YEHESKIEL 7 - KITABI HABARI MOPIOHE

Oa̒antulu Isirai̒lu maleembidei

¹ Eeya lotahuda mai odelaatia,

² “Wuu manusia panaa, Wau̒, Eeya Taa Laba-labaalo molanggato, ohilaa motahuda mai utie ode huta lo Isirai̒lu: Uti-utieelo pulito hikaayati lo ngoilanggubu lipu botie!”

³ Eeya lotahuda mai, “Wuu Isirai̒lu, botia malei dungga opopulitumu. Yio̒ mamolaasa mao̒ mulukaa-U̒. Yio̒ maa̒adiliyo-U̒ motuuu̒de wolo huhutuumu u kootolo.

⁴ Wau̒ diila tamomonu meaambo mongohi mai ambungu olemu. Wau̒ mamo hukuumani mai olemu motuuu̒de wolo totoonulalo okootolo u mapilo hutumu. Yi mao̒ taawamu lomola deu̒ Wau̒ulo Eeya.”

⁵ Uti-utieelo u pilotahuda mai lo Eeya Taa Laba-labaalo molanggato ode bangusa lo Isirai̒lu, “Baala domi baala mamolemba olimongoli.

⁶ Botia totoonulalo u hitua-tuawua malo paluto. Uti-utieelo opopulitumu. Diduu̒ halapani olemu.

⁷ Totoonulalo u hitua-tuawua malo paluto olemu, wuu bangusa tahi biluloa̒wa tohuta botie. Botia diduu̒ popoo-tihungguwalo to memees-bawaalo to hihui̒-hui̒dea, u woluo bo tolonggalo wambai̒o.

⁸ Diilalo mohiheo timongoli mamolaasa mao̒ mulukaa-U̒ u moo̒tihela hapato. Timongoli adiliyo-U̒ motuuu̒de wolo huhutuumu. Mapomalasi-U̒ mai ode olemu totoonulalo huhutuumu u mokootolo.

⁹ Wau̒ diila tamomonu meaambo mongohi mai ambungu ode olemu. Wau̒ mamo hukuumani mai olimongoli motuuu̒de wolo totoonulalo okootolo u mapilohutu limongoli. Yi mao̒taawa mao̒ limongoli deu̒ Wau̒ulo Eeya wau Wau̒ulo tamo hukuumani mai olimongoli.”

¹⁰ Dulahu baala ode bangusa lo Isirai̒lu malei dungga. Diila omanusia bolo to utoonulalo mao̒ odungga. Osombongi loo̒oma demola bolitutui̒o.

¹¹ Diila omanusai loo̒sababu lebe dadaata u moleeto. Ngoilanggubu okokaya, odudaa̒ wau laito ohaasili limongolio mamopulito wau diila obakasi.

¹² Wakutuulio hua̒a meidungga, dulahio malo himbidei! Tamootalia wau tamoo-potaalia diila moo̒tapu uuntungi wolo-wolo, sababu hukuumani lo Allahu Taa̒ala mamolemba ngoa̒amila tau.

¹³ Diaaluo daahangi tamaa ohiangio muli moo̒tapu wolo u mapilo taliilio, sababu muluka lo Allahu Taa̒ala molemba penu boli olo tatoonu. Taa u moleeto diila tamoa̒ahu.

¹⁴ Torompeti motingohu wau ngoa̒amila tau motidapa-dapaato. Bo diaaluo penu boli ngotaa mao̒ momonggato ode tambati lo popaatea, sababu muluka lo Allahu Taa̒ala molemba ngoa̒amila tau.

Hukuumani sababu duduu-sawaalo Isirai̒lu

¹⁵ To dadaa-lalaalo kota woluo popaatea, to bebee-leyaalo owembelo lo ngongoto wau polobiti. Penu boli tatoonu tawoluo to bulemengo kota maamate todelomo popaatea, wau tabilu-biluloa̒ tokota mamowali bake lo ngongoto wau lo polobiti.

¹⁶ Ngotayadu mamolopato wau molahi ode hihui̒-hui̒dea. Mota teto timongolio madebo odelo bubuu-lungiyaalo pombo u yilanengo lonto luluu-mbayaalo; ngoa̒amilalo mamopo ilaalo suusa sababu duduu-sawaalo limongolio.

¹⁷ Timii̒du tau mamowali molulupuhu uluu̒lio wau moe̒etu huu̒lio.

¹⁸ Timongolio mamomake kaingi yute wau ngangaa-waa̒alo mao̒ mahulu-huluhelio. Lunggongi mongolio mapo-dayatolio wau timongolio poo̒olitolio.

¹⁹ Hulawa wau talaa̒ matapilo limongolio to dalalo debo odelo puputo, sababu to dulahu Eeya mopomukaa̒i omulukaa-Lio, hulawa wau talaa̒ boito diila moo̒ poa̒ahu olimongolio, tumbao̒ malo podehu olimongolio ode delomo dusa. Timongolio diila mowali mopohuna mao̒ u mopotolu napusu meaambo u moluango ombongi mongolio.

²⁰ Muloololio mai timongolio meengahu wolo poliyoto limongolio u gaaga, bo sababu timongolio helo pohuna mao̒ u mohutu babaa-laahalaalo u moo̒lonuo̒, yi Eeya lohutu mai halata limongolio boito lowali tuwalio u moo̒tihela hapato.

²¹ Eeya lotahuda mai ode bangusa lo Isirai̒lu, “Wau̒ mamopoluli tau-tauwalo deli molambata olimongoli. Tahileeta mamolambata halatamu wau moponajisi mao̒.

²² Wau̒ diila tamo ulambohe wonu Bele-U̒ lusaalio wau ponajisio lo tahipo lambatawa.

²³ Ngoilanggubu lipu mowali mopuuyoto; to utoonulalo mao̒ odungga polomatea mate-mateelo mao̒ wau diila omanusia.

²⁴ Babaa-ngusawalo talaba-labaalo diila omanusia mapodungga-U̒ mai u motitomele to bebee-leyaalo limongoli. Tahi jaagoa limongoli talaba-labaalo molotolo boli buheli daa̒ mahumuhela wonu bolo babaa-ngusawalo boito poluli-U̒ mao̒ mongaantulu tataa-mbatiyalo potabiaamu.

²⁵ Timongoli odungga lou̒ suusa lohilao wau mooli halaapani, lapatao̒ mololohe ududame, bo diila odungga limongolio.

²⁶ Baala wau habari mobulilo mamei dungga diila obuntoolio. Timongoli mamohile alihu mongo nabi mohuto molaamali, bo timongolio diila mowali. Wau olo mongo iimamu diila owolo-wolo u pongaajali mao̒ limongolio ode umati, wau mongo tau̒wa opulita lo nasehati.

²⁷ Olongia mahumoyongo, walao̒ talolai̒ li olongia mooli halapani wau ulipu mahumuhela lou̒ moohe. Wau̒ mamo hukuumani mai olimongoli motuuu̒de wolo totoonulalo huhutuumu, wau momutoo̒ olimongoli debo odelo timongoli lomutoo̒ taa wewo. Yi mao̒taawa mao̒ limongoli deu̒ Wau̒ulo Eeya.”