YEHESKIEL 22 - KITABI HABARI MOPIOHE

Ololeeto Yerusalemu

¹ Eeya lotahuda mai odelaatia, tahuda lo Eeya,

² “Wuu manusia panaa, malo tidapati yio̒ momutoo̒ kota u polupolu lo tamoomatea mate-mateelo mao̒ boito. Pobilohe mao̒ olio totoonulalo huhutuulio u moo̒olonuo̒.”

^3-4 Eeya Taa Laba-labaalo molanggato lopoa̒hu mai olaatia lopo tunggulai tahuli botie ode Yerusalemu, “Yio̒ ototala sababu malomate yila-yilateelo mao̒ dadaata ulipumu lohihilao, wau malo ponajisi batangamu wolo lolubo babaa-laahalaalo huhutuumu lohihilao. Sababu uito wakutu pomutoa̒alo olemu maleembidei wau hikaayatimu hua̒a mopulito. Yio̒ poluli-U̒ mao̒ mowali pohentea̒a wau poi̒ii̒ya lo babaa-ngusawalo wau mgoa̒amila lipu.

⁵ Yio̒ pohahaantia̒ lo lilii-puwaalo u molaminga wau meembidu sababu yio̒ mololaalaaita molambanga butoo̒ wau wuu̒du.

⁶ Ngoa̒amila mongo tau̒wa lo Isirai̒lu hemopo mangga olootolio lohihilao wau hemoponao̒ polomatea mate-mateelo mao̒.

⁷ Diaaluo penu boli ngotaa mao̒ monto ulipumu mohulumati mongo dulaa̒alio. Yio̒ hemob himbulo tau deli wau hemahama uuntungi monto osuusa lotaa janda wau tadidu otiilo otiyamo.

⁸ Tataa-mbatiyala hepo tabiyalo ode Olau̒ kilootolomu wau dulahu Saabati diila pilandungimu.

⁹ To wolota ulipumu woluo tahemo popapaatua u motohilaa mopitana taa wewo alihu moo̒tapu hukuumani mate. Woluo olo tamotohilaa molamela tapu u mapilobake ode balaahala. Woluo poli tamotohilaa mohutu huloto.

¹⁰ Woluo tamoheinga wau motuluhe wolo tiilolio watoo̒, taabua tadonggo duladulahu,

¹¹ dile taabu lotaa wewo meaambo moluhengio meaambo tawali-yaliilio monto tiilo wewo.

¹² Woluo olo tahe bayalialio lowali tamoomatea-mateelo mao̒, hipohamawa uuntungi ulaba-labaalo wau hipomitota tau-tauwalo ngobangusaalio. Timongolio ngoa̒amila malo lipata ola-U̒. Wau̒ Eeya Taa Laba-labaalo molanggato malo tahuda mai.

¹³ Bo botia Wau̒ mamolotaa̒a moo̒ohuu̒-huu̒ulo mao̒ tahipo lambatawa wau tamoomatea mate-mateelo mao̒ olemu.

¹⁴ Tingga donggo buheeli meaambo donggo molotolo yio̒ u momintaa̒ mola uluu̒mu lapatio mao̒ Wau̒ yilapato mohukuumani mai olemu? Wau̒, Eeya Taa Laba-labaalo molanggato malo tahuda mai wau Wau̒ mamoponao̒ wolo u mapilo tahudaa-U̒ mai.

¹⁵ Wau̒ mamopo bubuua̒yawa ulipumu ode ngoa̒amila lipu wau bangusa, wau Wau̒ mamopo huheli mai huhutuumu u moleeto boito.

¹⁶ Yio̒ mahinaa lo babaa-ngusawalo wewo, yi mao̒taawamu deu̒ Wau̒ulo Eeya.”

Tulu u mopomantali

¹⁷ Eeya lotahuda mai odelaatia,

¹⁸ “Wuu manusia panaa, tau-tauwalo Isirai̒lu diila ohuna ola-U̒. Timongolio debo odelo bountu lo logamu ilulambohe, debo odelo tombaha, timohe, wate wau timohe moitomo u ilolabita lapatao̒ talaa̒ pilobelesi todelomo tihengo.

^19-20 Yi botia, Wau̒, Eeya Taa Laba-labaalo molanggato, motahuda ode limongolio deu̒ timongolio tutuuwauwa debo odelo logamu udiila ohuna boito. Odelo woloolo mola botua lo talaa̒, polunggu, wate, timohe moitomo wau timohe moputio̒ pilo tuwoto ode delomo tihengo u pobelesiyolo, odito olo timongolio maa̒ambuwo-U̒ wau deloo-U̒ ode Yerusalemu. Omulukaa-U̒ uwali-walihuhu mamopodidi boboo-tuwaalo lo logamu.

²¹ Ooo̒, Wau̒ mamongambu olimongolio to Yerusalemu, mopolei̒ita tulu lo omulukaa-U̒ towalungi mongolio, tilinggula timongolio, motoyopulo mao̒.

²² Debo odelo talaa̒ pilopodidi todelomo tihengo, odito olo timongolio mapo didiyola to Yerusalemu. Yi mao̒taawa mao̒ limongolio deu̒ Wau̒, Eeya, malo lopatai omulukaa-U̒ ode yitaati mongolio.”

Dusa mongo tau̒wa lo Isirai̒lu

²³ Eeya luli lotahuda mai odelaatia, tahuda lo Eeya,

²⁴ “Wuu manusia panaa, polelea mao̒ ode taulo Isirai̒lu deu̒ huta limongolio najisi, wau sababu uito Wau̒ muluka wau mohukuumani mai olio.

²⁵ Mongo tau̒waalio debo odelo singa u hemo heuwanga lapatao̒ lodangapo mangusaalio. Timongolio hemomate ulipu mate-mateelo mao̒, molambata ngoa̒amila halata wau okokaya u odungga limongolio wau heloo̒ sababu dadaata mongobua lowali janda.

²⁶ Mongo iimamu lo Isirai̒lu helo lambanga ngoa̒amila butoo̒o-U̒ wau lopokootolo ngoa̒amila pakaakasi u pilopo tolomodu ode Olau̒. Timongolio diila lopohiihede toonu u halale wau toonu u haramu. Wau olo timongolio diila longaajali ulipu u lopohiihede toonu u belesi wau toonu u najisi modudua̒a wuu̒du lo agama. Timongolio diila lomandungi dulahu Saabati. Lou̒ odito Wau̒ hilinaa bangusa lo Isirai̒lu.

²⁷ Tahidihuma pantungo lo pamalentaalio debo odelo saligala u longai-ngaidinga mangusaalio. Timongolio hemomate-mateelo mao̒ bo u mopeehu uuntungi.

²⁸ Mongo nabi hemoluuo̒ duduu-sawaalo boito; timongolio debo odelo taa u momadetao̒ wolo tilo dingingo meeseli u kootolo. Ngoa̒amila bibilohi mongolio paaluti, odito olo ngoa̒amila laamali limongolio. Timongolio hipongakua deu̒ tahuli u pilopo tungguli mongolio yito u tilolimo limongolio lonto Eeya Taa Laba-labaalo molanggato, lebe-lebe pomao̒ Wau̒ diila helo tahuda ode limongolio.

²⁹ Tau-tauwalo tahi kaayawa hemohimbulo wau hemolambato. Timongolio hemohutu taa mosikini wolo totoonulalo otohilaa limongolio wau hemohama uuntungi monto tau deli.

³⁰ To wolota taulo Isirai̒lu boito, Wau̒ mololohe taa u mowali momongu dingingo meeseli, meaambo timihula to tataa-mbatiyalo u didii-ngingaalo meeselilio u momintengi lipu boito wonu bolo Wau̒ mamo ngantulu mao̒ todelomo omulukuaa-U̒ uwali-walihuhu; bo diaaluo penu boli ngotaa mao̒ tai̒lo dunggaa-U̒.

³¹ Sababu uito botia lopato-U̒ mai omulukaa-U̒ ode limongolio, wau debo odelo tulu Wau̒ mamopo binasa mai olimongolio sababu totoonulalo huhutu limongolio. Wau̒ Eeya Taa Laba-labaalo molanggato malo tahuda mai.”