YOEL 1 - KITABI HABARI MOPIOHE

¹ Uti-utieelo tahuli lo Eeya odelei Yoel, walae̒e Petuel.

Umati lo Isirai̒lu siluukali hilao sababu tilapulo halabolu lopulito iliila lobulita

² Dungohiilo, wuu mongo panggola; poo̒tuotilo, ngoa̒amila tau to Yehuda. Wolo mapee̒enta sua̒li u odie lotoduo mai to jamanimu, meaalo to jamani lomongo nenemoyaamu?

³ Wunggulia mao̒ u lotoduo boito ode mongo walau̒mu; alihu timongolio mopo tunggulao̒ ode mongo walai̒ mongolio wungguli boito. Wali mai wumbutio mola musi modungoheo̒ olo, wau mopo tolongao̒ ode wali u wumbutio mola.

⁴ Polemboa̒ lobulita udiila oyia̒apa jumulaalio, lotiluntu to hahaa-laaboluwalo wau yilonga daata-daatalo mao̒ tilapulio. Wolo u pilopo labito lo polemboa̒ u utie, pilopulito lo polemboa̒ uwewo poli.

⁵ Wuu tahi huwoa̒, pobongulo! Wuu tahi pongiluma, hiyongolo mola! Sababu angguru u bohu mailambato lonto tunggilumu.

⁶ Pasuukani lobulita loluhu lipunto; bulita boito hilootola wau diila oyia̒apa daatalio, dungitio hiluita debo odelo huoto losinga bilango.

⁷ Ilantulu limongolio bungo lo nggurunto, wau bungo lo araanto, bolo tuodio u leitolaa. Babaatangio ilalipa limongolio, tunggula walao̒ tataa-ngoolio lowali loputio̒.

⁸ Hiyongolo mola, wuu umati, debo odelo tadulahu talimi-limi talo hiyongao̒ ilopatea lo tilantahio tao̒tolia̒ngo tutu.

⁹ Pale wau angguru mailooli lonto Bele lo Eeya. Yi potilimi lomola mongo iimamu, taatatapu wau molotolo hilao momaya to Eeya.

¹⁰ Hahaa-laaboluwalo botie loa̒antulu. Huta lotilimi; sababu loa̒antulu lomola totoonulalo pale, lohengu lomola hungo lo angguru, wau lopulito lomola winulo jaitun.

¹¹ Wuu tamoomengia, pohilimutolo mola! Wuu tamoomengia ilengi lo angguru, hiyongolo mola! Sababu pale, panggeyango wau ngoa̒amila ilotolo loa̒antulu.

¹² Bubuu-ngowaalo hipomungoa tohuta udatahu wau luasi lowali lohengu ngoa̒amila: bungo lo angguru, apeli, ara, huruma wau dalima. Yi ulipu olo diilalo leengahe.

¹³ Wuu mongo iimamu tahemomayawa tomesba, pomakeaalo mao̒ kaingi yute, wau hiyongolo mola. Tuwotolo ode Bele lo Eeya u mohilimuta oo̒onuwalo mao̒, sababu diaaluo bake lo angguru wau pale duo̒lo Allahu Taa̒alamu.

¹⁴ Palentai mao̒ umatimu u mopuasa, pomala-lumualo mola dudunggaya li olongia! Toduwaalo mai mongo tau̒wa wau mongo panggola wau ngoa̒amila ulipu lo Yehuda, alihu monao̒ mai ode Bele lo Allahu Taa̒ala, u mongiibode mola mei̒ tulungi mai o-Lio.

¹⁵ Dulahu lo Eeya maleimbidei, dulahu u moo̒tihela hapato; saaa̒ti lo Taa Laba-labaalo kawasa mopodungga mai obobinasa.

¹⁶ Ua̒alo lopulito binasa totalu lo matoonto to Bele lo Allahu Taa̒alanto diduuluo iibode meengahe.

¹⁷ Bili yilate tohuta u mohengu daa̒. Diduuluo pale u tahuwolo, yi wiwii-bungowalo diila otua wau lowali tuodu.

¹⁸ Bibiahu hipohuabe wau balisa; diduuluo huta luasi u pilobutua lo huo̒yoto olio. Himbala himba olo lohiheo longongoto.

¹⁹ Watotia mei̒ tulungi mai to Eeya, yaa Eeya sababu huhuu-tawaalo luasi u pilobutua lo huo̒yoto lopobu lowali lohengu daa̒ bubuu-ngowaalo ayu olo lohengu wau yilate debo odelo yilaalapo tulu.

²⁰ Tumbao̒ bibii-natangiyalo molinggelo to oa̒ayua hemo ngiibode mola to Eeya mei̒ tulungi. Timongolio diila mowali mopotolu mao̒ totoa̒ngo, sababu duduu-tulaalo lohengu ngoa̒amila.