YOEL 3 - KITABI HABARI MOPIOHE

Allahu Taa̒ala mamomutoo̒ babaa-ngusawalo

¹ Eeya lotahuda mai, “Tou̒ boito Yerusalemu wau Yehuda mapo nguliyo-U̒ omaa̒amululio.

² Ngoa̒amila bangusa maa̒mbuwo-U̒ wau deloo-U̒ ode Lumbaya Polomutoo̒. Lapatao̒ butoo̒o-U̒ timongolio mota teto sababu ololeetio duo̒lo umati-U̒ sababu timongolio malo laya-layaadeo̒ huta lo Isirai̒lu wau umati-U̒ mapilo layahi mongolio ode totoonulalo lipu.

³ Timongolio helo ngundi u lolantu tatoonu tamoo̒tapu mao̒ tahi tawalowa. Timongolio helo potali mongo dulahu wau mongo bohulotau u duo̒lo pilopowali wato. Wau doilio pilomake limongolio duo̒lo tasuuntali wau duo̒lo minumani lo angguru limongolio.

⁴ Mapongola limongoli Wau̒ botie, wuu Tirus, Sidon wau madala lo Pilistin? Ohilao yio̒ momaalasi niyati ode Olau̒? Naa, tolimowalo tontuli-U̒ u meidungga mai wolo molamemeto.

⁵ Hulawa wau talaa̒a-U̒ mailambati mongoli, wau halataa-U̒ u ohalaga dilelo limongoli ode kuilimu.

⁶ Ulipu lo Yehuda wau Yerusalemu dilelo limongoli lolamingo lonto lipulio; lapatao̒ pilotali limongoli ode bangusa lo Yunani.

⁷ Botia Wau̒ modelo olimongoli lumualao̒ monto tataa-mbatiyalo hepotaalia limongoli, wau Wau̒ mamomaalasi mai ololeetumu ode limongolio.

⁸ Walau̒mu mongo lolai̒ wau mongobua mapotali-U̒ ode ulipu lo Yehuda, u mapotaliilio poli ode Syeba, lipu umailaba lamingo. Wau̒, Eeya malo tahuda.

⁹ Pomala lumualo mola poo̒taa botie ode babaa-ngusawalo: Potidapatolo u mopaatea wau mobaalia lo lotolo! Yimoa̒alo mai tahi tootawa moitohe wamilo wau pahalaawani; ambuwalo mai ngoa̒amila pajule, wau pomajulo!

¹⁰ Dupai mao̒ mato lo popadeo̒mu mowali wamilo, wau pito pomopotomu mowali pakaakasi u pomituo̒. Wau olo taa molulupuhu musi moloi̒ya, ‘Wau̒ mowali mohipate debo odelo suludadu!’

¹¹ Ntali, hua̒a ponao̒lo mai, wuu babaa-ngusawalo monto totoonulalo tutulio! Potia̒mbulo to lumbaya mola teto.” Yaa, Eeya, ahulilio suludadu lo Eeya moluhu olimongolio!

¹² Eeya luli lotahuda, “Tamoo-tolonggaloa lo bangusa musi motidapa-dapato wau monao̒ mola ode Lumbaya Polomutoo̒. Mota teto Wau̒ Eeya mamomutoo̒ babaa-ngusawalo to tiheede lo umati-U̒.

¹³ Timongolio mailaba leetio; timbalatalo timongolio debo odelo pale malo lalahee to halabolu. Lumbe-lumbetaa̒lo timongolio debo odelo angguru todelomo pomitodelo angguru u lopolu tunggula lobangguato.

¹⁴ Hilihu-lihua tau woluo to Lumbaya Polomutoo̒. Sababu mola teto Dulahu Eeya mahua̒a meidungga.

¹⁵ Mato lodulahu wau hulalo mowali modio̒lomo, wau popoo-liyamaalo diilalo motinelo.”

Allahu Taa̒ala mamo balakati umati-Lio

¹⁶ Eeya lingiibode lonto Sion, hui̒-Dio; lonto Yerusalemu lobulonggodu sualaa-Lio. Hulungo wau dunia hilimeulo daa̒ sababuu-Lio. Bo Eeya madebo mopoduulua wau moduo̒la Isirai̒lu, umati-Lio.

¹⁷ “Wuu Isirai̒lu, botia mao̒taawa mao̒ limongoli, deu̒ Wau̒ulo Eeya Allahu Taa̒alamu. Wau̒ bilu-biluloa̒ to Sion, hui̒duu-U̒ u mantali, Yi Yerusalemu olo mowali kota u mantali tau deli madiilalo tumuwotao̒.

¹⁸ Tomaasa boito huhuu-ideyaalo mamopolu wolo ilengi lo angguru. Binatangi bibiahu mamongaa huo̒yoto to huhuu-luduwaalo u molomiodu. Duduu-tulaalo to Yehuda diila pee̒enta mao̒ opulita lotaluhio. Dutula tuwau mamo tolohei monto Bele lo Eeya, wau mopobata Lumbaya Akasia wolo taluhu nyaamani.

¹⁹ Masiri mamowali huta luasi udelita wau u mohengu daa̒, wau Edom mamowali huta udiila mowali pobutua lo pilomulo, diila poti biluloa̒ lotau. Sababu timongolio maloluhu taulo Yehuda, wau helomate yila-yilateelo mao̒ tuango lipu tadiaaluo totalaalio.

^20-21 Duo̒lo duhu limongolio mapohile-U̒ wolo moo̒ohuu̒ baalasilio, tamoomatea mate-mateelo mao̒ mapopoto-U̒. Bo Yehuda wau Yerusalemu malaito otualio, wau Hui̒du Sion madebo poti biluloa̒a-U̒.”