YEHESKIEL 5 - KITABI HABARI MOPIOHE

Tei Yeheskiel lomatahe huwoi̒o

¹ Eeya lotahuda mai, “Wuu manusia panaa, pohamaalo wamilo u molalito wau pomakeyalo uito u monguluhe tunggula mopulito danggu wau huwou̒mu. Lapatao̒ timenga mao̒ huwoo̒ boito to titimenga lapatao̒ tayadeelo tolo tayadu.

² Ngotayade totolu musi tumbilamu to huungo kota boito lapatao̒ polomalawa mopaluto. Ngotayade totolu poli musi ganjoolo wolo wamilumu sambela mohelili kota boito. Wau ngotayade totoolu u pulitio musi pomua̒yadulo ode dulente, lapatao̒ Wau̒ mohilapitao̒ wolo wamilu-U̒.

³ Tolai mao̒ ngoi̒di monto huwoo̒ boito wau bolulaalo todelomo lupi lo jumbamu.

⁴ Lapatao̒ muli pohama ngoi̒di monto huwoo̒ boito, pomahulalo ode delomo tulu wau hulii mao̒ mopobu. Monteeto tulu boito maa umalapo ode ngoilanggubu bangusa lo Isirai̒lu.”

⁵ Eeya Taa Laba-labaalo molanggato lotahuda mai, “Bilohi, uti-utieelo Yerusalemu. Kota botie pilopo tambati-U̒ to pilobutua mai lo dunia, wolo lilii-puwaalo wewo to palitio.

⁶ Bo Yerusalemu malo potouli palentaa-U̒ wau loi̒laalo mai lebe moleeto wolo babaa-ngusawalo wewo, tumbao̒ lebe diila lodungohe wolo lilii-puwaalo to palitio. Yerusalemu helo lambanga ngoa̒amila palentaa-U̒ wau diila lohuto lodungohe butoo̒o-U̒.”

⁷ Eeya Taa Laba-labaalo molanggato lotahuda mai, “Wuu Yerusalemu, dungohilo! Yio̒ diila lodungohe ngoa̒amila palentaa-U̒ wau butoo̒o-U̒; yio̒ lebe baaa̒ngiolo wolo babaa-ngusawalo wewo to palitumu, wau malo dudua̒ uu̒udu lo babaa-ngusawalo boito.

⁸ Yi Wau̒, Eeya Taa Laba-labaalo molanggato, mopoi̒laalo mai deu̒ Wau̒ yito musuumu. Yio̒ mahukuu-maniyo-U̒ totalu lo babaa-ngusawalo wewo.

⁹ Sababu totoonulalo huhutuumu u olonuu̒u-U̒, ulipumu mahukuu-maniyo-U̒ debo odelo u diipo pee̒enta mao̒ hepilohutu-U̒ wau diilalo pohutuwo-U̒ mai.

¹⁰ Mongo dulaa̒ mamolamela walai̒o lohihilao wau walao̒ mamolamela mongo dulaa̒alio. Odieelo mola timongolio mahukuu-maniyo-U̒ mai, wau tadonggo tumutumulo mapo-bubuua̒la-U̒ ode totoonulalo tutulio.

¹¹ Wau̒ yito Allahu Taa̒ala tatumu-tumulo, Eeya Taa Laba-labaalo molanggato, wau uti-utieelo potahudaa-U̒ mai: Sababu yio̒ malo pokootolo Bele-U̒ wolo totoonulalo huhutuumu u moleeto wau moo̒lonuo̒, yi Wau̒ mamongantulu olemu lou̒ diila o ambungulio.

¹² Ngotayade totolu ulipumu maamate sababu wembelo lo ngongoto wau polobiti u molemba kota. Ngotayade totolu mao̒lootolo wolo wamilo to bulemengo kota, wau ngotayade totolu poli mapo pulepee-U̒ ode totoonulalo tutulio wau maila-yilapita-U̒ wolo wamilo.

¹³ Yio̒ mamolaasa otihela hapato lo omuluka wau tuhuwo-U̒ wolo majanunu tunggula Wau̒ molaasa olulia lohilao. Lapatao̒ ngoa̒amila boito motoduo mai, yio̒ mayakini deu̒ Wau̒, Eeya, malo tahuda mai ode olemu sababu Wau̒ lomuluka to odiila tatapu wau olootolo hilaamu.

¹⁴ Yio̒ mamowali tutuu-wodeyaalo wambai̒o wau babaa-ngusawalo to palitumu mamohentea̒ olemu; timii̒du taa u lumaodeo̒ mamopo halahe batanga monto olemu.

¹⁵ Wonu Wau̒ muluka wau laba-labaalo muluka olemu boli mohukuumani mai olemu, ngoa̒amila bangusa to palitumu mamolaasa timihela hapato. Timongolio mamohantia olemu wau mojijio̒ mooonto olemu

¹⁶ Wau̒ mamopo binasa polodapato lo ua̒alomu wau mopoluli mao̒ ulipumu polaangolo. Timongolio mamolaasa suukali lohilaalio laasa polaangolo, debo odelo walao̒ pana molalito u molaapata wau mopobinasa olemu.

¹⁷ Ngopohia baala lo polobiti mapodungga-U̒ mai olo wembelo lo ngongoto, diila omanusia wau popaatea u momate ulipumu mate-mateelo mao̒, wau bibii-natangiyalo mongantau u momate mongo walai̒ mongolio mate-mateelo mao̒. Wau̒, Eeya, malo tahuda mai.”