YEHESKIEL 9 - KITABI HABARI MOPIOHE

Yerusalemu hilukuumani-Lio

¹ Lapatao̒ watia loo̒dungohe Allahu Taa̒ala longiibodu, “Ponao̒olo mai odia wuu tau-tauwalo tamaa moponao̒ hukuumani-U̒ tokota botie.”

² Pee̒entalo mao̒ yilumenetai wolomota lonto ambahu bulemengo hulubangi Tilayo Bele lo Eeya, ngota-ngota hidelowa tingolo. Pee̒-pee̒enta woli mongolio woluo taa pakepake lineni u delodelo pakaakasi poluladu. Timongolio tilumuwotai wau tilimihula totili lomesba polunggu.

³ Lapatao̒ tinelo molilingga u tuotio owoluo Allahu Taa̒ala lo Isirai̒lu, lotinelai lonto mamaa-laikatiyala opolipio̒, tulusi lolimbata lonto tambatilio u bohulio boito ode huhebu potuwotalo Bele lo Eeya. Yi Eeya lotianga taa u pakepake lineni boito, tahudaa-Lio mao̒,

⁴ “Ponao̒olo ode totoonulalo tutu lokota wau pakea mao̒ tuoto totau̒ lo timii̒du taa u molaasa suukali lohilao wau suusa sababu ngoa̒amila huhutu moo̒olonuo̒ u hepilohutu tokota boito.”

⁵ Watia loo̒dungohe Allahu Taa̒ala lotahuda ode tau-tauwalo wewolio, “Poduduo̒lo olio ode totoonulalo tutu lokota wau pateaalo mate-mateelo mao̒ timii̒du tau lou̒ diila o ambungulio.

⁶ Pateaalo mate-mateelo mao̒ ngoa̒amila mongo lolai̒ wau mongobua, panggola wau muda, mongo dulaa̒ wau tau̒kekeei̒. Bo diila mao̒ dedeta penu boli ngotaa mao̒ taa otuoto totau̒lio. Tumuliilo monteea, monto Bele-U̒ botie.” Yi timongolio malo lumula tuugasi limongolio wolo lomate yila-yilateelo mao̒ mongo tau̒wa lo Isirai̒lu tadonggo hitihula to Bele lo Eeya.

⁷ Allahu Taa̒ala lotahuda ode limongolio, “Pokootoloa mao̒ Bele-U̒ botie! Poo̒poluwalo papaangio wolo mimii-lateyaalo. Tumuliilo!” Yi timongolio olo malo lumulo helomate yila-yilateelo mao̒ tau-tauwalo todelomo kota.

⁸ Ngotilonggadu polongolota boito pohupohutu, watia woluo teto tutuuwau. Watia losujudu wau longiibodu, “Eeya Taa Laba-labaalo molanggato, ambunguolo tingga mao̒dito muluka lo Eeya ode Yerusalemu tilinggula Eeya ohilaa momate-mateelo mao̒ ngoa̒amila taa u donggo woluo to Isirai̒lu botie?”

⁹ Allahu Taa̒ala lolameto, “Tau-tauwalo Isirai̒lu wau Yehuda malohutu dusa u mailaba udaa̒. Timongolio helomate yila-yilateelo mao̒ to utoonulalo tambati, wau Yerusalemu hepilo kootolo wolo u moleeto. Timongolio hemoloi̒ya deu̒ Wau̒, Eeya, malo lolaa mao̒ lipu botie tilinggula diilla mowali moo̒onto huhutu limongolio.

¹⁰ Wau̒ diila tamomonu mai olimongolio. Mapohutuwo-U̒ mai ode limongolio wolo u hepilohutu limongolio ode taa wewo.”

¹¹ Lapatao̒ taa u hipakea lineni boito luli lohualingo wau lopo duloheo̒ ode Eeya, ualio mao̒, “Ngoa̒amila palenta lo Eeya mapilohutu.”