YEHESKIEL 4 - KITABI HABARI MOPIOHE

Tei Yeheskiel lotomaya mao̒ polomalawa Yerusalemu

¹ Allahu Taa̒ala lotahuda mai, “Wuu manusia pana, pohamaalo botu tela ngobotu, podutua mao̒ totalumu wau pilitaalo toitaatio dena lokota Yerusalemu.

² Lapatao̒ gaambalia mao̒ tuwaulio lo polomalawa ode kota boito, wolo tataang-giyaalo, huhuu-ntuwaalo huta, kekee-mawaalo wau pakaa-kasiyaalo pongantulu to palito dingingo meeselio.

³ Pohamaalo panji wate wau anggapuwalo uito dingingo wate tuwau; podutualo mao̒ panji boito to wolotamu wau kota lo Yerusalemu. Lapatao̒ potitalulo ode kota boito debo odelo yio̒olo talomala mao̒. Uito mamowali tuoto ode bangusa lo Isirai̒lu.

^4-5 Lapatao̒ potibalatolo motiyintili ode oloihi, wau Wau̒ mamopo dungga mai totala bangusa lo Isirai̒lu ode olemu. Ngotilonggadu tolo hetuto tio lopulu hui mola yio̒ mamo tibalata odito wau sikisa boli modutolo sababu totala limongolio. Ngohui mola yio̒ motibalata odito mopobayahe ngotaunu hukuumani bangusa lo Isirai̒lu.

⁶ Lapatao̒ uito, potibalatolo motiyintili ode olowala wau laasailo mao̒ hukuumani to totala lo Yehuda wopato pulu hui mola hiheolio, ngohui mopobayahe ngotaunu hukuumani limongolio.

⁷ Bilohilo polomalawa Yerusalemu. Bintaa̒alo mola buntungomu ode kota boito wau potunggula mota tahulii-U̒ pasali lo hukuumani ode limongolio.

⁸ Yio̒ maa̒wadu-U̒ alihu diila moo̒ pobale wawaau̒mu monto oloihi ode olowala meaambo bolii̒o mao̒ dilumutu polomalawa boito mopaluto.

⁹ Botia pohamaalo pale, jelai, kasa meela, kasa polong, sekoi wau pale moa̒aluti. Ulamboheelo uito ngoa̒amila wau pohutua mao̒ roti. Uitoolo ua̒alomu ngotilonggadu tolo hetuto tio lopulu hui mola yio̒ balabalata yinti-yintili ode oloihi boito.

¹⁰ Roti boito musi tayadumu odito rupalio tilinggula timii̒du dulahu yio̒ bo molamela dulo hetuto tolo pulu halamu. Lebe mao̒ leeto diila mowali.

¹¹ Taluhu u yilumomu olo ee̒enggade, deu̒yito-yito bo dulo manggo ngohui.

¹² Pohutua mao̒ tulu wolo bountu lomanusia odelo ayu podiii̒yo. Panggangia mao̒ rotimu boito toitaato tulu wau tamelalo roti boito totalu lotaa ngoa̒amila.”

¹³ Eeya lotahuda mai, “Odieelo mola dudeloolio taulo Isirai̒lu de molamelao̒ ua̒alo u dinidini to butoe̒e Musa, tou̒ timongolio tapilo-U̒ ode lilii-puwaalo deli.”

¹⁴ Bo watia lolametao̒, “Aduu Eeya Taa Laba-labaalo molanggato! Tumulalo u kikiia̒i demai botia, diipo pee̒enta mao̒ watotia helo ponajisi batanga lo watotia wolo ua̒alo pate lo binatangi meaambo labito mangusa lo binatangi mongantau. Diila pee̒enta mao̒ watotia lolamelo ua̒alo u he anggapuolio halamu.”

¹⁵ Yi Allahu Taa̒ala lotahuda mai, “Ooo̒, odelo tuloi̒o bountu lo manusia, yio̒ mowali momake bountu losapi u momanggangi rotimu.”

¹⁶ Lapatao̒ Eeya luli lotahuda mai, “Wuu manusia panaa, Wau̒ mamopo binasa mai ua̒alo polodapato to Yerusalemu. Wolo duiduito wau lawalo tau-tauwalo mamopo eenggade ua̒alo u polameli mongolio wau taluhu u yilumo limongolio.

¹⁷ Timongolio mamooli halapani sababu opulita loroti wau taluhu, wau pulitio timongolio mate sababu duduu-sawaalo limongolio.”