YEHESKIEL 23 - KITABI HABARI MOPIOHE

Taduulota tawali-yali wau tamohuhula tai̒lodusa

¹ Eeya lotahuda mai odelaatia, tahuda lo Eeya,

² “Wuu manusia panaa, woluo mongobua duulota, tamohuhula wau tawaliyali.

³ Tou̒ timongolio donggo humula mai, timongolio lotibiluloa̒ to Masiri. Mola teto timongolio iloolia lo tadulahulio, lapatao̒ lowali suuntali.

⁴ Tamohuhula ilunte Ohola; tio mopobayaheo̒ Samaria. Tawali-yaliilio ilunte Oholiba; tio mopobayaheo̒ Yerusalemu. Wau̒ lonika woli mongolio wau loo̒tapu walao̒ lonto olimongolio duduu-lotaalo.

⁵ Penu boli ti Ohola malowali dile-U̒, tio debo hemoti suuntali, wau ohilaa daa̒ hemololimo mongo tilantahio lonto Asyur.

⁶ Timongolio boito yito suludadu tahipakea ngotumba meela lailoumu, tahi bangusawa wau tahidihuma pantungo lailaio̒; ngoa̒amilalo mongo polowila lo pasuukani owadala tahi gaagawa lakulio.

⁷ Wolo taduduulaa̒ lo ulipu boitolo ti Ohola helojina. Donggo poli sababu malo odito bilahilio, tio helo ponajisi batangalio wolo hemolubo babaa-laahalaalo limongolio.

⁸ Tio tulusi wambai̒o hemo tisuuntali debo odelo u muloololio mai hepilo hutulio to Masiri, tou̒toonu tio iloolia lo tadulahulio. Tumulalo u kikiii̒o mai, tio matiluuluhe wau hepilohutu lotau odelo tasuuntali.

⁹ Sababu uito yiludu-U̒ tio ode mongo tilantahio, tau-tauwalo Asyur talaba-labaalo moo̒woloolo olio boito.

¹⁰ Tio pilopolaala limongolio wolo bangganga, lapatao̒ pilatelio yila-yilateelo mao̒ wolo wamilo, wau mongo walai̒o yilamabatio. Penu boli tou̒toonu paladio boito hepo bibii-salaawa lo mongobua.

¹¹ Ti Oholiba, tawali-yaliilio heloo̒onto u lotoduo boito, bo tio lebe onapusu mojina woli Ohola.

¹² Ti Oholiba olo ohilaa daa̒ totau-tauwalo Asyur boito, deu̒yito-yito mongo bohulotau tahi gaagawa monto pasuukani owadala, tahi bangusawa wau tahidihuma pantungo lailaio̒, wau suludadu tahipakea ngotumba meela lailoumu boito.

¹³ Wau̒ loo̒onto deu̒ ti Oholiba boito otutu maloruusa daa̒, tutuuwauwa debo odelo tahulangio.

^14-15 Helebe hihiiheo mola helebe loruusaalo mola ti Oholiba. Tio iloa̒anga daa̒ lo gagaa-mbaliyalo u pilaisaka to dingingo meeseli, wau tilumbai̒o wolo ceti debo odelo weela loduhu. Gagaa-mbaliyalo boito mopo bayaheo̒ tomongo polowila lo Babel wolo bintolo wohuta u gaaga wau sulubani u hilooloa̒.

¹⁶ Tou̒ ti Oholiba loo̒onto gagaa-mbaliyalo boito, bilahilio lomalitutuo̒ wau tio lolao mota totoduo tomongo polowila boito to Babel.

¹⁷ Yi lonao̒olo mai timongolio wau lotuluhe wolio. Timongolio helo pokootolo olio odito rupalio tilinggula pulitio tio molonua̒ olimongolio.

¹⁸ Lapatao̒ uito wolo diila tuua̒ao̒-tuua̒ao̒ tio lotisuuntali wau lopobilohe batangalio totalu lotaa dataata. Wau̒ molonuo̒ moo̒onto olio, debo odelo molonuo̒ to tahulangio.

¹⁹ Helebe hihiiheo mola helebe tilolongalio lojina, diila ohiihedio tou̒ tio donggo muda mai tou̒ tio helo tisuuntali to Masiri.

²⁰ Tio malo ilohilaa daa̒ tomongo lolai̒ uwali-walihuhu napusu bilahilio, wau umangowa bilahilio debo odelo udaa̒ lonapusu wadala ulai̒. (

²¹ Wuu Oholiba, yio̒ motohilaa moponguli mai huhutu ukootolo u hepilo hutumu tou̒ yio̒ donggo humulaamu mai, tou̒ taulo Masiri helo papaaluta tohilao wolemu.)”

Allahu Taa̒ala lomutoo̒ oli Oholiba

²² Eeya Taa Laba-labaalo molanggato lotahuda mai, “Wuu Oholiba, yio̒ malotolu wolo mongo tilantahumu, bo Wau̒ mamo popatu olimongolio alihu timongolio moingo olemu wau momaala olemu.

²³ Wau̒ mamongambu wau modelo mai ode olemu ngoa̒amila tilantahumu monto Babel, Pekod, Soa, Koa, Asyur, wau tau-tauwalo Kaldea. Deloo-U̒ mai ode olemu mongo bohulotau tahi gaagawa wau tao̒panggati lailaio̒, bangusawa, tadihudihu pantungo lipu upolohuna daa̒ wau mongo polowila lo pasuukani owadala.

²⁴ Timongolio mamoluhu olemu monto tilayo wolo suludadu uleidaa̒, wolo kakaa-letaalo popaatea wau kakaa-letaalo moodeloa tomeu̒. Wolo polanggu lo polisai wau hehee-lemuwaalo waja, timongolio mamomala olemu. Mapoluli-U̒ mao̒ timongolio momutoo̒ olemu modudua̒ butoo̒ limongolio lohihilao.

²⁵ Sababu Wau̒ muluka olemu, poluli-U̒ timongolio mopohutu mao̒ olemu wolo diila omanusia. Wulingo wau bulongamu mao̒yoodu limongolio wau mongo walau̒mu mahamaalio wau tumbilalio hitumula.

²⁶ Yio̒ mapo laalaalio wau ngoa̒amila pakemu malambatolio.

²⁷ Odieelo mola Wau̒ mamopo huheli napusu lo bilahimu wau totoonulalo polojina u hepilo hutumu tumulalo mai yio̒ to Masiri. Yio̒ diilalo motiwunela penu boli to balaahala toonu meaambo moo̒ eela mola to Masiri.”

²⁸ Eeya Taa Laba-labaalo molanggato lotahuda mai, “Wau̒ mamohudu olemu ode tau-tauwalo tamoo̒jijio̒ wau yilonuu̒mu.

²⁹ Sababu timongolio molonua̒ olemu, ngoa̒amila tilapulo wolo bulemu tioopatea malambato limongolio. Yio̒ matolaalio laalaala sama-samaata odelo tasuuntali wau mowali pobibiilohe lotaa dadaata. Napusu bilahi wau ohulotoomulo

³⁰ u lopotoduo mai paladu mobulilo botie ode olemu. Yio̒ lowali suuntali ode babaa-ngusawalo, wau helo ponajisi lo batangamu wolo babaa-laahalaalo limongolio.

³¹ Yio̒ lodudua̒ baa̒ato lo tahulangumu, masababu uito yio̒ mahukuu-maniyo-U̒ wolo hukuumani u tutuuwauwa.”

³² Eeya Taa Laba-labaalo molanggato lotahuda mai, “Tuango manggo lo tamo-huhulamu musi tinggupomu. Manggo boito hulinta wau modelomo. Tuangio polupolu lo sosoo-lewowaalo wau henteo̒, u musi bantaamu monto timii̒du tau.

^33-34 Manggo lo tamo-huhulamu Samaria, tuatuango owoohe wau oa̒antulu. Lapatao̒ yilumomu ngoa̒amilalo tuangio yio̒ mahuwoa̒alo wau modutolo. Wau wolo popoo-oowalo manggo boito yio̒ mamongai-ngaidinga duhelumu. Wau̒, Eeya Taa Laba-labaalo molanggato malo tahuda mai.”

³⁵ Eeya Taa Laba-labaalo molanggato motahuda mai, “Sababu yio̒ malo lipata ola-U̒ wau lobumelenga ola-U̒, yio̒ mamodutolo akiibati lo napusu bilahimu wau polo suuntalimu.”

Hukuumani lo Allahu Taa̒ala to taduulota tawaliyali wau tamohuhula

³⁶ Eeya lotahuda mai odelaatia, “Wuu manusia panaa, malo tidapato yio̒ momutoo̒ oli Oholo woli Oholiba? Dinia mao̒ timongolio pasali lo ohihina u mapilohutu limongolio.

³⁷ Timongolio malohutu polojina wau polomatea yila-yilateelo mao̒; timongolio malojina wolo babaa-laahalaalo wau lomate yila-yilateelo mao̒ tau̒kekee-ingoo-U̒ tapilotutu mai limongolio. Tau̒kekeei̒ boito mapilodewo limongolio ode babaa-laahalaalo limongolio.

³⁸ Wau diila bo uito wambai̒o. Timongolio olo helo ponajisi Belee-U̒ wau dulahu Saabati u matilantu-U̒ mai boito.

³⁹ To dulahee timongolio lomate tau̒kekee-ingoo-U̒ wau helo podewo mao̒ ode babaa-laahalaalo, taduulota mohutato tamohuhula wau tawaliyali boito lonao̒ mai ode Belee-U̒ wau helo pokootolo mao̒!

⁴⁰ Timongolio tumbao̒ helolao totoduo ode mongo lolai̒ to lilii-puwaalo u molamingo, wau timongolio olo lopoo̒polu mai totoduo boito. U lolutulao̒ to tahe tiluduo boito, taduulota tamohuhula wau tawaliyali boito lolihu, wau lomake padeto topalito mato wau helomake papaa-keyaalo.

⁴¹ Lapatao̒ timongolio lotihuloa̒a toitaato tambati potuluhelo ugaaga. To talulio omeja u polupolu wolo hepohinta, leituwoto totabu wau winulo jaitun u mailohi-U̒ olimongolio.

⁴² Monto bulemengio odungohe suala buluhuto daa̒ lotaa dadaata tahe motisana-sanangi. Tau-tauwala boito matiloduo mai lonto huta luasi ohungayo Timongolio lopotuotao̒ linggito to polotodu lo taduulota tamohuhula wau tawaliyali boito, wau lopohuli mao̒ mamaa-kutawalo ugaaga to lunggongio.

⁴³ Lapatao̒ to pikiili-U̒ mola, ‘Tingga mohuto tau-tauwala boito moitohe sinta wolo tahi suuntalio tamalo lolante sababu helojina?’

⁴⁴ Wolo bubuulota tau-tauwalo helonao̒ mai odeli Ohola woli Oholiba, tasuuntali duulota tamaloruusa daa̒ boito.

⁴⁵ Bo, tahi saalea mamomutao̒ tamohuhula wau tawaliyali boito dadaasari to polojinawa wau polomatea mate-mateelo mao̒, sababu timongolio memangi ototala.”

⁴⁶ Eeya Taa Laba-labaalo molanggato lotahuda mai, “Tiangaalo ngopo-woomboa tau u moposikisa wau molambata tamohutata duulota taamohuhula wau tawaliyali boito.

⁴⁷ Polulia mao̒ timongolio wolo botu wau tuhuolio wolo wamilo. Polulia mao̒ tau̒kekeei̒ limongolio tambalolio wau bebee-leyaalo limongolio pobuolio.

⁴⁸ To ngoilanggubu lipu mainggilo-U̒ oruusa debo odelo uito. Huhutuu-U̒ boito mamowali poe̒ela ode timii̒du mongobua alihu diila mao̒ mojina debo odelo tamohutato duulota tamohuhuula wau tawaliyali boito.

⁴⁹ Wuu Ohola wau Oholiba, Wau̒ mamo hukuumani mai olimongoli sababu timongoli hipojinawa wau hipoluboa balaahala. Yi mao̒taawa mao̒ limongoli deu̒ Wau̒ulo Eeya Taa Laba-labaalo molanggato.”