YEHESKIEL 6 - KITABI HABARI MOPIOHE

Eeya lolaa̒anati polotuboa to balaahala

¹ Eeya lotahuda mai odelaatia,

² “Wuu manusia panaa, bilohilo mola huhuu-ideyaalo Isirai̒lu, wau potunggula mota tahulii-U̒ pasali lo hukuumani ode limongolio.

³ Ahuliilo timongolio modungohe wau mopoo̒tuota wolo u Wau̒, Eeya Taa Laba-labaalo molanggato motahuda mai ode huhuu-ideyaalo boito, wau olo ode huhuu-luduwaalo, luluu-mbayaalo. Otutu, Wau̒ mamolao wamilo u mongantulu tataa-mbatiyalo polubowalo balaahala.

⁴ Memees-baalio malohubuolo wau tambati hepodupaalio mapoo̒olo. Ngoa̒amila tau mota teto mapateelio mate-mateelo mao̒ totalu lo balaa-halaalio.

⁵ Wau̒ mamohutu mao̒ mimii-lateyaalo Isirai̒lu mopupuulepe; wau tutuu-lalowaalo limongolio mapoo-pulepe-U̒ to palito lo memees-bawaalo boito.

⁶ Ngoa̒amila kota lo Isirai̒lu maa̒ntuluolo, ngoa̒amila mesba wau balaa-halaalio moa̒ntulu mopupuulati, tambati hepodupaalio moa̒mbulati lomao̒, wau totoonulalo wolo u pohutuo limongolio mamooli.

⁷ Penu boli to utoonulalo mao̒ woluo taa u opatealio mate-mateelo mao̒, wau timongolio tamoa̒ahu mamotota deu̒ Wau̒ulo Eeya.

⁸ Ngotayade kikiio̒ limongolio malopato-U̒ monto pongolotalo boito bo timongolio mapobubuua̒laalo-U̒ towolota lo babaa-ngusawalo;

⁹ mola teto timongolio tumumula todelomo polayahu. Lapatao̒ timongolio mamoe̒ela ola-U̒ boli mongalati deu̒ Wau̒ mohukumani wau mohina olimongolio sababu hilaa limongolio diila tatapu wau molotolo hilao to Olau̒. Timongolio malo lolaa ola-U̒ wau lolulaota balaahala odelo tulou̒u-U̒. Lapatao̒ timongolio mamolonuo̒ to batangaa limongolio lohihilao sababu totoonulalo ololeeto wau okootolo u mapilohutu limongolio.

¹⁰ Yi timongolio mamotota mao̒ deu̒ Wau̒ulo Eeya wau deu̒ ngoa̒amila poe̒ela u yilohi-U̒ diila aa̒an-jamuwalo u toongi ngoa̒amilalo.”

¹¹ Eeya Taa Laba-labaalo molanggato lotahuda mai, “Potisuu-kaliilo lohilao! Pohilimutolo! Pohiyongolo mola wolo suukali daa̒ sababu totoonulalo ololeeto wau okootolo u mapilohutu bangusa lo Isirai̒lu. Timongolio maamate sababu popaatea, polaangolo wau wembelo lo ngongoto.

¹² Timongolio ngoa̒amila mamolaasa luhu wolo majanunu lo omulukaa-U̒. Tau-tauwalo tahi lamingawa to polayahu mamo ngongoto lapatao̒ mate; taa u meembidu maamate todelomo popaatea, wau labitio maamate lo polaango.

¹³ Mimii-lateyaalo limongolio mopupuulepe towolota lo babaa-laahalaalo wau memees-bawaalo, meipulepe to timii̒du huludu u molanggato, wau to bolitutuo̒ lotimii̒du hui̒du, towalungo lo timii̒du bungo lo ayu u mohimbungo wau totimii̒du bungo lo ayu uleidaa̒; limbui̒o mao̒, penu boli tou̒toonu wambai̒o timongolio momobu bake ode balaahala limongolio. Yi timii̒du tau mamotota deu̒ Wau̒ulo Eeya.

¹⁴ Ooo̒, Wau̒ mamomintaa̒ uluu̒u-U̒ wau mongantulu lipu limongolio, tilinggula mowali moliilo daa̒, tumulalo mai monto Huta Luasi u Delita Huliaalio demola kota Ribla to tilayo. Monto tataa-mbatiyalo u potibiluloa̒ taulo Isirai̒lu, diaaluo penu boli tuwau mao̒ mamoa̒ahu. Yi otaawalo lotaa ngoa̒amila deu̒ Wau̒ulo Eeya.”