̒laaheo̒ ngoa̒amila olongia wau helohama lilii-puwaalo to kawasa limongolio, sababu Eeya, Allahu Taa̒ala lo Isirai̒lu, helo tuuhua duo̒lo taulo Isirai̒lu.

⁴³ Lapatao̒ uito, tei Yosua luli lohualinga mota ode pilo tikemawa to Gilgal.