YEHESKIEL 44 - KITABI HABARI MOPIOHE

Dudelo lou̒ momake hulubangi tiimuru

¹ Lapatao̒ talolai̒ boito luli lodelo poli olaatia ode hulubangi bulemengio to ambahu tiimuru tomadala Bele lo Eeya. Hulubangi boito heu̒heu̒uto,

² Eeya lotahuda mai odelaatia, “Hulubangi botie musi debo heu̒heu̒uto wau diila mowali huo̒olo. Diaaluo penu boli ngotaa mao̒ tamowali tumuwotao̒, sababu Wau̒, Eeya Allahu Taa̒ala lo Isirai̒lu, maa tilumuwotao̒ loli hulubangi botie. Oditolio, hulubangi botie musi debo heu̒heu̒uto.

³ Bo takawa-kawaasa tahemo malenta mowali monao̒ mota ode hulubangi boito u molamela ua̒alo u mantali totalu-U̒. Tio musi tumuwoto moli huwali leidaa̒ wau muli mohualinga moli dalalo boito olo.”

Iijini u tumuwoto ode Bele lo Eeya

⁴ Lapatao̒ talolai̒ boito lodelo olaatia ode hulubangi tilayo u tataalua wolo Bele lo Eeya. Watia lopoo̒tuoto, wau watia loo̒onto Bele lo Eeya boito yilanggube lotinelo molilingga u tuotio owoluo lo Eeya. Lapatao̒ watia lopowombahe mola batanga wau losujudu,

⁵ wau Eeya lotahuda mai odelaatia, “Wuu manusia panaa, poo̒tuotilo tio̒otutua wolo u iloontongamu wau u ilodungohemu. Wau̒ mamo poo̒taa mai olemu totoonulalo wuu̒du wau butoo̒ tomimbihu Belee-U̒ botie. Tuladeelo mopio-piohuulo mao̒ tatoonu-toonu tamowali tumuwota ode Bele-U̒ wau tatoonu-toonu tadinidini.

⁶ Polelea mao̒ to umati lo Isirai̒lu tao̒hilaa momalakala boito deu̒ Wau̒, Eeya Taa Laba-labaalo molanggato, diilalo motohilaa mopoluli olimongolio hipohutua u najisi.

⁷ Timongolio malo ponajisi Belee-U̒, sababu tou̒ tabo wau duhu lobake donggo hepodewolo ode Olau̒, timongolio helo poluasi totau-tauwalo hideelia tadiila tiluuna tilumuwota ode delomio, wau tadiila modungohe ola-U̒. Wolo totoonulalo huhutu limongolio u moo̒olonuo̒ boito, timongolio malo lambanga daantia-U̒ woli mongolio.

⁸ Madiila timongolio lohihilao tahe lopowoluo mao̒ uu̒u-pacalawalo mantali todelomo Belee-U̒, bo tau-tauwalo hideelia tailohia limongolio tuugasi u mopohutu mao̒.

⁹ Wau̒, Eeya Taa Laba-labaalo molanggato, mopo malalumu mai deu̒ tau deli tadiila tiluuna wau taa u diila modungohe ola-U̒, diila mowali tumuwoto ode Belee-U̒. Uito pohupohutu olo ode tau deli tabilu-biluloa̒ tohuungo bangusa lo Isirai̒lu.”

Tau-tauwalo Lewi heilualio lonto huhuloa̒a lo iimamu

¹⁰ Eeya lotahuda mai odelaatia, “Wau̒ mamo hukuumani mao̒ tau-tauwalo Lewi tadonggo pee̒-pee̒enta wolo tau-tauwalo Isirai̒lu wewolio, tamalo lolaa ola-U̒ wau helolubo balaahala.

¹¹ To delomo Belee-U̒, timongolio bo mowali momaya ola-U̒ odelo kaliyaawani wau tamoo-dahawa hulubangi. Timongolio mowali mongolotao̒ bibii-natangiyalo duo̒lo bake yilalango wau dewo, wau timongolio wajibu u laito momaya to umati.

¹² Bo kalana timongolio malohutu upacala polubowalo balaahala duo̒lo bangusa lo Isirai̒lu, wau wolo dudelo boito helo aanga bangusa boito ode delomo dusa, yi Wau̒, Eeya Taa Laba-labaalo molanggato, motadia mai deu̒ timongolio musi hukuu-maniyolo.

¹³ Timongolio diilalo mowali momaya ola-U̒ odelo iimamu meaalo modedeta wolo u mantali ode Olau̒, meaalo tumuwotao̒ tambati U Laba-labaalo mantali. Uitolo hukuumani to huhuu-tuwaalo u najisi u mapilohutu limongolio.

¹⁴ Botia timongolio wohiya-U̒ tuugasi u mohutu mao̒ kalaja bangganga u palalu ponao̒lo to Belee-U̒.”

Mongo iimamu

¹⁵ Eeya Taa Laba-labaalo molanggato lotahuda, “Tou̒ bangusa lo Isirai̒lu lololaa mao̒ ola-U̒, mongo iimamu lo Lewi lonto wali mai lei Jadok, debo molotolo hilao hemomaya ola-U̒ to Belee-U̒. Sababu uito timongoliolo tabotia musi momaya ola-U̒ wau mai motaalua wola-U̒ u mopodewo mao̒ tabo wau duhu lo kukuu-lubaniyalo.

¹⁶ Bo timongolio wambao̒ tamowali tumuwota ode Belee-U̒, momaya ola-U̒ to mesbaa-U̒, wau motitau̒wa ibaadati to Belee-U̒.

¹⁷ Tou̒ timongolio tumuwoto huhebu hulubangi motidulunga ode palepelo delomio, timongolio musi momake pakeyangi lineni. Diila mowali timongolio momake pakeyangi monto lambuto binatangi u moa̒aluti debo odelo lambuto himba wonu donggo hemotuugasi to palepelo delomio, meaalo todelomo Belee-U̒.

¹⁸ Alihu diila odungga lopatu wau wulataalo, timongolio musi momake talala lineni diila obintolo wohuta, wau buuhuto lunggongo monto lineni.

¹⁹ Wonu timongolio monao̒ ode paango bulemengio, tou̒toonu umati hia̒mbua, mongo iimamu boito musi molopata pakeyangi dinasi limongolio to huhuu-waliyaalo mantali todelomo Belee-U̒, lapatao̒ momake pakeyangi uwewo, alihu pakeyangi poheetu boito diila moo̒ topotala to umati.”

²⁰ Mongo iimamu diila mowali monguluhe tunggula dayato lunggongi mongolio, meaalo mopoluli huwoi̒o talenga. Huwoa̒a boito musi huntingalo limbu-limbuo̒ modudua̒ wuu̒du u tilantu mao̒.

²¹ Timongolio diila mowali mongilu angguru wonu ohilaa tumuwota ode palepelo delomio.

²² Mongo iimamu bo mowali monika wolo mongo dulahu lo Isirai̒lu tadiipo ilodedeta lomongo lolai̒ meaalo ngotaalio lojanda li iimamu. Timongolio diila mowali monika wolo taabua taa bilua̒yalio.

²³ Mongo iimamu musi mongaajali to umati-U̒ u mopohiihede toonu u poheetu ode Olau̒ wau toonu udiila, toonu ubelesi modudua̒a to agama wau toonu unajisi.

²⁴ Wonu tumoodu hulinggila tomimbihu palakala lobutoo̒, timongolio musi mopoo̒ lapatao̒ motuuu̒de wolo bubuu-too̒o-U̒. Timongolio musi moporame potihunggu lo agama, modudua̒a wuu̒du wau butoo̒o-U̒, wau mohulumati Saabati odelo dulahu u poheetu ode Olau̒.

²⁵ Ngotaalio li iimamu diila mowali moponajisi batanga lou̒ modedeta milate, ngopohia milate lomongo dulaa̒alio, walai̒o, wutatio talolai̒ meaalo wutatio taabua tadiipo lonika.

²⁶ Lapatao̒ tio muli mobelesi mao̒, tio musi muli mohima pituhui mola,

²⁷ lapatao̒ monao̒ ode palepelo delomio lo Belee-U̒, wau mopodewo bake u mopobelesi batangalio alihu tio mowali motuugasi poli to Belee-U̒. Wau̒, Eeya Taa Laba-labaalo molanggato malo tahuda mai.

²⁸ Mongo iimamu mololimo huhuloaa̒ iimamu boito odelo bagiaangi limongolio lou̒ wolo uiludu-U̒ ode bangusa lo Isirai̒lu wawaalia mola. Timongolio diila mowali ohaku wolo-wolo to Isirai̒lu: Wau̒ulo halata limongolio.

²⁹ Timongolio musi tumumula monto dewo lopale, bake polulutalo dusa, wau bake poluloo̒ uiluhi; wau totoonulalo u hitua-tuawua u mapilo tolomodu ode Olau̒, musi wohi mao̒ ode limongolio.

³⁰ Mongo iimamu musi wohiyalo tayade u mopiohe daa̒ monto totoonulalo tilapulo sembo u hidala-dalaala u bohulio, wau monto wolo wambai̒o u pilodewo mai ode Olau̒. Timii̒du bangusa lo Isirai̒lu mohutu mao̒ roti, yi roti ubohulio yito duo̒lo mongo iimamu. Yi Wau̒ mamo balakati bebee-leyaalo bangusa lo Isirai̒lu.

³¹ Bulungi wau bibii-natangiyalo wewo u yilate lohihilao, meaala u dilangapo binatangi mongantau, diila mowali aalo lomongo iimamu.”