YEHESKIEL 43 - KITABI HABARI MOPIOHE

Eeya luli lohualinga ode Bele-Lio

¹ Lapatao̒ talolai̒ boito lodelo olaatia ode hulubangi u talutalu ode tiimuru,

² wau teteetolo iloontonga lowatia dungga-dungga mai monto wimbihu tiimuru tinelaa molilingga u tuotio owoluo Allahu Taa̒ala lo Isirai̒lu. Suala lo Allahu Taa̒ala dungo-dungohei debo odelo hulaubio lo auhe daa̒, wau dunia hei̒nta-intaawa sababu tinelaa owoluo lo Allahu Taa̒ala.

³ Bibilohe boito tutuuwauwa debo odelo u iloontonga lowatia tou̒ Allahu Taa̒ala dungga-dungga mai lopobinasa Yerusalemu, wau debo odelo u ilootonga lowatia to Dutulaa Kebar. Lapatao̒ watia lopowombahe batanga wau losujudu lomola.

⁴ Tinelaa molilingga boito ilumoliyoo̒ lolibaya hulubangi tiimuru tulusi tilumuwota ode delomo Bele lo Eeya.

⁵ Rohu lo Eeya lomintaa̒ olaatia wau lodelo mota ode palepelo delomio; teto iloototonga lowatia Bele lo Eeya yilanggubei lo tinelaa owoluo lo Eeya.

⁶ Tou̒ talolai̒ boito donggo tihu-tihula totili lowatia, ilodungohe lowatia Eeya lotahuda mai odelaatia lonto delomio Bele lo Eeya, tahudaa-Lio,

⁷ “Wuu manusia panaa, uti-utieelo tambati huhuloa̒a-U̒. Teteewelo Wau̒ mamoti biluloa̒ tohuungo umati lo Isirai̒lu wau momalenta olimongolio ohiheo-hiheolo mao̒. Mopio timongolio, meaalo mongo olongia limongolio, diilalo mopokootolo tanggulu-U̒ u mantali wolo molubo balaahala meaalo wolo molobungo milate lomongo olongia limongolio totambati botie.

⁸ Muloololio mai mongo olongia limongolio helohutu kokoo-sengiyalo wau huhuu-hebuwaala lo Bele-U̒, tilinggula bo woluo dingingo tuwau wambao̒ to wolotalio. Timongolio malo pokootolo tanggulu-U̒ u mantali wolo huhutu limongolio u moo̒olonuo̒. Sababu uito pobinasaa-U̒ mai timongolio todelomo omulukaa-U̒.

⁹ Bo tumulalo mai botia timongolio musi mohuheli molubo balaahala wau molimbata milate lomongo olongia limongolio. Lapatao̒ uito, Wau̒ mamoti biluloa̒ tohuungi mongolio u ohiheo-hiheolo mao̒.”

¹⁰ Lapatao̒ Eeya luli lotahuda, “Wuu manusia panaa, polelea mao̒ ode umati lo Isirai̒lu pasali lo Bele-U̒ botie, wau ahuliilo timongolio motulete hitua-tuawua u mapilaa-tujulio. Pohutuwalo timongolio mowali moolito sababu totoonulalo dusa limongolio.

¹¹ Wau lapatao̒ timongolio moolito sababu totoonulalo huhutu limongolio, tombaanga mao̒ hitua-tuwaua u mapilatuju pasali lo Bele-U̒ botie olimongolio: modeliilio, huhuu-hebuwaalo potuwota wau poluwala-Lio, susuunani hitua-tuawua u bilongulio, totoonulalo wuu̒du wau bubuu-too̒waalo. Tuladee mao̒ ngoa̒amila boito olimongolio alihu timongolio mowali moo̒onto wau mopoo̒tuoto dudelo lou̒ mongaatulu ngoa̒amila, wau modungohe ngoa̒amila wuu̒dulio.

¹² Uti-utieelo tolomodu siipati Bele lo Eeya: Ngoilanggubu madala palitio to botitutuo̒ hui̒dee yito laba-labaalo mantali.”

Mesba

¹³ Uti-utieelo tuuu̒du lomesba modudua̒ tuu̒udu u pilomake moluu̒ude Bele lo Eeya. To palito oa̒ato mesba o tanggi tuwau u delomio ngoputu lomeeteri wau tanggalio olo ngoputu lomeeteri, wolo siipati tobiihu bulemengio langgatio ngotayade wopato lomeeteri.

¹⁴ Monto tanggi demola pilito mesba u walungio daa̒, langgatio ngomeeteri. To wimbihu huungio langgatio dulo meeteri, wau ngoputu lomeeteri lebe meepita wolo to helili oa̒ato mesba. Wimbihu otolulio, dei̒yito-yito bolitutuo̒ mesba, olo ngoputu lomeeteri lebe meepita wolo helili wimbihu huungio.

¹⁵ Wimbihu otolulio botie yito tambati polalangalo bake; langgatio dulo meeteri. To opaato tutuulio woluo bagiaangi u wuduwudu debo odelo tunge.

¹⁶ Bolitutuo̒ mesba boito modeliilio tutuulio wopato; timii̒du biihio tuu̒udio wolomo meeteri.

¹⁷ Bagiaangi huungio olo tutulio wopato, timii̒du biihio tuu̒udio pitu lomeeteri, wolo tuwau biihio to siipati bulemengio u langgatio ngotayade wopato lomeeteri. (Tanggalo tanggilio ngoputu lomeeteri). To biihio ambahu tiimuru otua̒adu dulu-dulunga ode bolitutuo̒ mesba.

Pomantaliyalo mesba

¹⁸ Eeya Taa Laba-labaalo molanggato lotahuda mai odelaatia, “Wuu manusia panaa, dungohilo wolo potahudaa-U̒ mai olemu. Wonu mesba boito mailapato bilongu, yio̒ musi mopomantali wolo molalanga bake toitaatio wau mopoteatao̒ duhu lobake.

¹⁹ Bo ti i̒imamu wali mai lei Jadok monto suku Lewi wambao̒ tamowali modudulai ode Olau̒ u mohutu ibaadati. Wau̒, Eeya Taa Laba-labaalo molanggato tamo malentai sua̒li boito. Wohia mao̒ olimongolio sapi ulai̒ buboto tuwau duo̒lo bake polulutalo dusa.

²⁰ Hamaawa mao̒ ngoi̒di duhulio wau poleaapualo ode tutuu-ngeyaalo to opaato tutulio to wimbihu bolitutuo̒ lomesba boito, wau olo lo totoonulalo tutulio wimbihu huungio wau topalito biihu mesba boito. Wolo pohuli boitolo yio̒ mopomantali mesba boito wau mopo tolomodu mao̒ ola-U̒.

²¹ Lapatao̒, hamaawa mao̒ sapi ulai̒ duo̒lo polulutalo dusa boito, wau tumbila mao̒ totambati u matilantu deu̒yito-yito to bulemengo lotambati mantali Bele lo Eeya.

²² Loombulio mola yio̒ musi mopodewo batade ulai̒ tuwau udiila otaiilio duo̒lo bake pongambunguala dusa. Pomantalia mao̒ mesba boito wolo duhu lobatade boito, tutuuwauwa debo odelo u mapilohutumu wolo sapi ulai̒ humula boito.

²³ Wonu mailapato yio̒ lopohutu mao̒, hamaawa mao̒ sapi ulai̒ buboto tuwau wau batade ulai̒ buboto tuwau, duduuluwolo udiila otaiilio,

²⁴ lapatao̒ deloa mai ode Olau̒. Mongo iimamu musi momua̒yadeo̒ watingo ode yitaato binatangi boito duuduluo wau molumbilao̒ mowali bake ode Olau̒.

²⁵ Timii̒du dulahu ngotilonggadu pituhui mola, yio̒ musi mopobake batade tuwau, sapi ulai̒ buboto, wau batade ulai̒ duo̒lo bake pongambunguala dusa. Bibii-natangiyalo boito diila mowali otaiilio.

²⁶ Pituhui mola hiheolio mongo iimamu musi mohutu upacara pomantaliyalo mesba boito wau mopodapato u mowali pomake.

²⁷ Lapatao̒ pituhui mola boito mopaluto, mongo iimamu musi molumula mopodewo toitaato mesba boito bake yilalango wau bake polodame duo̒lo umati. Yi Wau̒ masanangi woli mongoli ngoa̒amila. Wau̒, Eeya Taa Laba-labaalo molanggato malo tahuda mai.”