YEHESKIEL 21 - KITABI HABARI MOPIOHE

Wamilo Eeya

¹ Eeya lotahuda mai odelaatia, tahuda lo Eeya,

² “Wuu manusia panaa, laa̒anatiyalo Yerusalemu. Laa̒anatiyalo tataa-mbatiyalo potabiyalo mola teto. Poe̒elailo mao̒ huta lo Isirai̒lu,

³ deu̒ Wau̒, Eeya lotahuda mai odie, ‘Wau̒ botie musuumu. Wau̒ mamomahuta wamilu-U̒ wau momate olimongoli ngoa̒amila mate-mateelo mao̒, tamoleeto meaambo tamopiohu.

⁴ Wolo wamilu-U̒ matuwaliya-U̒ ngoa̒amila tau monto tilayo demola huliaalio.

⁵ Yi ngoa̒amila tau mamotota deu̒ Wau̒, Eeya, momahuto wamilu-U̒ wau diilalo mopo tau̒upao̒ poli.’

⁶ Wuu manusia panaa, poi̒laalowalo suusa wau podulohelo totalu lotau-tauwalo Isirai̒lu, debo odelo yio̒ didu ohilao wau yilooli halapani.

⁷ Wonu timongolio mohintu yilongola yio̒ mopodulohu, polelea mao̒ deu̒ yio̒ suukali hilao sababu habari u mamei dungga mai. Habari boito mamohutu hilaa limongolio humuhela, uluu̒ limongolio molulupuhu, wau huu̒u limongolio polo-polopalio, timongolio madidu osumaangati. Otutu wakutuulio malei dungga, wau ngoa̒amila boito mamotoduo mai. Wau̒ Eeya Taa Laba-labaalo molanggato malo tahuda mai.”

⁸ Eeya lotahuda mai odelaatia,

⁹ “Wuu manusia panaa, polamalilo mola! Poleleaalo ode tau-tauwalo deu̒ Wau̒, Eeya lotahuda mai odie, ‘Woluo wamilo ngomato, wamilo u dilumbato wau piloo̒lalito.

¹⁰ Tio piloo̒lalito alihu mowali momate-mateelo mao̒, piloo̒ dipuluto alihu ilatao̒-ilatao̒. Duo̒lo umati-U̒ diduu̒ oweengahu sababu totoonulalo poe̒ela wau hukuumani pilalongi mongolio.

¹¹ Wamilo boito dilumbato alihu laito dapadapato pomake lapatao̒ yiludu ode ngotaalio tamoo-ngolotawa.

¹² Wuu manusia panaa, polapalilo hilimuto wau mongiibodu! Sababu wamilo boito dapadapato moluwali umati-U̒. Mongo tau̒wa lo Isirai̒lu wolo ngoilanggubu bangusa mabituo̒ lo wamilo boito tunggula binasa. Yi taa̒apalo mola duhelumu wolo suukali daa̒,

¹³ sababu Wau̒ donggo hemotesi umati-U̒, wonu timongolio diila mohuto mopoo̒piohu pii̒liilio, ngoa̒amila boito mamotoduo mai toli mongolio.’

¹⁴ Naa, manusia panaa, polamalilo mola. Taa̒apalo uluu̒mu, odelo tuoto duo̒lo wamilo boito u molumulo molambalo. Wamilo boito malo moo̒ohe.

¹⁵ Tio mohutu bangusaa-U̒ meenggi obuheliilio wau modehu meiteduo̒. Wau̒ monganjamu kota limongolio boito wolo wamilo u molilingga debo odelo ilato, wau u dapadapato momate-mateelo mao̒.

¹⁶ Wuu wamilo u molalito, polimadelo ode olowala wau ode oloihi, wau ode ambahu toonu wambai̒o modudua̒ otohilaamu.

¹⁷ Wau̒ mamolaa̒apo uluu̒ olo, lapatao̒ omulukaa-U̒ mamoole. Wau̒, Eeya malo tahuda mai.”

Wamilo li olongia Babel

¹⁸ Eeya lotahuda mai odelaatia, tahuda lo Eeya,

^19-20 “Wuu manusia panaa, gaambalia mao̒ dulo dalalo u mowali polibaya li olongia lo Babel tamodelo wamilio. Dulo dalala boito musi tumulalo monto lipu u motutuu-wauwa; dalalo u tuwau dulu-dulunga ode Raba, kota Amon; u tuwau poli ode Yerusalemu, kota obiintengi to Yehuda. Popohulia mao̒ dupi polunu dalalo tou̒toonu dalalo boito mamotitango.

²¹ Ti Olongia Babel timihulao̒ totili lodupi polunu dalalo boito. U motota mao̒ dalalo toonu umapo libayaalio, tio mohile potuhata monto babaa-laahalaalio, mohunggungo pana wau momalakisa hilaa lo binatangi u boheli pilopobake.

²² Maa lopatao̒ pana u ilohamawa lo uluu̒ olowalalio otuoto Yerusalemu! Uito boliilio deu̒ ti olongia musi moluhu kota lo Yerusalemu, mongiibode mola tingalao̒ lo popaatea wau mopoa̒hu mao̒ suludadulio mohuludu pakaa-kasiyaalo poloohubu, mopohuli mao̒ to huhuu-hebuwaalo hulubangi lo Yerusalemu, molambulao̒ huta mowali dingingo meeseli pomalaalo wau mongau̒de tataa-nggiyaalo.

²³ Ulipu lo Yerusalemu diila tayaakini deu̒ timongolio tuhuwolo, sababu timongolio malo daantia wolo Babel. Bo laamali botie mamopo eelao̒ olimongolio deu̒ timongolio mawau̒polio sababu duduu-sawaalo limongolio.

²⁴ Wau̒, Eeya Taa Laba-labaalo molanggato lotahuda mai ode limongolio, ‘Duduusaamu mai̒lotahua wau ngoa̒amila tau lotota deu̒ timongoli ototala. Ololeetumu oontonga todelomo huhutuumu. Botia malei dungga wakutuulio timongoli hukuu-maniyola wau timongoli mawuduwo-U̒ ode musumu.’

²⁵ Wau odeli olongia lo Isirai̒lu Wau̒ motahuda mai, ‘Wuu olongia tamoleeto wau tamomaahu palenta! Saaa̒ti lo hukumanimu maleembidei.

²⁶ Wau̒, Eeya Taa Laba-labaalo molanggato malo tahuda mai. Yinggilaalo makutamu wau bua̒dilo sulubanimu. Botia, owowoluwoa malo bolio̒. Polaia̒alo huhuloa̒a lotaa mosikini wau wohia mao̒ timongolio kawasa! Polaahelo tahi kawaasawa monto dalaajatilio!

²⁷ Kota botie maa̒antuluwo-U̒ mai sama-samaata, tilinggula penu boli tou̒toonu odungga tutuuodeelo. Bo sua̒li boito boheli motoduo mai wonu bolo taa u tulaotu-U̒ mai u mohukuumani kota botie malei dungga. To olioolo mawuduwo-U̒ mai kota botie.’ ”

Wamilo wau taulo Amon

²⁸ “Wuu manusia panaa, polaamalilo mola! Poo̒taa mao̒ ode taulo Amon tamalohina Isirai̒lu, deu̒ Wau̒, Eeya Taa Laba-labaalo molanggato lotahuda mai, ‘Wamilo ngomato mapilo dapato u mongoloto; wamilo boito madilumbato molilingga debo odelo ilato, alihu podapatolo u momate-mateelo mao̒.

²⁹ Bibilohu u iloontonga limongoli yito paaluti, wau laamali uiloi̒ya limongoli olo toongi wau wimbulo. Timongoli moleeto boli momaahu palenta, wau saaa̒ti lo hukuumanimu u pulitio maleembidu. Wamilo boito mamolimade buloo̒omu.

³⁰ Wuu taulo Amon, muli potau̒paalo wamilumu! Timongoli mabutoo̒o-U̒ to tambati ilowalia wau pilotutua mai olimongoli.

³¹ Wau̒ madiila mongoto-ngotongao̒ omulukaa-U̒ uwali-walihuhu ode limongoli. Wau timongoli mawuduwo-U̒ ode tau-tauwalo tahi palangia tamoolato u mopobinasa.

³² Timongoli mamopulito maahu lotulu. Duhumu mamo bangguwato to lipumu lohihilao, wau diaaluo penu boli ngotaa mao̒ tadonggo moe̒ela olemu. Wau̒ Eeya malo tahuda mai.’ ”