YESAYA 3 - KITABI HABARI MOPIOHE

Puuyota to Yerusalemu

¹ Tutuulio tutu, Eeya Taa Laba-labaalo kawasa mamohama monto Yerusalemu wau Yehuda polodapato ua̒alo wau u yilumoolo. Wau olo ngoa̒amila taa u hepongaku limongolio:

² mongo pahalaawani wau pajule, hakimu, nabi, tamoo-laamalia wau taamoo-naseehatia,

³ polowila, tahimuloa lo ulipu wau ahali u moponao̒ pamalenta, tamoo-sihiria wau tamoomilohe.

⁴ Eeya mamomuduo̒ mongo walao̒ humula mowali tau̒wa lo ulipu, wau timongolio mamo malenta wolo hila-hilaalio.

⁵ Tau-tauwalo mamoo-dedeehea. Taa humula diila momandungi taa panggola, wau taa ukikiio̒ diila momandungi taa udaa̒.

⁶ Tou̒ boito tau mamolantu ngotaalio lomongo pohutatalio wau moloi̒ya mao̒ olio, “Bo yio̒ tao̒ pakeyangi u paatuti; sababu uito powalilo tau̒wa lami tojamani u polupolu lou̒ suusa botie.”

⁷ Bo yio mamolametao̒, “Watia diila hulango! Watia olo diila o ua̒alo wau pakeyangi. Diila mao̒ ahuli waatia mowali tau̒wa lobangusa!”

⁸ Otutu, Yerusalemu malodehu! Yehuda malo aantulu Sababu totoonulalo loi̒ya wau huhutu limongolio moluwali to Eeya wau moteehengi okokawasaa-Lio.

⁹ Pii̒li limongolio u sombongi mopo i̒laalo ololeeti mongolio. Wolo diila tuua̒ao̒-tuua̒ao̒ timongolio ilodusa debo odelo taulo Sodom muloololio mai. Malopotala timongolio! Timongolio lopotoduo mai topotala tobatanga limongolio lohihilao.

¹⁰ Eeya lotahuda mai, “Potunggula mao̒ totaa u modungohe ola-U̒ deu̒ timongolio masanangi tutu wau moa̒ahu. Timongolio mamolaasa mao̒ tilapulo tolopani lokalaja tio̒opatea limongolio.

¹¹ Bo matopotala taa moleeto! Timongolio mapo hutuolio debo odelo u hepilohutu limongolio ode taa wewo.

¹² Umati-U̒ madeehe lotaa hemo porente doi wau taa u hemo pobulota doi wolo bunga daata-daatalo mao̒. Umati-U̒ mapolapalo lomongo tau̒walio tilinggula diilalo motota dalalo umusi ponao̒wa limongolio.”

Eeya lomutoo̒ umati-Lio

¹³ Eeya malopo dapato u mongaibu wau momutoo̒ umati-Lio.

¹⁴ Eeya lohutu odelo hakimu tomongo tau̒wa lo umati-Lio. Uti-utieelo potuludu Eeya toli mongolio: “Timongolilo talo lambato tilapulo ii̒i-lengiyaalo angguru; belemu polupolu lobalangi u yilambati mongoli lonta taa mosikini.

¹⁵ Yilongola timongoli helodeehe umati-U̒ wau helohama uuntungi daata-daatalo mao̒ totaa mosikini? Wau̒ Eeya Taa Laba-labaalo molanggato malo tahuda mai.”

Poe̒ela ode mongobua lo Yerusalemu

¹⁶ Eeya lotahuda mai, “Sombongi daa̒ mongobua lo Yerusalemu! Timongolio dadaata pii̒liilio umoo̒ herani udiila paatutilio, motohilaa mopoitohu mato wau monao̒ lou̒ himengea. Diambangio hepohutu-hutuolio wau toli-toliyongo tingohu lilii-nggitowalo to oa̒atio.

¹⁷ Bo Wau̒ mamo hukuumani mai olimongolio; lunggongi mongolio mamopolu lokukudu wau dilayoto.”

¹⁸ Mamei dungga wakutuulio Eeya mohama monto mongobua lo Yerusalemu totoonulalo dadai u hepomangga limongolio: buhuto lunggongo, linggito oa̒ato, maina,

¹⁹ linggito uluu̒, beleu̒to baya,

²⁰ beleu̒to lunggongo, jijii-matiyaalo to polotodu wau wohuta,

²¹ hua̒limo wau ante-ante lo wulingo,

²² pakeyangi lo potihunggu u higaagawa, boo̒ manteli, doompeti,

²³ boo̒ molipa, pakeyangi lineni, dasi wau beleu̒to lunggongo u hayahaya.

²⁴ Botia timongolio hipomakea yilonta, de timongolio moboolo mohutodu. Bintolo wohuta limongolio u moa̒aluti matuloa̒lio wolo tali leidaa̒ u bangganga. Lunggongi mongolio u ohuwoa̒a gaaga mapo dayatolo. Pakeyangi limongolio u hipiohe matuloa̒lio wolo babaa-rangiyalo u malohiheo. Botia timongolio gaaga; de lapatio mao̒ baya limongolio mowali mobulilo, sababu cilapualio.

²⁵ Mongo lolai̒, olo tahilootola maamate todelomo popaatea.

²⁶ To huhuu-lubangiyalo kota tau mamotilimi wau mohilimuta, wau kota boito lohihilao mamowali debo odelo taabua yilaalalio tahulo-huloa̒a tohuta.