YEHESKIEL 41 - KITABI HABARI MOPIOHE

¹ Talolai̒ boito lodelo olaatia ode delomo huwali huungio, u ilunte Tambati U Mantali. Tio loluu̒udeo̒ hulupila udulu-dulunga odito mota: hayai̒o tolo meeteri,

² tanggalio limo lomeeteri. Dingingo to biihio mohu-mohualio hulodio duluo wau ngoputu lomeeteri. Lapatao̒ tio loluu̒udeo̒ Tambati U Mantali boito: hayai̒o dulo pulu lomeeteri wau tanggalio mopulu lomeeteri.

³ Lapatao̒ tio tilumuwoto huwali delomio. Tio loluu̒udeo̒ hulupilo udulu-dulunga mota odito: hayai̒o ngomeeteri, tanggalio tolo meeteri, wau dingongo to biihio mohu-mohualia hulodio tolo meeteri wau ngoputu.

⁴ Lapatao̒ tio loluu̒udeo̒ huwali boito olo: modeliilio tutulio wopato, hayao̒ wau tanggalio tinggai mopulu lomeeteri. Lapatao̒ tio loloi̒ya olaatia, “Uti-utieelo Tambati U Laba-labaalo mantali.”

Huhuu-waliyaalo u bilongulo to dingingo meeseli Bele lo Eeya

⁵ Lapatao̒ uito talolai̒ boito loluu̒udeo̒ dingingo meeseli delomio Bele lo Eeya: hulodio tolo meeteri. To dingingo meeseli topalito Bele lo Eeya boito woluo huhuu-waliyaalo u tanggalio dulo meeteri.

⁶ Huhuu-waliyaala boito obele-belea totolu u timii̒du bele-belea ohuwali tolo pulu. Dingingo meeseli bulemengio lo timii̒du bele-belea lebe molipa wolo dingongo meeseli lobele-belea towalungio, tilinggula huhuu-waliyaalo boito mowali woludelo lou̒ diila momuangao̒ dingingo meeseli Bele lo Eeya boito.

⁷ Monto bulemengio, dingingo meeseli Bele lo Eeya boito oontonga tutuuwauwa hulodio monto walungo demola yitaato. To dingingo meeseli bulemengio Bele lo Eeya, to ambahu bulemengo lo huhuu-waliyaalo boito, o tutuua̒du mohelu duluo u hulinta tilinggula tau mowali mobotulaa mola monto bele-belea walungio ode bele-belea oluolio wau otolulio.

^8-11 Dingingo meeseli bulemengio lo huhuu-waliyaalo boito hulodio dulo meeteri wau ngoputu. Hudungu boito o huhebu udulu-dulunga ode huhuu-waliyaalo to ambahu tilayo Bele lo Eeya, wau huhebu wewo udulu-dulunga ode huhuu-waliyaalo to ambahu huliaalio. To palito Bele lo Eeya o wumbato utudu-tudu ngopee̒ totalulio u tanggalio dulo meeteri wau ngoputu; dudutuulio tolo meeteri monto huta, wau pilohutulio tutuuwauwa langgatio wolo pandemeni lo huhuu-waliyaalo to dingingo meeseli Bele lo Eeya. To wolota lo wumbata utudu-tudu ngopee̒ totalulio wau huhuu-dunguwalo u pilomake lomongo iimamu, woluo huwali leidaa̒ u owatopo huo̒huo̒ diila odingingo u tanggalio mopulu lomeeteri, to oloihi wau olowala Bele lo Eeya.

Hitua-tuawua u bilongu to ambahu otolopa

¹² To ngotuali lo palepelo to ambahu otolopa, woluo hitua-tuawua u bilongu leidaa̒ u hayai̒o wopato pulaa limo lomeeteri wau tanggalio tolo pulaa limo lomeeteri, hiambola hulodu didii-ngingiio dulo meeteri wau ngoputu.

Tuu̒udu wimu-wimumuto Bele lo Eeya

¹³ Talolai̒ boito loluu̒udeo̒ hayai̒o Bele lo Eeya: limo lopulu lomeeteri. Monto ambahu wulea Bele lo Eeya tunggula ode dingingo meeseli wulea lou̒ hitua-tuawua u bilongu leidaa̒ to ambahu otolopa boito walahio olo limo lopulu lomeeteri.

¹⁴ To wimbihu talu monto Bele lo Eeya u talutalu ode tiimuru wolo palepelo to oloihi wau olowalalio, tanggalio olo limo lopulu lomeeteri.

¹⁵ Talolai̒ boito olo loluu̒udeo̒ hitua-tuawua u bilongu leidaa̒ u talutalu ode palepelo to ambahu otolopa: tanggalio limo lopulu lomeeteri, leituwoto didii-ngingaalo to oloihi wau olowalalio. Huhuu-waliyaalo leidaa̒ to Bele lo Eeya, huwali leidaa̒ totalu, Tambati U Mantali, wau Tambati U Laba-labaalo mantali,

Wiwii-mbihuwalo Bele lo Eeya

¹⁶ diladai wolo lesi ayu, monto wumbato demola tutuu-lowaalio. Tutuu-lowaalio boito mowali tau̒ubela wolo podehu.

¹⁷ Ngoa̒amila dinginga to wimbihu delomio diladai wolo uu̒u-kiliyaalo

¹⁸ bungo lo palem wau malai̒kati opolipio̒, ngobungo palem towolota lo duluo malai̒kati opolipio̒. Malai̒kati opolipio̒ boito obaya mohelu duluo,

¹⁹ baya tuwau manusia u talutalu ode bungo lopalem to ambahu oloihi, wau u tuwau poli baya losinga utalu-talu ode bungo lo ayu palemi towimbihu olowala. Uu̒u-kiliyaalo boito woluo to ngoilanggubu Bele lo Eeya,

²⁰ tumulalo mai monto wumbato demola wimbihu yitaato huhebu.

²¹ Wowoo-lihiyaalo huhebu monto Tambati U Mantali modeliilio tutulio wopato. Totalu lo Tambati U Laba-labaalo mantali woluo hitua-tuawua u oontonga mao̒ debo odelo mesba monto ayu.

Mesba lo ayu

²² Langgatio ngomeeteri wau ngoputu wau tanggalio ngomeeteri. Tutu-tutuulio, wumbatio wau dingingio pilohutu monto ayu. Talolai̒ boito loloi̒ya olaatia, “Uti-utieelo meja uwoluo totalu lo owoluo lo Eeya.”

Huhuu-hebuwaalo

²³ To huudu hulupilo udulu-dulunga ode Tambati U Mantali ohuhebu tuwau, odito olo tohuudu lo hulupilo udulu-dulunga ode Tambati U Laba-labaalo mantali.

²⁴ Huhuu-hebuwaalo boito oduungo huhebu moheelu duluo u huo̒huo̒o to huungio.

²⁵ Huhuu-hebuwaalo Tambati U Mantali diladai wolo uu̒u-kiliyaalo bungo lopalem wau mamaa-ikatiyalo opolipio̒ debo odelo to didii-ngingiio. Totalu lohuwali leidaa̒ talu yito to ambahu bulemengio, woluo lalante lo ayu.

²⁶ To biihio mohu-mohulia lo dingingo totiliilio woluo tutuu-lowaalo, wau dingingio diladai wolo uu̒u-kiliyaalo bungo lopalem.