YEHESKIEL 8 - KITABI HABARI MOPIOHE

TEI YEHESKIEL LOO̒TODUO BIBILOHU OLUOLIO PASALI LO ALLAHU TAA̒ALA 8:1–10:22 Polotuboa balaahala to Yerusalemu

¹ To dulahu olimolio hulalo olomio totaunu olomio tomaasa amiaatia pilolayahu, mongo tau̒wa lotau-tauwalo Yehuda tahe pilolayahu lonao̒ mai ode bele lowatia wau lotihuloa̒ wolaatia. Debolo okokawasa lo Eeya Taa Laba-labaalo molanggato longaawasa mai olaatia.

² Watia yilumanggela mola wau loo̒onto hitua-tuawua udebo odelo manusia. Monto wohutalio ode walungo tio oontonga debo odelo tulu, wau monto wohutalio ode yitaato tio oontonga inta mao̒ inta mao̒ debo odelo polunggu u ilii̒ito.

³ Tio lohudu mai hitua-tuawua udebo odelo uluu̒, tulusi lopo tataambangao̒ huwoo̒ lowatia. Lapatao̒ todelomo bibilohu boito, watia bilintai̒o mola molanggato ode dulente lo Rohullah wau dilelolio ode Bele lo Eeya to Yerusalemu, ode huhebu potuwotalo ode palepelo delomio u to ambahu tilayo. Mota teto woluo bui̒ balaahala umalo potoodei muluka lo Allahu Taa̒ala.

⁴ Lapatao̒ watia losakusi mao̒ baango intamao-intamao̒ u tuotio owoluo Allahu Taa̒ala lo Isirai̒lu, debo odelo u iloontonga lowatia tou̒ watia tobiihu Dutulaa Kebar.

⁵ Allahu Taa̒ala lotahuda mai odelaatia, “Wuu manusia panaa, pomilohulo mota ode ambahu tilayo.” Watia lodudua̒, wau to ambahu mesba totili lo dalalo potuwotalo, iloontonga lowatia balaahala umalo potoodei muluka lo Allahu Taa̒ala boito.

⁶ Allahu Taa̒ala lotahuda mai odelaatia, “Wuu manusia panaa, tingga iloontongamu wolo u donggo todutoduo? Poo̒tuotilo ngoa̒amila huhutu u moo̒olonuo̒ u pilohutu taulo Isirai̒lu, tahelo halahe ola-U̒ lonto Bele-U̒! Dulo, mapo bilohu-U̒ mai olemu susuu-aliyaalo ulebe mokootolo mao̒ poli.”

⁷ Lapatao̒ dilelo-Lio watia ode huhebu potuotalo ode paango bulemengio wau pilopo bilo-Hio huwango tuwau to dingingo meeseli.

⁸ Tahudaa-Lio mai odelaatia, “Wuu manusia panaa, podamanga mola huwango botie.” Lapatao̒ pilohutu lowatia, iloontonga lowatia huhebu tuwau.

⁹ Tahudaa-Lio odelaatia, “Tuwotoolo wau bilohilo ngoa̒amila huhutu u kootolo wau moo̒olonuo̒ u hepilohutu limongolio teto.”

¹⁰ Waatia olo tolimuwotao̒ wau lomilohu. Didii-ngingaalo meeseli lohuwali leidaa̒ boito pilaisaka wolo totoonulalo tulidu hidala-dalaala wau bibii-natangiyalo halamu wewolio, wau olo paisaka balaahala hidala-dalaala u hepujaa taulo Isirai̒lu.

¹¹ Pitu lopulu lota tau̒wa lo Isirai̒lu woluo teto, leituwoto tei Yaa̒janya walae̒e Sapan. Ngota-ngota hidihuma tambati lo tapahula tuwau u wobuwobulo poloo̒.

¹² Allahu Taa̒ala lotahuda mai odelaatia, “Wuu manusia panaa, tingga iloontongamu wolo u hepilohutu lomongo tau̒wa Isirai̒lu wolo poo̒poo̒oyo? Timongolio helo tabiya todelomo huwali leidaa̒ u polupolu balaahala wolo alaasani deu̒ Wau̒ malo lolaa lipu botie wau diila loo̒onto huhutu limongolio.”

¹³ Lapatao̒ Eeya lotahuda mai odelaatia, “Yio̒ mamoo̒onto olimongolio mohutu sua̒li ulebe moo̒olonua̒ poli.”

¹⁴ Yi madilelo-Lio watia ode hulubangi tilayo Bele lo Eeya wau pilopo bilo-Hio olaatia mongobua tahe hiyonga to opopate lo Dewa Tamus.

¹⁵ Eeya lohintu olaatia, “Wuu manusia panaa, tingga iloontongamu uito? Donggo dadaata poli ulebe moo̒olonuo̒.”

¹⁶ Dilelo-Lio mota watia ode palepelo delomio Bele lo Eeya. Totili lo huhebu potuwotalo ode huwali leidaa̒ mantali, towolota lomesba wau hulipilo, woluo dulo pulaa limo lota. Timongolio helo bulemengo huwali leidaa̒, wau losujudu ode ambahu tiimuru hipoluboa mato lodulahu butubutu mai.

¹⁷ Eeya lotahuda mai odelaatia, “Wuu manusia panaa, tingga iloontangamu uito? Tau-tauwalo Yehuda botie diila molaasa sanangi wonu bo mohutu susuu-aliyaalo u moo̒olonua̒ boito wau mohutu mao̒ ngoa̒amila huhutu u diila omanusia to ngoilanggubu lipu. Timongolio tumbao̒ hipohuta ngoa̒amila boito tewe, todelomo Bele-U̒ wau helohutu ola-U̒ lebe muluka poli. Bilohilo woloolo mola timongolio helohina ola-U̒ wolo dudelo ulaba-labaalo kootolo botie!

¹⁸ Timongolio mamolaasa mao̒ mulukaa-U̒ u moo̒tihela hapato! Wau̒ diila tamomaa̒apu wau mongambungu mai olimongolio. Eleponu timongolio monguatio̒ modua̒ ode Olau̒ wolo moo̒ohuu̒-huu̒ulo mao̒, Wau̒ diila mohuto modungohe!”