YEHESKIEL 26 - KITABI HABARI MOPIOHE

Lamali pasali lo hukumani ode Tirus

¹ To dulahu bohulio hulalo u tantutantu todelomo taunu opulaa tuwau tomaasa polayahu lami, Eeya lotahuda mai odelaatia, tahuda lo Eeya,

² “Wuu manusia panaa, ulipu lo Tirus malo tinga-tingalaa̒ meengahu sambela hipoloi̒yawa, ‘Yerusalemu malo aantulu! Olootolio todelomo daahangi mailooli! Tio diilalo lowali baliinto!’ ”

³ Eeya Taa Laba-labaalo molanggato lotahuda mai, “Wau̒ botie musuumu, wuu Tirus! Wau̒ mamodelo dadaata bangusa wau mai moluhu olemu, wau timongolio mamonao̒ mai debo odelo buo̒olo deheto.

⁴ Timongolio mamo ngantulu didii-ngingaalo meeselimu wau mopolohubu momoo-nalaamu. Ngoa̒amila huta uwoluo mola teto maa aa̒ata-U̒ tilinggula u meitolaa bolo botu ngobotu u mohengu daa̒ tohuungo deheto.

⁵ Tahi pohalawa mamomayato pajala limongolio toitaato botu boito. Wau̒ Eeya Taa Laba-labaalo molanggato malo tahuda mai. Tirus mamowali mangusa ode dadaata bangusa.

⁶ Timongolio mamo lambata boli momate-mateelo mao̒ ulipu to kokoo-tawaalo tohuta datahu lo Tirus. Yi mao̒taawa lo ulipu lo Tirus deu̒ Wau̒ulo Eeya.”

⁷ Eeya Taa Laba-labaalo molanggato lotahuda mai, “Wau̒ mamodelo mai li Olongia Nebukadnejar monto Babel u moluhu olemu, wuu Tirus. Olongia talaba-labaalo molotolo boito mamonao̒ mai monto tilayo wolo suludadu uleidaa̒, wolo dadaata wadala wau kakaa-letaalo popaatea boli wolo pasuukani owadala.

⁸ Mongo ulipu lo totoonulalo kota tohuta datahu mapateelio mate-mateelo mao̒ todelomo popaatea boito. Musu mamongau̒de tataa-nggiyaalo pomintengiyalo, molambula didii-ngingaalo meeseli pomalawalo wau mohulude popoo-lisaiyaalo duduulaa̒ u pomake limongolio odelo biintengi moluwali olemu.

⁹ Timongolio mamopolusa didii-ngingaalo meeselimu wolo pakaakasi poluusa wau mopolohubeo̒ momoo-nalaamu wolo wate.

¹⁰ Wawaa-dalaalo limongolio odito daatalio, tilinggula hulopai̒o mohutu peaahuo̒ hitombo-tombotaalo mao̒ u mohenggube olemu. Tingohu bubuu-lontunga lo pasuukani owadala u hemodedeo̒ kaleta lo tomeu̒ wau kaleta lo popaatea mamopo hulu-huluhela didii-ngingaalo meeselimu tou̒ timongolio molibaya to huhuu-hebuwaalo hulubangi wau tumuwota ode kota u malowali tutuu-wodeyaalo boito.

¹¹ Pasuukani owadala boito mamoluhu to dadaa-lalaalumu wau momate ulipumu mate-mateelo mao̒ wolo wamili mongolio. Tutuu-guumu ugaaga ngoa̒amilalo wau motoheeto mapoloo-hubulio.

¹² Mumuu-suumu boito mamo lambata totoonulalo okokaya wau daahangimu. Timongolio mamongantulu didii-ngingaalo meeselimu wau mopolohubu bebee-leemu ugaaga ngoa̒amilalo. Timongolio mamohama boboo-tuulio, duduu-piyaalo wau hutalio, lapatao̒ mopomahulao̒ ode delomo deheto.

¹³ Wau̒ mamopo huheli mai ngoa̒amila lahumu wau muusiki lo kocapimu.

¹⁴ U tolaa-U̒ mao̒ bo botu u ngobotu u mohengu daa̒ wambai̒o, tambati lo tahipo halawa momayato pajala limongolio. Kota boito diilalo bongulolio. Wau̒, Eeya Taa Laba-labaalo molanggato malo tahuda mai.”

¹⁵ Eeya Taa Laba-labaalo molanggato lotahuda mai ode kota Tirus, “Ulipu madala lo pentadu mahulu-huluhelio moohe wonu modungohe wuwaatio̒ u mopoo̒laaheo̒ olemu wau wuwaatio̒ daa̒ lotau-tauwalo tadonggo heo̒lotolo.

¹⁶ Moo̒onto paladumu, mongo olongia monto babaa-ngusawalo tobiihu deheto matimihulo monto tambati huhuloa̒ li olongia, mohinggi jumba odudaa̒ wau boo̒ limongolio u okalawo, lapatao̒ motihuloo̒ hulu-huluhelio tohuta. Timongolio mamoohe daa̒ tilinggula diila moo̒ duo̒oto.

¹⁷ Lapatao̒ timongolio mamopolahu mola lahu polobungalo botie ode olemu: Malo aantululo mola kota u ilopujaawa! Totoonulalo kaapalilio yilopua lonto auhe daa̒. Ulipulio bohulo okawasa to deheto helohutu tau-tauwalo pentadu yiloohe.

¹⁸ Botia, to dulahee yio̒ ilolaahelio, ulipu lo pupuu-lauwaalo hulu-huluhelio. Ilooheaalo mola timongolio ngoa̒amila loo̒onto oa̒antulumu u diila otonea̒a.”

¹⁹ Eeya Taa Laba-labaalo molanggato lotahuda mai, “Powaliyo-U̒ mai yio̒ moliilo daa̒ debo odelo kota udiila otua. Wau̒ mamolau̒ubei olemu wolo taluhu monto wamoo̒ lo auhe daa̒.

²⁰ Lapatao̒ yio̒ laoloo-U̒ ode dunia lotaa mate u mopanggala wolo tau-tauwalo monto jamani muloololio mai daa̒. Poluli-U̒ yio̒ motibiluloa̒ todunia lotaa mate boito, to huungo lo tutuu-wodeyaalo ohiheo-hiheolo mao̒, pee̒-pee̒enta wolo taa yilate. Yi hutamu diilalo potibiluloa̒alo, wau yio̒ diila tao̒yia̒apa towolota lotaa hitumula.

²¹ Yio̒ powaliyo-U̒ tao̒baaya u moo̒tihela hapato, wau ui-uitoolo pulito lo hikaayatimu. Tau-tauwalo mamo lolohe olemu, bo yio̒ diila tao̒dungga. Wau̒ Eeya Taa Laba-labaalo molanggato malo tahuda mai.”