YEHESKIEL 2 - KITABI HABARI MOPIOHE

¹ lotahuda mai, “Wuu manusia panaa, tihuloolo. Wau̒ ohilaa mobisala wolemu.”

² Tou̒ suala boito ilodungohe lowatia, maa tilumuwotai Rohullah ode delomo batanga lowatia, wau pilopo tihulio watia. Lapatao̒ luli ilodungohe lowatia suala boito lotahuda mai,

³ “Wuu manusia panaa, yio̒ laoloo-U̒ ode tau-tauwalo Isirai̒lu talo malakala loluwali ola-U̒. Timongolio boito tamoo-malakalawa debo odelo tinenemoya limongolio olo.

⁴ Timongolio baaa̒ngiolo wau diila mohurumati ola-U̒. Yio̒ laoloo-U̒ ode limongolio u mopo tunggulao̒ wolo u Wau̒, Eeya Taa Laba-labaalo molanggato motahuda mai ode limongolio,

⁵ diila otaawa wolo timongolio mohuto modungohe meaambo diila; u polohuna daa̒, musi otaawa mao̒ limongolio deu̒ woluo nabi to huungi mongolio.

⁶ Bo yio̒, wuu manusia panaa, diila mao̒ oohe to tahipo malakalawa boito, meaambo tou̒ penu boli wolo uloi̒ya limongolio. Timongolio mamoluwali wau mohina olemu, tilinggula yio̒ debo odelo tumutumula towolota lo bambau. Eleponu odito, diila mao̒ oohe.

⁷ Potunggula mota ngoa̒amila tahulii-U̒ ode limongolio, diila otaawa wolo timongolio mohuto modungohe meaambo diila. Eelailo deu̒ timongolio boito tahipo malakalawa.

⁸ Wuu manusia panaa, dungohilo wolo potahudaa-U̒ mai olemu. Diila mao̒ podudua̒ momalakala olo. Huo̒ilo mola tunggilumu wau tamelalo wolo u wohi-U̒ mai olemu.”

⁹ Lapatao̒ watia loo̒onto uluu̒ u wuduwudu mai odelaatia. To delomo uluu̒ boito o lilibu kitabi,

¹⁰ u otuladu to biihio duuduluo. Lapatao̒ hiluo̒lio lilibu boito wau teto tula-tuladee lapali hilimuta, totoonulalo lapali u tilumoodu sababu suukali wau suala poloi̒laalo usuusa sababu mongongoto.