YOEL 2 - KITABI HABARI MOPIOHE

Poe̒ela timombihu Dulahu Eeya u mamei dungga

¹ Hiipaalo mola torompeti, potingohelo mola tuoto u topotala tohuludu lo Sion u mantali, piloti biluloa̒ lo Allahu Taa̒ala. Pohuluhelo lomola, wuu ulipu lo Yehuda! Sababu Dulahu Eeya membidu wau hua̒a meidungga.

² Dulahee boito modio̒lomo wau diila boti mobaango, polupolu lo wumbuo̒ taluhu wau diila boti mobaango. Suludadu lobulita lonao̒ mai lamelame debo odelo heengo u bula-bulade toitaato u hihui̒-hui̒dea. Poloutiya debo odelo uito diipo pee̒enta mao̒ yiloluo mai, wau diila tamonguli mai ohiheo-hiheolo mao̒.

³ Debo odelo tulu u lolumbila wau lomobu ilaantulu limongolio totoonulalo pilomulo. Tou̒ dipo-dipolulio mai, lipu boito debo odelo Eden, ilengi u pilomuloa wolo bubuu-ngawaalo Eeya, lapatio mao̒ debo odelo huta ohungayo u luasi wau mohengu daa̒. Diaaluo u penu boli hitua-tuawua u ilolabita, diaaluo taloo̒ lopato lonto luhu limongolio.

⁴ Laku limongolio debo odelo wadala; teteei̒o debo odelo wadala tou̒ motoolode.

⁵ Timongolio hilanti-lantia̒ to bolitutuo̒ hihui̒-hui̒dea, tingohio debo odelo hulopai̒o kaleta lo papaatea wau debo odelo pulotii̒o lotulu u lomobu bakasi panggeyango pale u malohengu. Timongolio hibaalisia debo odelo pasuukani tamolotolo boli buheli daa̒, tadapa-dapato momaju ode tambati lo popaatea.

⁶ Tou̒ timongolio loluhu, ngoa̒amila tau hulu-huluhelio, ngoa̒amila baya lotambuti wau lou̒le.

⁷ Debo odelo pahalaawani, timongolio moluhu, wau lomia̒ata mola dingingo meeseli debo odelo tamoo-hipatea. Timongolio hibaalisia motulide ode talu, diila longambi meaalo lomolio̒ dulungio.

⁸ Timongolio diila hipo duduupea̒, to dalalio lohihilao timongolio hinao̒wa. Hiramea timongolio helo ngantulo totoonulalo polo biintengi, diila mowali balisani limongolio pohuheliyolo.

⁹ Timongolio loluhu ode delomo kota, wau hiteteea̒ toitaato dingingo meeseliilio. Timongolio helomia̒ata mola ode delomo bebee-leyaalo; debo odelo tamootao̒wa, timongolio tilumuwoto loli tutuloa.

¹⁰ Sambela timongolio hemomaju, dunia hulu-huluhelio moohe, wau hulungo olo hulu-huluhelio moohe. Lapatao̒ lodio̒lomo lomola dulahu wau hulalo, wau tinelo lo popoo-liyamaalo mailooli.

¹¹ Suala lo Eeya bulo-bulonggodio, longohi palenta, ode hilaide lo popaatealio. Mailaba udaa̒ jumulaa lo pasuukanilio! Mailaba lotolo suludadu tahemo ponao̒ palentaa-Lio! Otutu moo̒tihela hapato wau polu-polutuo̒ Dulahu Eeya! Diaaluo penu boli ngotaa mao̒ tamoo̒ taahangi.

Iibodu u mopoo̒piohe tutumulo

¹² Eeya lotahuda mai, “Bo masaatia botie, muli pohualingolo mai ode Olau̒ wolo lealeaatu lohilao, sambela hipuasawa, he hilimutawa wau he hiyonga.

¹³ Antangaalo hilaamu wau diila pakeyangimu.” Pomalingolo ode Eeya Allahu Taa̒alamu. Tio sabali diila o enggadelio wau tamoomonua muura lohilao wau lealeaatu lo odehu hilao. Sanangi mongambungu wau diila mohuto moponao̒ lo hukuumani.

¹⁴ Otanu Eeya Allahu Taa̒alamu molomelao̒ tilihula, wau mobalakati mai olimongoli wolo daata-daatalo mao̒. Tilinggula timongoli mowali mopodewo bake lo angguru wau pale duo̒lo Eeya, Allahu Taa̒alamu.

¹⁵ Hiipaalo mola torompeti to Sion, hui̒du lo Allahu Taa̒ala, pomala lumualo mola dulahu puasa, powoluwowa mao̒ polo dunggaya udaa̒.

¹⁶ Ambuwalo ngoilanggubu ulipu, yimoilo mai himbunga lo umati. Ahuliilo monao̒ mai tau-tauwalo tahi panggolawa, tau̒kekeei̒ wau tahi ungeya olo. Tumbao̒ mongo bulaintiti bohu musi monao̒ mai olo. Ahuliilo mao̒ timongolio mololaa huwaliilio.

¹⁷ Ahuliilo mongo iimamu tahi pomayawa to Eeya, humoyongo towolota lomesba wau sulambe totalu, sambela moloi̒ya, “Ponuwalo mai umati lo Eeya, yaa Eeya; diila mao̒ polulia miliki lo Eeya mowali o aibu,” tilinggula babaa-ngusawalo wewo mopodalili wau moloi̒ya, “Tou̒toonu Allahu Taa̒ala limongolio?”

Allahu Taa̒ala lopowali huta luli molomiodu

¹⁸ Lapatao̒ Eeya lopoo̒ tuotao̒ huta-Lio, wau lomonu mai umati-Lio.

¹⁹ Eeya lolametai olimongolio odie, “Masaatia timongoli ngoa̒amila wohiya-U̒ mai: pale, angguru wau winulo jaitun duo̒lo ua̒alo, alihu timongoli ngoa̒amilalo pobutuhulo. Wau̒ diila tamo poluli olimongoli hinaalio meaalo poi̒ii̒ya lo babaa-ngusawalo.

²⁰ Pasuukani lobulita monto tilayo mahuhuuwo-U̒, ngotayadu lanengo-U̒ ode huta ohungayo u luasi daa̒. Ode Lau Mati wuntula-U̒ baliisani totalulio, ode Lau Tenga potouli-U̒ baliisani to wulealio. Mimii-lateelio mamoboolo. Timongolio pobinasaa-U̒ sababu malo posikisa olimongoli.

²¹ Diila mao̒ oohe, wuu halabolu, posanangia mola hilaamu; eelai mola sua̒li udaa̒ u kilalaja lo Eeya ode olemu!

²² Wuu bibii-natangiyalo, diila mao̒ balisa. Huhuu-tawaalo luasi u pilobutua lo huo̒yoto botia moidu. Wolo polodu bubuu-ngowaalo ayu hemomungo, bungo lo angguru wau ara laba-labaalo daatalio.

²³ Wuu ulipu lo Sion, poti wengahulo mola! Potisanangilo wau pongiibodu lomola meengahu! sababu totoonulalo opopiohu monto Eeya Allahu Taa̒alamu. To sembo lapatao̒ sembo lou̒ mopatu yilohilio mai didi tutuuheta to olemu. To sembo lohuhulo didi bilanggua-Tio mai, wau olo tosembo lapatio mao̒ sembo lohuhulo debo odelo ubohu-bohulio.

²⁴ Yi pale mamoluango poli tambati polumbetaa̒lo; angguru wau winulo jaitun malumepata monto tambati polumbetaa̒lo.

²⁵ Wau̒ mamo luloa̒ao̒ totoonulalo ololuhimu to tataa-wunuwaalo tou̒ bulita mongaa tilapula lo sembomu. Sababu Wau̒ulo tamolao mai pasuukani lobulita boito olemu.

²⁶ Timongoli mao̒tuheeta lo ua̒alo wau molaasa mobutuhu. Eeya Allahu Taa̒alamu mapolamahu limongoli, sababu ode olemu pilohutu-Lio mai dadaata u moo̒linggolabu. Umati-U̒ diila tamowali henteo̒lio poli!

²⁷ Yi mao̒taawa mao̒ limongoli, Isirai̒lu, deu̒ Wau̒ woluo tohuungi mongoli, wau deu̒ Wau̒, Eeya, yito Allahu Taa̒alamu. Diaaluo Allahu Taa̒ala wewo, ngopohia Wau̒ lohihilao. Umati-U̒ diila tapoo̒litolo poli!”

Dulahu Eeya

²⁸ “Lapatao̒ uito de ngoa̒amila tau mapoo̒ daata-U̒ daa̒ wolo rohu-U̒. Yi walau̒mu mongo lolai̒ wau mongobua mamopo tunggulao̒ totoonulalo tahuli-U̒; mongo panggola to wolotamu mamoo̒ toduo mai tohiilopo, bibilohe mawohi ode mongo bohulotau wau mongo dulahu.

²⁹ Tou̒ boito rohu-U̒ matuwato-U̒ mai olo ode yitaato lo tahi pomayawa talolai̒ wau taabua.”

³⁰ To hulungo wau dunia mapohutuwo-U̒ mai dadaata u moo̒linggolabe. Mawoluo mai popaatea moo̒sababu duhu mobangguato, lei̒ito tulu wau bongga lopoloo̒.

³¹ Mato lodulahu mamowali modio̒lomo wau hulalo mamowali meela debo odelo duhu. Ngoa̒amila boito mamotoduo tou̒ diipo meidungga Dulahu Eeya, dulahee upolu-polutuo̒ wau moo̒tihela hapato!

³² Bo titaalo tita tamo molohone mei̒ tulungi to Eeya, mapo aahuwolo. Eeya lotahuda, “To Yerusalemu tau-tauwalo tahe tilulaotu-U̒ mamoa̒ahu.”