YEHESKIEL 3 - KITABI HABARI MOPIOHE

¹ Allahu Taa̒ala lotahuda mai, “Wuu manusia panaa, tamelalo lilibu buku botie, lapatao̒ ponao̒olo wau pobisalaalo ode tau-tauwalo Isirai̒lu.”

² Lapatao̒ hiluo̒ mola lowatia tunggilo laatia wau Allahu Taa̒ala longohi mai lilibu buku boito odelaatia olau̒ alihu tamelo laatia.

³ Tahudaa-Lio mai, “Wuu manusia panaa, tamelaalo! Tuangilo ombongumu wolo lilibu buku botie.” Lapatao̒ buku boito tilamelo laatia wau lasaalio debo odelo hula lotiia̒.

⁴ Allahu Taa̒ala luli lotahuda mai, “Wuu manusia panaa, ponao̒olo ode tau-tauwalo Isirai̒lu wau potunggula mao̒ totoonulalo tahulii-U̒ ode limongolio.

^5-6 Ode limongoliolo yio̒ laoloo-U̒, wau diila ode bangusa tabahasaalio mototolo, deli wau diila opahamuamu. Humayaalio yio̒ laoloo-U̒ ode bangusa tadebo odelo uito, yi timongolio mamodungohe loloo-iyaamu.

⁷ Bo bangusa lo Isirai̒lu diila mohuto modungohe olemu, tumbao̒ Wau̒ olo diila pandungio limongolio. Timongolio ngoa̒amila baaa̒ngiolo wau motohilaa moluwali.

⁸ Botia yio̒ mapohutuwo-U̒ mai baaa̒ngiolo wau molotolo debo odelo timongolio olo.

⁹ Yio̒ mapowaliyo-U̒ debo odelo toheeto botu lopatihu wau debo odelo toheeto iintani. Diila mao̒ oohe to tahipo malakalawa boito.”

¹⁰ Wumbutio mola Allahu Taa̒ala lotahuda mai, “Wuu manusia panaa, poo̒tuotalo tio̒otutua wai eelailo totoonulalo umapo tahudaa-U̒ mai olemu.

¹¹ Ponao̒olo ode bangusaamu tawoluo to polayahu boito, wau potunggula mota wolo u Wau̒, Eeya Taa Laba-labaalo molanggato motahuda ode limongolio, diila otaawa wolo timongolio mohuto modungohe meaambo diila.”

¹² Lapatao̒ Rohullah lomintao̒ olaatia wau to wulea lowatia ilodungohe lowatia suala debo odelo bulonggodu u lotahuda, “Pujiaalo mola omumulia lo Eeya tosologa!”

¹³ Ilodungohe lowatia tingohu polipio̒ lo mamaa-haalukuwalo boito u tinggai dedeenggula, wau tingohu kele-kelengeto lo loloo-dawaalo boito udebo odelo oohuu̒ tingohu liluhu.

¹⁴ Okokawasa lo Eeya leidungga mai odelaatia wolo laba-labaalo, wau tou̒ watia bilintai̒o wau dilelo lo Rohu-Lio hilaa lowatia lasaalo mopaa̒ato wau mopatu.

¹⁵ Yi malei dungga watia totambati pilo tibiluloa̒ lotahe pilolayahu to Tel-Abib tobiihu Dutulaa Kebar. Ngotilonggadu pitu hui mola watia lotibiluloa̒ mota teto; watia leitontongo lo totoonulalo u boheeli ilodungohe lowatia wau iloontonga lowatia boito.

Eeya lolantu olei Yeheskiel lowali tamoodahawa Isirai̒lu

¹⁶ Lapatao̒ pitu hui mola, Eeya lotahuda mai odelaatia,

¹⁷ “Wuu manusia panaa, yio̒ puduo̒o-U̒ mowali tamoodahawa bangusa lo Isirai̒lu. Potunggula mota ode limongolio poe̒ela u wohi-U̒ mai botie.

¹⁸ Wonu Wau̒ mopoo̒taa mai deu̒ ngotaalio lo tamoleeto maamate, bo yio̒ diila mopoe̒elao̒ olio alihu tio molomela pii̒liilio tilinggula tio moa̒ahu, yi tio maamate donggo odelo ngotaalio tao̒dusa, wau tatihu-tihula to opopatelio mapohilelio wolo moo̒ohuu̒ monto olemu.

¹⁹ Wonu yio̒ mopoe̒elao̒ tamoleeto boito wau tio diila mohuto mohuheli mohutu u moleeto, yi tio maamate odelo tao̒dusa, bo yio̒ lohihilao mamoa̒ahu.

²⁰ Wonu ngotaalio tamopiohu molumula mohuto dusa, wau tio potaluwo-U̒ wolo u topotala, yi tio maamate wonubolo yio̒ diila mopoe̒elao̒ olio. Tio maamate sababu duduu-saalio, wau ngoa̒amila huhutuulio u mopiohu diila tae̒ela-U̒. Bo tatihu-tihula to opopatelio boito mapohile-U̒ wolo moo̒ohuu̒ olemu.

²¹ Wonu taa u mopiohu boito poe̒elamu alihu diila mao̒ mohutu dusa, wau tio modudua̒ nasehatimu, yi tio diila tahukuu-maniyo-U̒ wau yio̒ mamoa̒ahu.”

Tei Yeheskiel mamowali bubu

²² Ilolaasa lowatia lotolio owoluwo lo Eeya wau ilodungohe lowatia Eeya lotahuda mai odelaatia, “Pobongulo wau ponao̒olo ode lumbaya. Mola teto Wau̒ mamotahuda mai ode olemu.”

²³ Yi malonao̒ watia ode lumbaya, wau mota teto iloontonga lowatia baango u inta mao̒ inta mao̒ ulopo bilohei owoluwo lo Eeya debo odelo tobiihu Dutulaa Kebar. Lapatao̒ watia lodehu leidambao̒ tohuta,

²⁴ bo Rohullah tilumuotai wau lopotihula olaatia. Eeya lotahuda odelaatia, “Pohualingolo wau potiu̒lungolo todelomo bele.

²⁵ Wuu manusia panaa, yio̒ maa̒wadulo wolo tali tilinggula diila moo̒ lualo wau moo̒ dunggaya wolo tau.

²⁶ Wau̒ mamohutu mai dilamu bulabulai̒ tilinggula yio̒ diila moo̒ poe̒elao̒ bangusa tamoo-malakalawa botie.

²⁷ De, wonu Wau̒ muli motahuda mai ode olemu wau moponguli omaambomu u moloi̒ya, yio̒ musi mopotunggula wolo u Wau̒, Eeya Taa Laba-labaalo molanggato motahuda ode limongolio. Ngotayadi mongolio mamo dungoheo̒, bo ngotayadio poli diila, sababu timongolio memangi bangusa tamoo-malakalawa.”