YEREMIA 3 - KITABI HABARI MOPIOHE

Isirai̒lu diila tatapu wau molotolo hilao

¹ Eeya lotahuda mai, “Wonu bolo ngotaalio taabua bua̒yawa lo dilelio, lapatao̒ taabua boito mowali dile lotaa wewo, yi bakasi lodilelio diila mowali muli mohama olio odelo dile, sababu sua̒li boito mamo poo̒leeto lipu botie. Yio̒ Isirai̒lu, mai̒lo tilantahu dadaata daa̒, diila pongalo aakali yio̒ botia mohuto muli mohualingai ode Olau̒!

² Ntali bilohi mola ode yitaato, ode bobooli-tutuo̒owalo huludu! Tambati toonu u diipo pee̒enta mao̒ nilao̒omu u motisuuntali? Debo odelo taulo Arabi tohuta datahu luasi daa̒ wau odieelo mola yio̒ motihuloa̒a tobiihu dalalo mohima taa u ohilaa moitohe ohilaa daa̒. Yio̒ loponajisi lipu botie wolo jina wau ololeetumu.

³ Uito sababuulio taluhu lonto hulungo leio̒tongo, wau didi tosembo lobunga diila hemei dungga. Yio̒ mohaamawa lo tasuuntali, wau diila motota moolito.

⁴ Tou̒ osuukalimu boito yio̒ lobisala de Olau̒ deu̒ Wau̒ tiyamamu, deu̒ Wau̒ lomonu olemu tou̒ yio̒ donggo u kikiia̒i.

⁵ Yio̒ moloi̒ya olo deu̒ Wau̒ diila tamolo-laalaaita muluka olemu. Uitolo u loi̒yamu, wuu Isirai̒lu, bo sambela uito hepo hutuomu olo totoonulalo ololeeto u mowali pohutuomu.”

Isirai̒lu wau Yehuda musi molilihu

⁶ To maasa pamalenta li Olongia Yosia, Eeya lotahuda mai odie odelaatia, “Maa iloontongamu wolo u hepilohutu lo Isirai̒lu, taabua tadiila tatapu wau molotolo hilao boito? Tio lololaa ola-U̒ wau helo tisuuntali toitaato timii̒du huludu u molanggato wau towalungo timii̒du bungo lo ayu u mohimbungo.

^7-8 To pikiili-U̒ mola lapatao̒ tio mohutu ngoa̒amilalo boito, tio mamuli mohualingai ode Olau̒. Bo tio diila lohualingai, tumbao̒ lonao̒ lotisuuntali. Uito sababuulio Wau̒ lotalaki wau lopolahi olio. Yehuda, wutato lo Isirai̒lu, tadiila tatapu wau molotolo hilao boito loo̒onto ngoa̒amilalo boito, bo tio diila yiloohe, tumbao̒ tio lodudua̒ lowali suuntali,

⁹ wau sama-samaata diila molaasa moolito. Tio helojina sababu lolubo botu wau bungo lo ayu, tilinggula lipu botie lowali najisi.

¹⁰ Lapatao̒ lohutu mao̒ ngoa̒amilalo boito, Yehuda tadiila tatapu wau molotolo hilao boito luli lohualingai ode Olau̒ bo lou̒ diila tio̒otutua, sababu hilaalio diila otutu wau belesi. Wau̒, Eeya, malo tahuda mai.”

¹¹ Lapatao̒ Eeya lopoo̒taa mai olaatia deu̒ eleponu Isirai̒lu malo bulemenga to Eeya, bo Isirai̒lu loi̒laalo lebe mopiohu wolo Yehuda tadiila tatapu wau molotolo hilao boito.

¹² Eeya lopoa̒hu olaatia lonao̒ u loloi̒ya mao̒ sua̒li botie ode Isirai̒lu: “Wuu Isirai̒lu tadiila tatapu wau molotolo hilao, pohualingolo mai ode Olau̒! Wau̒ lealeaatu odehu hilao wau diila taa ohiheolo mao̒ muluka to olemu.

¹³ Akuilo wambao̒ deu̒ yio̒ ototala wau malo malakala to Eeya, Allahu Taa̒alamu. Akuilo deu̒ towalungo timii̒du bungo lo ayu u mohimbungo yio̒ malohudu lealeaatulo mao̒ sintamu ode ila-ila lobangusa wewo, wau diila modungohe totoonulalo palentaa-U̒ Wau̒, Eeya, malo tahuda mai.”

¹⁴ Eeya lotahuda mai, “Wuu umati tadiila tatapu wau molotolo hilao, pohualingolo mai ode Olau̒! Timongoli yito milikii-U̒. Wau̒ mamohama toli mongoli, ngotaalio monto timii̒du kota, duulota monto timii̒du kaumu, wau modelo olimongoli muli mohualinga ode Huludu Sion.

¹⁵ Wau̒ mamongohi mai ode olemu mongo tau̒wa tamodungohe ola-U̒. Timongolio mamotitau̒wa toli mongoli wolo tinepo wau lealeaatu polongalati.

¹⁶ Lapatao̒ wonu bolo timongoli mai̒lo duhenga mola dadaata tolipu botie, tau diilalo mao̒ mobisala pasali lo Bulua Daantia-U̒. Timongolio diila tamo mikiilangi meaambo muli moe̒ela mola, timongolio tumbao̒ diila tamomalalu mao̒ meaambo mohutu Bulua Daantia uwewo.

¹⁷ Tou̒ boito kota Yerusalemu mau̒nteelo ‘Tambati huhuloa̒a lo Eeya’, wau totoonulalo bangusa mamotia̒mbu tokota boito u molubo ola-U̒. Timongolio diilalo mao̒ modudua̒ u otohilaa lohilaa limongolio u baaa̒ngiola wau moleeta boito.

¹⁸ Isirai̒lu mamoheehea̒ wolo Yehuda, wau pee̒-pee̒enta monao̒ mai monto lipu polayahu to ambahu tilayo. Timongolio mamuli mohualingai ode lipu u mailohi-U̒ odelo huta pusaka ode loluuhurumu.”

Polojina umati lo Allahu Taa̒ala

¹⁹ Eeya lotahuda mai, “Isirai̒lu, Wau̒ motohilaa mololimo olemu odelo walau̒u-U̒, wau mongohi mai olemu lipu u moo̒sanangi, lipu u mopiohe daa̒ to ngoilanggubu dunia. Wau̒ motohilaa alihu yio̒ molanggula ola-U̒ paapa, wau diilalo molahi monto ola-U̒.

²⁰ Bo debo odelo dile taabua tadiila tatapu wau molotolo hilao, yio̒ olo diila tatapu wau molotolo hilao to Olau̒. Wau̒, Eeya, malo tahuda mai.”

²¹ Toitaato bobooli-tutuo̒waalo hui̒du odungohe suala bulu-buluhuto; uito suala umati lo Isirai̒lu tahiyo-hiyoongo wau hemolo-molohone, sababu timongolio mai̒lodusa, wau lolipata to Eeya Allahu Taa̒ala limongolio.

²² Wuu timongoli ngoa̒amila tamalo lolaa mao̒ to Eeya, muli pohualingolo mai! Eeya maa mopoo̒luli olimongoli, wau mopowali olimongoli tatapu wau molotolo hilao. Timongoli moloi̒ya, “Ooo̒, botia ami monao̒ mai ode Eeya, sababu Tio Allahu Taa̒ala lamiaatia.

²³ Diila ohuna wambai̒o timongoli ramerame hipoluboa balaahala toitaato bobooli-tutuo̒waalo hui̒du! Polotulungi ode Isirai̒lu bo meidungga monto Eeya Allahu Taa̒ala lamiaatia.

²⁴ Polotuboa to Baal, balaahala u moo̒olito boito maloo̒hutu olamiaatia ileenggila lomongo walao̒ lamiaatia wau bibiahu sapi, himba, deu̒yito-yito totoonulalo hitua-tuawua u mapilopo woluo mao̒ loluuhuru lamiaatia tumulalo muloololio mai daa̒.

²⁵ Oditolio, poluliaalo mai amiaatia momanta woolito, wau poluliaalo mai amiaatia mowali hina. Sababu, amiaatia wau loluuhuru lamiaatia mai̒lodusa to Eeya Allahu Taa̒ala lamiaatia, wau diila pee̒enta mao̒ lodungohe to ngoa̒amila palenta lo Eeya.”