YEHESKIEL 24 - KITABI HABARI MOPIOHE

Ulongo u taatolo

¹ To dulahu opululio, hulalo opululio, todelomo taunu otiolio tomaasa polayahu lami, Eeya lotahuda mai odelaatia,

² “Wuu manusia panaa, tuladee mao̒ taanggali to dulahee botie, sababu to dulahee botie ti olongia lo Babel mamomala Yerusalemu.

³ Wau̒, Eeya, o pohumaya tuwau u potunggulolo ode umati-U̒ tamotohilaa momalakala: Tuangi mao̒ taluhu ode delomo panji lapatao̒ dutuwaalo toitaato tulu.

⁴ Potuwota mola tapu ode delomio tapu u mopiohe daa̒ mutulio; tapu lo binggingo wau tapu lo bungolopa wau tutuu-lalowaalo u dadaata yilontalio.

⁵ Pakea mao̒ tapu lohimba u molingohu wau buboto duhengi mao̒ polodapato ayu podiii̒yo. Polulia mao̒ lumolombula wau molimbue̒i taluhio laheaalo tapu boito wolo tutuu-laloolio.”

⁶ Eeya Taa Laba-labaalo molanggato lotahuda mai, “Matopotala kota u polupolu wolo tamoomatea mate-mateelo mao̒ boito! Kota boito debo odelo ulongo otaato u diila pee̒enta mao̒ ilii̒ita. Tapu u woluo to delomio yiluwalio ngoo̒longo domi ngoo̒longo tunggula diaaluo penu boli tuwau mao̒ u leitolaa.

⁷ To kota boito lotoduo polomatea mate-mateelo mao̒, bo duhu lobakelio diila lohuwato ode huta, bo ode yitaato botu u motoheeto, tilinggula diila mowali tambulalo.

⁸ Duhu boito hiluliya-U̒ teto tilinggula mowali oontonga wau mohile wolo moo̒ohuu̒ u molontuli.”

⁹ Eeya Taa Laba-labaalo molanggato lotahuda mai, “Matopotala kota u polupolu wolo tamoomatea mate-mateelo mao̒ boito! Wau̒ lohihilao tamamo powoludu lo ayu u podiii̒o.

¹⁰ Duhengiilo ayulio! Ayabeelo tululio! Laheaalo tapulio! Tapilaalo tabulio. Tumbiliilo tutuu-laloolio!

¹¹ Botia podutuwalo ulongo lo polunggu udiila otua toitaato tulu wau hulii mao̒ tunggula meela bohuwalo. Lapatao̒ taatio mopobu, ulongo boito mamuli belesi modudua̒ wuu̒du lo agama.

¹² Bo diila ngoa̒amila taatio mameenggi maahu lotulu.

¹³ Wuu Yerusalemu, ngoa̒amila huhutuumu u moruusa malo ponajisi batangamu. Wau̒ malo himontala lopobelesi olemu, bo diila ohunalio, sababu yio̒ debo najisi. Yio̒ diilalo mobelesi tunggula lopato-U̒ mai omulukaa-U̒ ode olemu.

¹⁴ Wau̒, Eeya Taa Laba-labaalo molanggato malo tahuda mai. Malei dungga wakutuulio olemu u mohutu mao̒. Wau̒ diila tamo lipata dusaamu wau dila olo mongambungu mai meaambo momonu olemu. Yio̒ mahukuu-maniyo-U̒ motuuu̒de wolo totoonulalo huhutuumu. Wau̒ Eeya Taa Laba-labaalo molanggato malo tahuda mai.”

Opopate dile li nabi

¹⁵ Eeya lotahuda mai odelaatia,

¹⁶ “Wuu manusia panaa, wolo tumahuo̒olo mola mahamaa-U̒ taa u ponuwo-U̒. Bo yio̒ diila mowali molapali hilimuta wau humoyongo, meaambo mopoluli mao̒ ponumu humeheeto.

¹⁷ Diila bolo odungohe yio̒ mopotide-tideo̒ lonapasi usuusa! Diila mao̒ poonao̒ lou̒ diila obeleu̒to lunggongo, meaambo diila owaapidu oa̒ato, odelo taa u motilimi. Diila mao̒ olo beleu̒tamu bayamu, wau diila mao̒ polamela roti polotilimi.”

¹⁸ Didimodupo watia helo bisala ode bangusa boito wau huilio mola dile lowatia yilate. Loombulio mola pilohutu lowatia wolo u piloa̒hulio odelaatia.

¹⁹ U lipu helohintu, “Yilongola ti Paaa̒ helohutu odie? Wolo boliilio ode lamiaatia?”

²⁰ Lapatao̒ yiloi̒ya lowatia olimongolio, “Eeya lopoa̒hu mai olaatia

²¹ mopo tunggulai tahuli boite ode limongoli: Timongoli hemopo mangga olootolo Bele lo Eeya. Timongoli ohilaa molontongao̒ wau mobiiloheo̒, bo Eeya mamopo kootolo mai Belee-Lio. Wau popoo-ngawaa̒lo lo ngaalaa̒mu tadonggo muda, talei tolaa to Yerusalemu, mapateelio mate-mateelo mao̒ todelomo popaatea.

²² Lapatao̒ timongoli mamohutu mao̒ debo odelo u hepohutuwo lowatia masaatia botie. Timongoli diila tamolau̒ube bayamu meaambo molamela roti ilopatea.

²³ Timongoli diila tamonao̒ lou̒ diila otau̒ubu lunggongo meaambo owapidu oa̒ato, diila mohilimuta meaambo humoyongo. Timongoli maheelebe mohiheo mola mongongoto sababu duduu-sawaalo limongoli; timongoli mamopo ilaalo suusa ngota timongota.

²⁴ Yi watia, Yeheskiel mamowali tao̒baaya limongoli; timongoli mamohutu debo odelo u hepohutuo lowatia masaatia botie. Eeya lotahuda mai deu̒ wonu bolo sua̒li boito motoduo mai, mao̒taawa limongoli deu̒ Tioolo Eeya Taa Laba-labaalo molanggato.”

²⁵ Eeya lotahuda mai odelaatia, “Naa, manusia panaa mahamaa-U̒ monto olimongolio Belee-U̒ u motoheeto boito, u malowali hepomangga wau osanangi limongolio, wau u hepandangia limongolio wau henao̒olo wolo hilaa sanangi. Lapatao̒ mahamaa-U̒ olo mongo walai̒ mongolio.

²⁶ To dulahee pohutuwo-U̒ mai sua̒li boito, ngotaalio tamoo̒ lopato monto obobinasa boito mamonao̒ mai, wau mopo tunggulao̒ habari boito ode olemu.

²⁷ To dulahulo boito yio̒ mamuli moo̒ bisala wau diilalo bubu. Lapatao̒ yio̒ mamobisala wolo tau boito. Odieelo mola yio̒ mamowali tuoto ode limongolio; yi mao̒taawa mao̒ limongolio deu̒ Wau̒ulo Eeya.”